SALMOS 89 - Qullan Arunaka DC

SALMO 89Diosampi Davidamp arust'äwi lurapxatapa 1 Etán chachan q'uchupa.

1 1 (2) Tatay,

khuyapayasiñamat wiñayapuniw q'uchü,

juman askïtamat jan qarjasisaw yatiyä.

2 2 (3) Wiñay munasiñamat arsü;

arsutam phuqhirïtamat yatiyä,

alaxpachjam jan mayjt'irïtamat parlarakï.

3 3 (4) Jumaw Davidampix arust'äwi luräyätaxa,

ajllit uywatamarux arsüyätawa:

4 4 (5) “Wawanakamaruw wiñayatak utt'ayä,

reyit juma lanti qunt'asiñapataki” sasa.

5 5 (6) Tatay,

alaxpachax muspharkañ luratanakam yatiyi,

aski kankañamasti angelanak taypin yatiyasi.

6 6 (7) ¡Tatay,

janiw kawkïr diosas alaxpachanxa,

jumampi chikachaskaspati!

7 7 (8) Taqi ch'aman axsarkay Diosätawa,

alaxpachankirinakampi muyuntatätawa.

8 8 (9) Taqi ch'aman Tatit Diosay,

taqpach ch'amax jumankiwa,

chiqa kankañasti jumar muyuntiriwa;

janiw khitis jumjamax utjkiti.

9 9 (10) Jumaw lamar qutarux llamp'uraytaxa,

jach'a mathapinakarus t'akuraytaxa;

10 10 (11) jumaw lamar qutankir axsarkañ animalar t'unjtaxa,

ch'aman amparamampiw timanakamarux ananuktaxa.

11 11 (12) Alaxpachas akapachas jumankiwa,

jumaw akapach lurtaxa,

taqpach uraqin utjirinak luraraktaxa.

12 12 (13) Jumaw amsta tuqsa, aynach tuqsa lurtaxa;

Tabor qullumpi, Hermón qullumpix

kusisitaw sutim jach'añchapxi.

13 13 (14) Amparamax taqi ch'amaniwa;

kupi amparamasti wali ch'amaniwa.

14 14 (15) Chiqapar uñjañampi,

aski kankañampiw markarux apnaqtaxa,

munasiñaman wiñayatakïtap uñacht'ayapxistaxa.

15 15 (16) Tatay,

jumar kusisiñampi yupaychir markax kusisiñaniwa,

qhanamamp qhant'ayat sarnaqir markax kusisiñaniwa,

16 16 (17) juman sutim laykuw sapür kusisiñanïpxi,

juman aski kankañam laykuw kusisipxi.

17 17 (18) Jumaw ch'amapätaxa, aytat kankañapätasa,

khuyapayasiñam laykuw ch'amanakaxax jilxati.

18 18 (19) ¡Jiwasanakan arxatirisax Tatituwa!

¡Reyisasti Israel markan Qullanapawa!

19 19 (20) Nayra pachanxa, unañchäwi tuqiw parläyätaxa,

iyawsirinakamarusti akham säyätaxa:

“Markax taypit jan axsarir chacharuw ajllista,

juparuw jach'ar aptta, yanaparakta.

20 20 (21) ¡David uywataxaruw jikxatta!

qullan aceitempi jawintasaw reyit utt'ayta;

21 21 (22) yanapaxax janipuniw jupatak pist'kaniti.

Ch'amaxampiw jupar ch'amañchä,

22 22 (23) janiw timanakax jupar jalxatapkaniti,

janirakiw qhuru jaqinakas atipapkaniti.

23 23 (24) Timanakaparux takxatäwa;

uñisirinakaparusti t'unjäwa,

jan mayampi uñjkay tukjä.

24 24 (25) Munasiñaxampi, aski kankañaxampi katuqani,

sutix laykuw ch'amapax jilxatani.

25 25 (26) Jupax wali ch'amampiw apnaqani,

Mediterráneo lamar qutat qalltasa,

Éufrates jawirkam puriyasa.

26 26 (27) Jupax nayaruw art'asitani:

‘Jumaw Awkixätaxa, Diosaxätasa,

jumaw qhispiyista, arxatarakista’ sasa.

27 27 (28) Nayasti tayna yuqall wawat uñt'asxä,

akapachankir reyinak taypin jilïrit utt'ayä.

28 28 (29) Munasiñaxax jupatak wiñayäniwa,

jupampi arust'ataxasti jan t'unjkayäniwa.

29 29 (30) Wawanakapax jupa lantiw markarux wiñay apnaqapxani,

alaxpachan utjañapkamaw reyit utt'atäpxani.

30 30 (31) “Wawanakapatix yatichäwinakax jaytanukupxani,

janirak arsutanakaxarjamas jakapkani,

31 31 (32) kamachinakaxtix ñanqhachapxani,

janirak arsutanakax imapkan ukaxa,

32 32 (33) ñanqha luratanakapat mutuyä,

jawq'añ thujrumpiw juchanakapat t'aqhisiyä;

33 33 (34) Davidar munasitaxsti janiw jaytanukkäti,

janirakiw jupar arsutax phuqhañsa armaskäti.

34 34 (35) Janiw jupamp lurat arust'äwirux p'akintkäti,

janirakiw arsutanakaxsa mayjt'aykäti.

35 35 (36) Qullan kankañax laykuw juramento lurta,

janiw juparux k'arintkäti:

36 36 (37) wawanakapax jupa lantiw marka apnaqapxani,

intin utjañapkamaw reyit utt'atäpxani.

37 37 (38) ¡Phaxsir uñtat thurt'atäpxaniwa!

¡Alaxpach utjañkamax jan unxtkayäpxaniwa!”

38 38 (39) Ukampis juman ajllit reyirux

jaqunuktawa, jisk'acharaktawa;

jupampix jachjayastawa.

39 39 (40) Uywatamampix arust'äwi p'akinttaxa;

pillupsti uraqiruw jaqunuktaxa.

40 40 (41) Jerusalén markar jark'ir pirqanakapxa,

q'al allinuktaxa.

41 41 (42) Taqi jaqiw uka chiq sarakipasax lunthatji;

marka jak'a masinakapasti jupat larusipxi.

42 42 (43) Jumax timasirinakaparuw ch'amañchtaxa,

uñisirinakapampiw larusiytaxa.

43 43 (44) Jupatakix espadap muthuptaytaxa,

nuwasiñansti janiw yanapktati.

44 44 (45) Aytat kankañap alt'aytaxa;

reyi kankañapsti uraqiruw jaqnuqtaxa;

45 45 (46) walja maranak jakañap apaqtaxa,

p'inqa tukuñampiw phuqhantaraktaxa.

46 46 (47) Tatay,

¿kunapachkamarak imantasïtasti?

¿Q'apisiñamasti ninjamapunit aqtani?

47 47 (48) Tatay, amtasim,

jakañ urunakaxax juk'atakikiwa;

juman irnuqat jaqix juk'a urunakakiw jaki.

48 48 (49) ¡Janiw khitis wiñay jakkaspati!

¡Janiw khitis jiwan ch'amapat qhispkaspati!

49 49 (50) Tatay,

¿kawkinkarak nayra munasiñamasti,

Davidar churañatak juramentomp arsutamasti?

50 50 (51) Tatay,

uywatanakaman t'aqhisitapat amtasim:

jaqinakan tuqitanakapxa, chuymaxaruw apaskta.

51 51 (52) Tatay,

¡timasirinakamax ukham t'aqhisiyapxitu!;

¡ajllitamarux sapa kutiw ukham jisk'achapxi!

52 52 (53) Tatitux wiñayatak jach'añchatäpan:

¡Ukhamäpan!