JEREMÍAS 52 - Qullan Arunaka DC

IV. SARNAQÄWINAKXAT YAPXATAT ARUNAKA: JERUSALÉN MARKAN AYNACHT'ATAPA(52.1-34)Sedequías reyin marka apnaqatapa(2 R 24.18-20; 2 Cr 36.11-16)

1Sedequías reyix Jerusalén marka apnaqañ qalltkän ukapachasti, pä tunka mayan maranïnwa, Jerusalén markansti tunka mayan maraw marka apnaqäna. Taykapax Hamutal satänwa, Libna markankir Jeremiasan phuchhaparakïnwa.

2Sedequías reyix kunatix Tatitutak jan walïki ukanak luräna, kunjämtix Joacim reyix lurkatayna ukhama.

3Ukat Tatitux Jerusalén markataki, Judá uraqitakisa phiñasitänxa, ukanakarusti jupan nayraqatapat apanukurakïnwa.

Jerusalén markan aynacht'atapa(2 R 24.20—25.7; Jer 39.1-7)

Ukatsti Sedequías reyix Babiloniankir reyitakiw sayt'asïna.

4Kunapachatix Sedequías reyix niya llätunka mara marka apnaqkän ukapachawa, tunkïr phaxsina tunka uru saraqataruw, Babiloniankir Nabucodonosor reyix taqpach ejercitopampi Jerusalén markar katuntañatak jutantäna, ukatsti muyuntarakïnwa. Jerusalén marka uñkatasiruw purintapxäna, ukatsti markar katuntañatakix marka muytpacharuw pirqanakjam lurasipxäna.

5Jerusalén markasti, Sedequiasax niya tunka mayan mara marka apnaqkän ukkhakamaw ukham muyuntat uñjasïna.

6Uka pachpa marana, pusi phaxsi, llätunka uru saraqatarusti, Jerusalén markanxa manq'at pist'añax juk'ampiw jilxattäna, jaqinakatakisti janiw kuna manq'añas utjkxarakïnti.

7Ukat Sedequías reyix soldadonakapampi markan pirqap p'iyjapxäna, babilonionakax jupanakar muyuntatäkchïna ukasa, reyimpi, soldadonakampix arumawa uka p'iyanjam mistuwayxapxäna. Pä pirqa taypinkkis uka punkunjam sarakipawayapxäna, reyin panqar uyunakapäkis uka thakhinjama, ukatsti Jordán qhirwa tuqir sarki uka thakhinjam sarxapxarakïna.

8Ukampis babilonio soldadonakax Sedequías reyirux arktapxänwa, juparusti Jericó pampan jikxatapxäna. Ejercitopasti taqpachaniw jupar apanukuwayasin sarawayxapxäna.

9Babilonio soldadonakasti reyir katuntasin Babiloniankir reyin nayraqataparuw irpapxäna, uka reyisti Jamat uraqina, Riblá sata chiqankaskänwa. Uka chiqan Nabucodonosor reyix Sedequiasataki juchañchäwi arunak arsurakïna,

10ukatsti jupan uñjkatarakiw wawanakaparux p'iqi apaqayäna, ukhamaraki Judá uraqinkir taqi jilïrinakarusa.

11Sedequías reyirusti nayranakap k'ilarayäna, ukatsti cadenanakampi ñach'antataw Babiloniar apayarakïna, ukansti Sedequías reyix jiwañapkamaw katuntat uñjasïna.

Diosan utap t'unjapxatapa(2 R 25.8-21; 2 Cr 36.17-21; Jer 39.8-10)

12Nabucodonosor reyix Babilonia marka tunka llätunkan mara apnaqkän ukkha, phisqïr phaxsina tunka uru saraqataruw Nebuzaradán sat reyin yanapiripa, reyin uñjirinakapan jilïripäki ukax Jerusalén markar purinïna,

13ukatsti Tatitun utap ninampiw phichhantäna, reyin utapsa, markan utjir taqi utanaksa; nayraqatax jach'a jilïr jaqinakan utanakap q'al phichhantäna.

14Ukatsti jupamp chik jutir ejercitosti Jerusalén markan pirqanakap q'al tinkurayäna.

15Ukatsti Nabuzaradán jilïrix khitinakatix markar qhiparapkatayna taqi ukanakaruw Babiloniar katuntat apxäna, ukhamarak Babiloniankir reyir jaqkattirinakaru, amparampi yänak lurañ yatirinakampiru.

16Mä qawqha jan kunan jaqinakak jaytawayxäna, uva yapunaka, yaqha yapunak jupanakan yapuchapxañapataki.

17Babilonionakasti kunanakatix Tatitun utapan broncet lurat yänakax utjkäna ukanak q'al jisk'a jisk'a t'unjapxäna: sayirinakapa, katxäsirinakapa, uma uchañ jach'a lamanapa, ukatsti taqi uka broncenak Babiloniaruw apasipxäna.

18Ukhamarakiw qhilla uchañanaka, lampanaka, pabilonak khuchhuqañanaka, jach'a qirunaka, jach'a wisllanaka, kunanakatix Tatitur yupaychañatak utjkäna taqi uka broncet lurat yänaksa q'al apasxapxäna.

19Uka Nebuzaradán jilïristi taqi qurit lurat yänak apasxarakïna: qurit lurat jach'a lamananaka, nina sank'a uchañanaka, jach'a tilinkinaka, qhilla uchañanaka, candeleronaka, wisllanaka, vino luqtäwi katuyañatak uka qirunaksa q'al apasxäna.

20Uka pä jach'a pilarana, uma uchaña lamanäkis ukana, broncet lurat tunka payan urqu vacanakax uka uma uchañ q'ipxäsipki ukanakana, qawqha bronce qhuyatix utjkäna ukax janiw yatiñjamäkänti, ukhamarak Salomón reyix Tatitun utap sayt'ayañatak luraykatayna ukanakan qawqha bronce qhuyatix utjkäna ukas janiw tantiyañjamäkänti.

21Uka pä jach'a pilaranakasti sapa mayax amstarux pusi tunka chhiyanïnwa, thururusti pä tunka payan chhiyanirakïnwa; pilar manqhasti ch'usa phusakïnwa, uka broncesti mä t'axlli ukkha thurünwa.

22Sapa maya pilarasti alay tuqirux broncet lurat mä t'ikhampi apxatatänwa, ukasti niya tunka chhiyanjamänwa, ukasti jiwakïñapatakix broncet lurat kunayman uñtasitanakampi k'achachatänwa,

23uka broncet luratanakax mayax manzanar uñtata, mayanakasti cadenanakar uñtatarakiw utjäna. Sapa pilaransti llätunka tunka suxtani manzanar uñtat broncet luratampi muytayatänwa, ukampis cadenanak patxanxa patakat jilaw utjarakïna.Judionakax katuntatäsin jayar apatäpxiwa

24Nebuzaradán jilïristi Seraías sata jilïr sacerdoteruw katuntäna, ukatsti Sofonías sacerdoteru, khititix ukxaru arktirïki ukaru, ukhamaraki Tatitun utap uñjiri kimsa jaqinakaru.

25Markankir jaqinakatsti, ejerciton jilïriparuw katuntäna, reyin paqallqu iwxt'irinakaparu, ukatsti kawkïr jilïr militaratix ejercitotak jaqinak katuqirïkän ukaru, ukhamaraki suxta tunka wali aytat jaqinakaru, khitinakatix uka markan qhiparapkatayna taqi ukanakaru.

26-27Nabuzaradán jilïristi taqi uka jaqinakar katurasinxa, Babilonia markankir reyin nayraqataparuw irpäna, uka reyisti Hamat uraqina, Riblá sata uka chiqankaskänwa. Ukan Babiloniankir reyix uka jaqinakan jiwarayatäpxañapatak mayïna.

Ukhamaw Judá markan jakirinakax uraqipat jaya markar apanukut uñjasïna.

28Nabucodonosor reyin ukham apanukuyat jaqinakasti akkhanïnwa: paqallqüri mara jupax marka apnaqkäna uka marasti, Judá uraqit kimsa waranqa pä tunka kimsan jaqinak apanukuyäna,

29tunka kimsaqallqüri maransti, Jerusalén markatxa kimsaqallqu pataka kimsa tunka payani jaqinak apanukuyäna;

30pä tunka kimsan mara saraqatarusti, Nebuzaradán jilïrix paqallqu pataka pusi tunka phisqan jaqinak Judá uraqit apanukuyarakïna, taqpachanisti pusi waranqa suxta patakan jaqinakaw apanukut uñjasipxäna.

Joaquín reyix qhispitaw uñjasi, Babilonia markansti jach'añchäwi katuqaraki(2 R 25.27-30)

31Judá uraqinkir Joaquín reyix niya kimsa tunka paqallqun mara apanukut uñjaskän ukkhasti, tunka payan phaxsi saraqataruw Evil-merodac sat reyix Babilonia marka apnaqañ qalltxäna, jupasti Joaquín reyit khuyapt'ayasïnwa, ukat carcelat irpsxarakïna.

32Kawkïr reyinakatix Babilonian jupampi chika utjapkän ukanakat sipansa, juparux juk'ampi sum uñjäna.

33Ukhamasti Joaquín reyix carcelankañ isipxa apsusxänwa, ukatsti reyimpi chikarakiw manq'asxäna taqi urunakapana.

34Ukhamarusa, jiwañapkamax Joaquín reyix sapürurakiw Babiloniankir reyit mä yanap katuqäna.