1Jumanakan Diosamax akham siwa:
“Markaxarux chuymachapxam;
2Jerusalén markankirinakarux
munasiñampi parlxayapxam,
T'aqhisiyat sarnaqañapax tukusxiwa,
jucha luratanakapatsa phuqxapxiwa,
kuna mutuyäwtix katuqapki ukampix
phuqhatakïxiwa.”
3Mä aruw art'asiraki:
“Wasaran Tatitutakix mä thakhi wakichapxam,
wasaran mä chiqa thakhi jist'arapxam.
4Taqi p'iyanaksti phuqhantapxam,
jach'a qullunaksa, jisk'a qullunaksa khuskhachapxam,
taqi qhathanaksa, qullunaksa sum pampachjapxam.
5Ukapachaw Tatitux jach'a ch'amap uñacht'ayani,
taqi jaqinakarakiw uñjapxani.
Pachpa Tatituw ukham arsu.”
6Mä aruw arsu: “Art'am” sasa.
Nayasti saraktwa: “¿Kunarak art'ästi?” sasa.
Ukat ist'ta akham siri:
“Taqi jaqix qurar uñtatakiwa,
¡mä panqarar uñtata juk'a urunakatakikiwa!
7Qurax wañsuwayxakiwa,
panqaras ankuntawayxakiwa,
kunapachatix Tatitun phust'atapax uka chiqar purki ukkhaxa.
Chiqpachansa jaqix mä quraru uñtatakiwa.
8Qurax wañsuwayxakiwa,
panqaras ankuntawayxakiwa;
ukampis Diosan arunakapax
wiñayatakipunïniwa.”
9Jerusalén markan yatiyiripa,
mä qullu patar makhatam,
wali ch'amampirak art'asim,
mä suma yatiyäwi yatiyañataki.
Jerusalén marka, jan axsaras art'askakim,
Judá uraqinkir markanakarusti yatiyarakim:
“¡Jumanakan Diosamax akankiwa!” sasa.
10Tatitux ch'amampiw purini,
taqi kunsa ch'amapampiw apnaqi.
Markaparusti, qhispiyasin irpanxaraki.
11Kunjämatix mä awatirix ovejanakap sum uñjasixa,
ukhamarakiw jupax amparapar ovejanak ichxart'asi,
jichha wawachat ovej qallunakarus sum uñjaraki.
Israelan Diosapan jach'a kankañapa12¿Khitis jach'a lamar quta amparapampi tupt'ixa;
jan ukax luk'anapampi alaxpachan qawqch'ätapsa tupt'ixa?
¿Khitirakis mä sapa tupuru taqi aka uraqin laq'anakapsa apthapixa?
¿Jan ukax taqi qullunaksa mä balanzar apxatasin waytixa?
13¿Khitirak Tatiturusti janiw walïktati saspasti?
¿Jan ukax khitich juparux yatichaspaxa?
14¿Khitis juparux iwxanaka jan ukax, amuyt'äwi arunaksa churaspa?
¿Khitich juparux chiqa kankañampi taripäwi uñjañ yatichaspa?
¿Khitis juparux yatiñ kankañsa yatichaspa?
¿Khitich juparux yatiñ kankañ churaspa?
15Jupatakix taqi markanakax mä uma ch'aqar uñtatakiwa,
balanzar apxatata mä juk'a laq'ar uñtatakiwa,
qutankir markanakasti mä sapa ch'allampi sasikiwa.
16Taqi Líbano qullunsti janiw uywanakax
waxt'äwinak luqtañatakix utjkiti.
Lawas janirakiw nina nakhayañat utjkiti.
17Tatitutakisti taqi markanakax
janiw kunatakis askïpkiti.
18¿Khitimpirak Tatiturusti kikipayapxasmasti?
¿Kuna k'ari diosampirak jupar uñtasiyapxasmasti?
19Luririnakax metalanak umatatayasaw uka diosanak lurapxi,
ukarusti qurimpiw jawikipi,
qullqi wallqanak lurarapi.
20Mä dios luririx jan ñusantir lawa ajlli,
uka jaqin lurat diosan jan liwisiñapatakix
mä suma lurir thaqharaki.
21¿Janit jumanakasti yatipkäyätasti?
¿Janit ukham siri ist'apxirïktasti?
¿Janit nayratpach ist'apxirïktasti?
¿Janit aka uraqi qalltäwitpach amuyt'apktasti?
22Tatitun utjäwipax alaxpachatsa juk'amp khurinkiwa,
ukkhatpach jaqinakarux t'iju t'ijunakäkaspas ukham uñjaraki.
Jupasti alaxpachxa utacht'añatakjamaw janatati,
mä carpäkaspas ukhamarak janatati.
23Jupasti munañani jaqinakarux
janis kunäkaspa ukham tukuyi,
aka uraqin jach'a jilïrinakarus chhaqtayarakiwa.
24Jichha ayruntata chhuyu alinakampi sasiwa,
jichhakis saphintasipkaspa ukhama.
Tatitutix jupanakxar phust'aninixa, ankuntxapxakiwa,
tutuka thayasti jupanakarux mä t'unäkaspas ukham apasxaraki.
25Qullana Tatitusti jiskt'iwa:
“¿Khitimpis jumanakax uñtasiyapxitäta?
¿Khitirak naya kipkarakïspasti?”
26Alaxpach uñtapxam:
¿Khitis taqi ukanak luristi?
Khititix jupanakar mayat mayat jalanuqki uka,
taqinirus sutipatkam jawski uka.
Ch'amapax wali jach'awa,
janirakiw mä warawaras chhaqhatäkiti.
27Israel, Jacobun markapa,
¿Kunatsa jumax jaychasta?
¿Kunatsa ukham parlta,
“Tatitux janiw nayan kunankataxsa amuykiti,
janiw nayat llakiskiti sas parltasti”? sasa.
28¿Janit yatipktasti, janit ist'kta?
Tatituw, wiñay Diosaxa,
aka uraqpacha luririxa,
janiw jupax ch'amtaykiti, janirakiw qarjaskisa,
yatiñ kankañapasti jan tukuskiriwa.
29Jupaw qaritarux ch'am churi,
pisi ch'ama jaqirusti ch'am yapt'araki.
30Waynanakas qarjtakispawa, ch'amtayapxakispawa,
wali ch'amaninakas aynacht'akirakispawa,
31ukampisa khitinakatix Tatitur katuyasipki
ukanakax machaq ch'amanïpxaniwa;
pakalinakar uñtataw alayan tuyupxani,
jan qarjasisaw jalanaqapxani,
sarnaqasas janirakiw ch'amtayapkaniti.
Who We AreWhat We EelieveWhat We Do
2025 by iamachristian.org,Inc All rights reserved.
