ISAÍAS 21 - Qullan Arunaka DC

Babilonia markan aynacht'añapxat profecía arunaka

1Babilonia markatak profecía arunaka:

Tutuka thayjamaw aynachat jutantapxi,

wasarat jutapxi, axsarkañ chiqata.

2Tatitux kuntix uñacht'aykitu ukax wali axsarkañawa:

sallqjirix sallqjiwa,

t'unjiristi t'unjarakiwa.

¡Elam markankirinaka, sartasipxam!

¡Medo markankirinaka, Babiloniar nuwantapxam!

¡Janiw juk'ampi ayquñanak ist'kxäti!

3Janchixas chhijthaptituwa,

wawachasir warmin janchipjamaw usurakitu,

chuyma kawkst'añasti janiw ist'aykituti,

axsarañas janirakiw kunsa uñjaykituti.

4Amuyuxas mayjt'atawa,

axsarañatsa khathatiraktwa.

Inti jalanta pachanakax wali sumänwa,

jichhasti ukax nayatakix axsarkañakiw tukxi.

5Manq'añawjax niya wakicht'atäxiwa,

jant'akunakas jant'akt'atarakiwa,

jach'a manq'äwix niya qalltxarakiwa.

¡Soldadonakan jilïripa,

sayt'asipxam, jark'aqasiñanakam sum llijtayapxam!

6Tatitusti situwa:

“Saram, ukatsti mä uñch'ukiri uskum,

kunanaktix jupax uñjkani ukanak yatiypan.

7Pä caballon qatatita carronaksa,

asnoru, jan ukax, camellonakar lat'xatat jaqinak uñjchini ukaxa,

ukanak tuqit jank'ak yatiypan.”

8Khititix uñch'ukkän ukax akham sasaw art'asi:

“Tata, nayax uñch'ukiñawjan uñch'ukiskta,

sapürurakiw uñch'ukiskta,

arumanakas paqar paqaraw uñch'ukiskta.

9Mä carro pä caballon qatatit jutaskir uñjta” sasa.

Ukatsti mayniw saraki:

“¡Aynacht'xiwa, aynacht'xiw Babiloniaxa!

diosanakapasti uraqirkamaw liwirtxapxi,

jisk'a jisk'a t'unjataw uñjasipxi” sasa.

10Isaías profetax sarakiwa:

Nayan markaxay, walpin t'aqhisiwaytaxa,

kuntix taqi ch'aman Tatituxa,

Israelan Diosapäki ukax

uñacht'aykitu uk yatiysma.

Edom markatak profecía arunaka

11Tatitux Isaías profetaruw uñacht'ayäna kuntix Edom markar lurkani ukxata, uka uñacht'äwi tuqiw uka markatpach maynir arnaqasinir ist'äna:

“Isaías, ¿Kuna pachas

nanakan t'aqhisiñanakaxax tukusxani?” sasa.

12Marka uñjiristi sarakiwa:

“Jank'akiw samarañ urunakax purinxani,

ukampis mutuyäwix kutt'aniniwa.

Juk'amp yatiñ munapxsta ukapachaxa,

wakisiw jiskt'asipkañamaki” sasa.

Arabia markatak profecía arunaka

13Tatitux Isaías profetaruw uñacht'ayäna kuntix Arabia markar lurkani ukxata, arumanakax uka jaqinakax wasar ch'uminak taypin utjapxirïna:

Dedán chiqan utjir árabe jaqinaka,

14umat pharjatar jikxatir mistunipxam,

ukatsti um churapxam.

Temá markan utjirinaka,

jaltxirinakar jikxatir mistunipxam,

ukatsti manq'añ churapxam.

15Jupanakasti jiwayatäñat jaltasipki,

wali ari espadampi jiwayatäñata,

mich'inakan jiwayatäñata,

uka nuwasïwin jiwayatäñat jaltasipki.

16Tatitusti sarakituwa:

“Akat mä mararuxa,

kunjämtix mä irnaqirix luräwip tukusitapat llakiskixa,

ukhamaw Quedar markan jach'a kankañapax tukusxani.

17Quedar markan jach'a nuwasirinakapan

janiw kunampi tuwaqasiñapas utjkxaniti.”

Israelan Tatit Diosapaw ukham arsu.