EZEQUIEL 27 - Qullan Arunaka DC

Tiro markatak amay imäwi q'uchu

1Tatitux sarakituwa:

2“Jumax Ezequiel, Tiro markatak aka amay imäwi q'uchu q'uchum,

3quta lakankir markataki, quta tuqinkir walja markanakampi alakipa lurir markataki. Jupanakarusti sarakim: ‘Tatitux akham siwa:

“ ‘Jumasti Tiro marka,

sinti sumapunïtwa,

askirakïtwa, sistawa;

4juman apnaqata uraqinakasti

jach'a qutakamaw puriraki,

utachirinakamasti sinti sumpun utacht'tamxa.

5Uta manqhinakamsti

Senir sat qullut apanita pino lawampiw uskurapipxtam;

wiphala sayt'ayañ lawamsa

Libanot apanita cedro lawat lurarapipxtam;

6barconakaman ñuqiñanakapsti,

Basán chiqat apanita roble lawat lurarapipxtam;

patxar uskutäki uka lawanakas

Chipre tuqinkir ciprés sat lawat luratawa,

marfilampi k'iñakipas k'achachatawa.

7Barcomar sarayir velanakamasti,

Egiptot apanita k'achacht'at suma lino telat luratawa,

ukasti jumatakix mä wiphaljamänwa;

patar janxatañatakisti

Elisá sata uksa quta iramanakat apanita

wila, ch'iyar chupika telanakat luratänwa.

8Barco apnaqirinakamasti

Sidón, Arvad markanakankir jaqinakäpxänwa,

wali sum apnaqañ yatipxarakïna.

9Guebal chiqankir suma yatxatat jaqinakaw

kunatix askichañäkän ukanaksa askichapxäna.

Qutan barconak apnaqir jaqinakaw

aljañanakamampix alakip lurapxäna.

10Ejercitomasti Persia, Lidia, Libia

uka markanakankir jaqinakampi sayt'ayatänwa;

nuwasiñ yänakapampiw k'achacht'apxäyätam,

wali jach'aru aptatäñamataki.

11“ ‘Arvad markankir jaqinakax, ejercitomamp chikaw markaman pirqanakap sum uñjapxäna, pukaranakamansti Gamad markankir jaqinakaw uñch'ukiyapxarakïna. Escudonakapasti taqi uka pirqanakaman warkuratänwa, ukampisti jumarux juk'ampi suma munkay markar tukuyasa.

12Qamir yänakamasti sintipunïnwa, ukat Tarsis markas jumampix alakip lurarakïnxa, aljañ yänakamatsti qullqi, hierro, estaño, plomo uka qhuyanak churapxäyätam.

13Grecia, Tubal, Mésec markanakas jumampiw alakip lurapxarakïna, qullqi lantxa, uywat jaqinaka, broncet lurat yänak churapxäyätam.

14Bet-togarmá sata markankirinakasti, aljañ yänakamatxa, kachxatañ caballonakampi, khumunak apir caballonakampi, mulanakampi churapxäyätamxa.

15Dedán markankir jaqinakampisa, jach'a quta tuqinkir markanakampis alakip luraraktaxa, aljañ yänakamatsti marfil, ébano sata suma lawanak churapxäyätamxa.

16Aljañ yänakamax kunaymanïnwa, ukat Siria markas jumampix alakipa lurarakïna, suma qalanakampi, linot lurat suma isinakampiw alasïyätamxa.

17Judá markampi, Israel markampisti jumampiw alakipa lurarakïna, qullqi lantxa, suma trigo, muxsa t'ant'anaka, misk'i, oliva quqat apsut aceite, suma q'apkir qullanaka, ukanak churapxäyätamxa.

18Damasco markasti uka qamir yänakam walpun alasïyätamxa, Helbón chiqat apanita vinompi, Sahar sata uywanakan t'awrapampiw alasïyätamxa.

19Dan chiqankir alakipa lurir jaqinakasa, griegonakasa, Uzal sata chiqatpach jumatakix suma lurt'at hierro, suma q'apkir qullanak apanipxäna.

20Dedán markankirinakasti monturanak apanisaw jumampix alakip luräna,

21Arabia, Quedar chiqankir taqi jilïrinakasti juman alasirinakamänwa; jupanakasti urqu jach'a ovejanakampi, cabritonakampi kunaw alasipxäyätamxa.

22Sabá, Raamá sata markankirinakasti juman alasirinakamänwa, ukatsti suma q'apkiri qullanakampi, suma qalanakampi, qurimpi kunaw alasipxäyätamxa.

23Mayni alasirinakamasti: Harán, Cané, Edén, Sabá, Asiria, Media uksa markanakankir alakipa jaqinakänwa;

24jupanakasti wali suma telanak jumarux aljapxäyätamxa, chupik samita, suma k'achacht'ata isinaka, suma sawuta jant'akunaka, suma k'ansut wiskanakampi kuna.

25Tarsis markankir barconakasti, mayat mayat kunayman aljasiñanakap apt'ata juman ukar jutapxäna.

“ ‘Tiro marka,

jumax jach'a qutankir barcor uñtatäyätawa,

qamir yänakampi phuqt'ata.

26Barco apnaqirinakamasti

jach'a quta manqharuw irpapxäyätam,

ukansti inti jalsu tuqit jutir thayaw

q'alpun uka jach'a qutan t'unjtamxa.

27Umar jaqurantkäta uka urusti,

qamir yänakamasa, aljasiñanakamasa,

achunakamasa, barco apnaqirinakamasa,

barco askichirinakamasa,

alakipa lurir jaqinakamasa,

nuwasir jaqinakamasa,

barcomxat sarir taqi jaqinakamasa,

jach'a quta manqharuw jaquranttapxani.

28Barco apnaqirinakaman arnaqasitaparusti,

mathapinakas khathatipxaniwa.

29Barco ñuqt'irinakaxa,

barco apnaqirinakasa,

waña uraqiruw thuquqxapxani.

30Wal arnaqasipxani,

jumatjamasti walpun jachapxani,

p'iqinakaparus laq'anakampiw jach'xatasipxani,

qhillaruw qurumsupxani.

31Jumatjamasti ñik'utanakapsa mururasipxaniwa,

llaki isinakampiw isthapisipxani,

chuyma kawkst'ataw jachapxarakini.

32Jumatjamasti amay imäwi q'uchunak q'uchupxani,

wali llakisiñampiw sapxarakini:

‘¡Ay jan khitimpi uñtaskay Tiro marka,

jichhax quta manqhar jaquntatawa!’ sasa.

33Aljañanakamax quta tuqit purinkän ukkhaxa,

taqi markanakaruw churäyätaxa.

Juman qamir yänakamampi, achunakamampiwa,

uraqinkir reyinakarux qamirkipstaytaxa.

34Jichhax jach'a qutampi tukjatätawa,

uma manqhar utjantatätawa.

Achunakamasa, taqi jaqinakamasa,

jumampi chikaw uma manqharux utjantawayxi.

35Quta tuqi markanakan utjirinakasti,

jumar uñjasax wali llakt'atäpxiwa;

reyinakapas wali mayjt'atäpxiwa,

uñnaqanakapas qhana mulljatäpxiwa.

36Yaqha markankir alakipa lurir jaqinakasti,

jumar uñjasax wali sustjatäpxiwa.

Jichhasti jumax mä axsarkañaw tuktaxa;

wiñayatak chhaqtatäxaraktawa’ ” sasa.