DANIEL 10 - Qullan Arunaka DC

Danielan Tigris sat jawir jak'an mä unañchäwi uñjatapa

1Persia markankir Ciro reyin kimsa mara marka apnaqäwipan, Danielax khititix Beltsasar satäkaraki ukax, mä chiqpach unañchäwi uñjäna, uka unañchäwisti janiw amuyt'añjamäkänti. Ukampis Danielax wali amuyumpiw ukanak uñjäna, ukatsti uka uñjäwin qhanañchäwip amuyt'arakïna.

2“Uka urunakanxa, naya, Danielax kimsa semanaw wali llakt'ata jikxatasïyäta.

3Uka urunakansti janiw nayax suma manq'anak manq'käyätti, aychsa, vinsa mallt'karakïyätti, janirakiw kuna suma q'apkir qullanakampis uchaskäyätti.

4Uka marana, nayrïr phaxsita pä tunk pusin uru saraqatarusti, nayax Tigris sat jach'a jawir thiyankaskäyätwa.

5Akatjamat uñtta mä jaqir sayaskiri, jupax linot lurat isimp isthapitänwa, wak'apasti suma qurit luratänwa.

6Janchipasti q'illu qhispillutäkaspas ukhamänwa, ajanupas lliju llijur uñtataw qhantäna. Nayranakapax nina lawranakjamarakïnwa, amparanakapampi, kayunakapampisti broncer uñtataw k'ajäna, jach'a arupax walja jaqinakan parlasipxatanakapjamaw ist'asïna.

7“Nayakiw uka unañchäwi uñjta, nayampi chika ukankir jaqinakasti janiw kuns amuyapkänti, axsarañatsa imantasiriw jaltxapxäna.

8Uka jach'a unañchäwi uñjkta ukkhaxa, sapakiskäyätwa, ajanuxas q'illupuniw tukuwayäna, jan ch'amaniw uñjasta.

9Angelar parlir ist'asasti jan juk'a ch'amaniw thayjtawayta, uraqiruw liwitatta.

10Ukat ukspachaw uka angelax sarthapiñ yanapt'itu, qunqurit kayuni, amparanakaxas uraqin utt'ayitu.

11Ukatsti sarakituwa: ‘Daniel, sayt'asim kuntix siskäma uk sum ist'am. Tatitux munastamwa, nayaruw jumaru yatiyañatak khithanitu’ sasa.

“Angelan nayar parlxayañapkamasti, khathatt'asisaw sayt'asta.

12Ukat jupax sarakitu: ‘Daniel, jan axsaramti, Tatitux nayrïr urutpach mayisitanakam ist'tam, uka jan amuyt'kay samkanakxat yatiñatak ch'amachasitamata, nayraqatapansa alt'at chuymam uñacht'ayatamata. Ukat nayax jutawayta.

13Nayraw nayax jutiriskäyäta, ukampis Persia markan angelapax pä tunk mayan uruw nayar jark'xäsitu; sapakiw Persiankir reyinakamp chik qhiparxarakta, ukampis Miguel sat jilïr angelaw nayar yanapt'irix jutitu.

14Jichhasti nayax, kunanakatix markaman akat qhiparu utjkani ukanakat qhanañchiriw jutta, unañchäwi uñjatamax uka urunakat yatiyi’ sasa.

15“Uka arunak angelan parlxayañapkamasti, nayax uraqir alt'ataw sayaskäyäta, janirakiw mä arsa arskäyätti.

16Ukatsti akatjamat jaqin yuqapar uñtatax nayar lakaxat llamkt'itu. Ukat khititix nayraqataxankkäna ukaruw sarakta: ‘Tata, aka unañchäwi uñjataxax wal llakisiyitu, jan ch'aman tukuyarakitu.

17¿Kunjämarak jumamp parlästi, jan ch'amani, niya samanas pist'atjam jikxatasisasti?’ sasa.

18“Uka jaqisti wasitat nayar llamkt'itu, ukatsti machaq ch'aman tukuyxarakitu,

19sarakituwa: ‘Jan axsaramti, janirak llakisimsa. Tatitux jumar munastamwa; ¡kusisim, ch'amañcht'asirakim!’ sasa.

Jupax ukhamaw nayar parlxayaskitäna, ukchañkamasti nayax ch'amaniw amuyasxäyäta, ukat sarakta: ‘Tatay, parlxayt'akita, parlatam ist'asin nayax ch'amaniw uñjasxta’ sasa.

20Jupasti sarakituwa: ‘¿Kunatakis juman ukar jutta, uk yattati? Jichhax Persia markan angelapampi wasitat nuwasiñaxawa. Nayax jupamp nuwasiñ tukuyxä ukkhasti, Grecia markan angelaparakiw jutani.

21Jichhasti sarakïmawa kunatix chiqa qillqatan qillqantatäki ukanakxata: uka angelanakampi nuwasiñaxanxa, Israel markar arxatiri Miguel angelakiw nayar yanapt'itu.’