JEREMÍAS 23 - Qullan Arunaka DC

Qhipa urunakatak suyt'äwinaka

1Tatitux siwa: “¡Ay kunakïkan awatirinakatxa, khitinakatix ovejanakax chhaqhayapxi, ananukupxaraki ukanakatakixa!”

2Israelan Tatitu Diosapasti, kawkïr awatirinakatix markap apnaqapki ukanakarux siwa: “Jumanakax ovejanakaxar ananukupxtawa, chhuktayapxtawa, janiw sum awatipktati. Jichhax walikiwa, nayax taqi jan wali luräwinakamat walpun mutuyapxäma. Naya, Tatituw uk arsta.

3Naya kipkaw ovejanakaxar anthapisinxä, kawkïr markanakarutix ananukuykäyäta ukata, tantacht'asinsti suma chiqäwjaruw kuttayanxä, ukhamat mä jach'a marka tukxañapataki.

4Awatirinak jupanakar awatiñapatak uskurapï, jan kunsa axsarapxañapataki, janirak maynis chhaqhañapataki. Naya, Tatituw uk arsta.”

5Tatitux siwa: “Mä uruw purinini

Davidan wawapax reyïkani uka uru,

jupax wali amuyt'ampiw sarayani,

chiqpach luräwimpiw aka marka apnaqani.

6Uka reyin apnaqäwipansti,

Judá uraqix qhispiyatäniwa,

Israel markas taqi jan walit

jark'aqataw jakasini.

Aka sutimpiw sutichapxani:

‘Tatituw jiwasan atipjirisaxa’ ” sasa.

7Tatitusti siwa: “Juramentonak jan lurañ urusti purininiwa, akham sasa: ‘Egipto markat israelitanakar apsunir Tatitux jakaskiwa’ sasa,

8jan ukasti akham sasaw juramento lurapxani: ‘Israelitanakaru Babilonia markampita, kawkirutix ananukkatayna uka yaqha markanakampit kuttayanxir Tatitux jakaskiwa’ sasa. Ukatsti pachpa uraqinakapan israelitanakax jakasipxarakini” sasa.

K'ari profetanakxat yatiyäwi

9Profetanakxat arunaka:

Tatituw mä aski yatiyäw churitu,

ukat chuymaxax mayjt'at jikxatasi,

janchixasti wal khathatiraki,

machat jaqir uñtatätwa,

vinompi q'ala machjatäkiristsa ukhama.

10Aka markasti

wachuqa jucha lurir jaqinakan phuqhantatawa,

ñanqha lurir jaqinakan phuqhantatawa,

jaqi masipar ñanqhachañatakix munañanïpxiwa.

Ukat Tatitux aka uraqirux ñanqhachi,

aka uraqisti wañsuwayxiwa,

wasar tuqin chhuxllanakasa

q'alaw pharsuwayxaraki.

11Tatitux siwa:

“Profetanakasa, sacerdotenakasa

juchararkamakiwa,

pachpa utaxan jan walinak lurasipkir jikxatta.

12Ukatpï jichhax sarnaqäwinakapax

ch'amakar tukutänixa:

Nayaw jupanakarux nukt'asin tinkuyäxa.

Jupanakar luratanakapat wayt'kä ukkhasti,

jach'a t'aqhisiñanak jupanakxarux apayanï.

Naya, Tatituw uk arsta.

13“Samariankir profetanakarusti,

kunanakatix nayar ñanqhachkitu

ukanak luraskir uñjta;

Baal diosan sutipxaruw parlapxi,

Israel markaxarusti thakhipatxa,

maysaruw saranukuyapxi.

14Jerusalenankir profetanakarusti,

axtaskañ luräwinak lurasipkir uñjta:

Wachuqa juchanak lurapxi,

k'arisiñanakan sarnaqapxi,

jan wali jaqinakaruw yanapapxi.

Sodoma, Gomorra markankirinakat sipansa

juk'ampi jan wali jaqinakäpxiwa.

15Ukatpï, naya taqi ch'aman Tatitux,

uka profetanakatakix aka arunak arstxa:

Jerusalenankir profetanaka,

uka ñanqha lurañanak

taqi markpacharuw aqantayapxtaxa,

jumanakarux k'allk'u manq'a manq'ayapxäma;

jiwayir qullan uma umayapxarakïma”.

16Taqi ch'aman Tatitusti siwa:

“Israelitanaka,

profetanakax parlapki uka arunakarux jan ist'apxamti.

Arsutanakapax k'arikamakiwa.

Jupanakan amtat arunakak parlapxi,

janiw nayax jupanakar kuna arunaksa churkti.

17Arunakaxar jisk'achirinakarusti sapxarakiwa:

‘Taqi kunas walikïskaniwa’ sasa.

Chuymanakapan

jan wali amtatanakaparuk arkapki ukanakarusti

sapxarakiwa:

‘Janiw kuna jan walis jutkätamti’ ” sasa.

Jeremías profetan jach'at arsutapa

18Ukampisa,

¿khitis Tatitun tantachäwipankänxa?

¿Khitis arunakap ist'i, juparus uñjaraki?

¿Khitis arsutaparux jaysi?

19Tatitun phiñasiñapax

mä jach'a jawir umar uñtatawa,

jach'a tutuka thayar uñtatawa,

ñanqha jaqinakaruw mutuyarakini.

20Tatitun amtäwinakap phuqhasiñapkamasti

phiñasiñapax janiw tukuskaniti.

Mä uruw jumanakax taqi akanakat amuythapisipxäta,

akanakat yatipxarakïta.

Tatitun arunakapa k'ari profetanakataki

21“Janiw nayax uka profetanakarux khithankti,

janirakiw jupanakarux kuna arunaksa siskti,

ukampis jupanakax nayan sutixar parlirix

jalakamakiw misttawayapxi.

22Jupanakatix nayan amtatanakax yatipxasapän ukkhasti,

markaxarux nayan arunakax yatiyapxasapänwa;

jan wali thakhinakapatsa kuttayanipxasapänwa,

ñanqha lurañanakapsa apanukuyapxarakisapänwa.”

23Tatitux siwa:

“Jayansa, jak'ansa,

nayätwa Diosaxa.

24¿Khitis naya nayräxat imantasispa?

Alaxpachansa, akapachansa

nayax taqi chiqanktwa.

Naya, Tatituw uk sista.

25“Uka k'ari profetanakan parlatanakap nayax ist'twa, jupanakax nayan sutixaruw parlañ munapxi, samkanak tuqsa nayampis parlapkaspa ukham parlapxi.

26¿Kunapachkamas uka profetanakax jupanakan amtatanakaparjam k'ari arunak yatiyasipkakini?

27Kuna samkanaktix jupanakax maynit maynikam parlakipasipki ukanakampix markaxarux nayat armasiyañ munapxi, kunjämatix nayra awkinakapax nayat armasisin Baal diosar yupaychapkän ukhama.

28-29¡Mä profetatix mä samka samkaschi ukaxa, qhanak sispan mä samkakïtapa, ukampis arunakaxtix katuqchi ukasti, kunjämtix katuqki ukhampach yatiypan! Trigo jipimpi trigo achumpix janiw mayakïkaspati. Arunakaxax ninjamawa, qarqanak jisk'a jisk'a tukjir martilljamawa. Naya, Tatituw uk arsta.

30“Ukat nayax jupanakkam nayan arunakax lunthatasipki uka k'ari profetanakatakix phiñasitätxa. Naya, Tatituw uk arsta.

31Nayax kawkïr profetanakatix jupanakan wakichata arunakapa, nayan arunakaxäkaspas ukham parlapxi ukanak tuqiw sayt'ta.

32Nayax kawkïr profetanakatix uka k'ari samkanakap parlasax markaxar maysar saranukuyapxi ukanakatakiw sayt'ta. Janiw nayax jupanakar khithankti, janirakiw kuna arunaksa churkaraktti, ukhamasti jupanakax janiw markaxarux yanapt'apkaspati. Naya, Tatituw uk arsta.

Kunjämsa Tatitun yatiyäwinakapat parlasiñapa

33“Jeremías, markankir mä jaqitixa, jan ukax mä profetasa, mä sacerdotesa jiskt'ätam ukkhaxa: ‘¿Kawkïris Tatitun iwxapaxa?’ sasa. Ukapachasti jupanakarux sarakim: ‘Tatitux siwa: Jumanakarux apanukupxämawa’ sasa.

34Ukampis yaqha profetatixa, yaqha sacerdotesa, jan ukax markankir yaqha jaqis parlanixa: ‘Tatitun iwxanakapawa’ sasa, juparusa, wila masiparus nayaw mutuyarakï.

35Kunapachatix maynix mä masiparu, jan ukax mä wila masiparus jiskt'anixa, jupax sarakiniwa: ‘¿Kunsa Tatitux arusxati? ¿Kamsis Tatituxa?’ sasa.

36Ukampis jani mayampsa ‘Tatitun iwxapawa’ sasax parlapxamti, ukampis khititix ukham parlkani ukaruxa, nayaw pachpa arunakap kutintasiyä. Jumanakax jakkir Diosana, taqi ch'aman Tatitun arunakap jan waliruw tukuyapxtaxa, maysaruw q'iwipxtaxa.

37“Jeremías, uka profetanakar jiskt'am: ‘¿Kunsa Tatitux arusxati? ¿Kamsis Tatituxa?’ sasa.

38Ukarutix sapxätam: ‘Tatitun iwxapawa’ sasaxa, jupanakarusti sarakim: ‘Tatitux siwa: Jumanakax kuntix janiw parlapxätati sapksma uka arunak parlasipkaktawa,

39ukatpï jichhax jumanakarusa, kawkïr marktix nayra awkinakamar churkta uka markamppacharus jaytanukupxämaxa.

40Jumanakxarux wiñay jisk'achjatäñampi, p'inqachjatäñampi apanïxa, ukham luratatsti janipuniw kunapachas armt'asipkätati.’ ”