SALMOS 45 - Qullan Arunaka DC

SALMO 45Reyin jaqichasiñapatak q'uchu 1 Reyin jaqichasiñapataki Coré chachan wawanakapan qillqat q'uchu.

1 1 (2) Muxsa arunakaw chuymaxan phullch'iraski;

laxraxax qillqirin suma qillqañapjamawa.

¡Reyin nayraqatapan q'ucht'arapï!

2 2 (3) ¡Jaqinakat sipan juk'ampi sumätawa!

¡Lakamat munayasiñ arunakax mistsuski!

Tatitusti wiñayatakiw askinak churtam.

3 3 (4) Jan axsarir jaqi,

espadam wak'ar uskuntasim,

ukaw k'achachirimaxa,

ukarakiw jach'añchirimasa.

4 4 (5) Atipjañampi sarantam,

chiqa layku ch'amachasisa,

llamp'u chuymaninakar chiqapar uñjasa.

¡Kupi amparamax muspharkañanak lurpan!

5 5 (6) Mich'inakamax wali arinakawa,

markanakax jumaruw makhatxapxtam,

reyimpi timasirinakax axsarayasxiwa.

6 6 (7) Dios Tatay,

reyi kankañamax wiñayatakiwa,

reyi kankañamax chiqapar uñjañawa.

7 7 (8) Aski kankañarux munastawa,

ñanqharusti uñistawa.

Ukat Diosamax jumar ajllistam,

masinakam taypin kusisiñampiw phuqhanttam.

8 8 (9) Isinakamax suma q'apkir qullanakaniw mukt'asi;

mirra, áloe, canela ukanakampi;

marfilat lurat reyin utapatpach

arpanakax jumar kusisiytam.

9 9 (10) Reyinakan phuchhanakapaw juma taypinki,

reinax kupïxaman qunt'atäskiwa,

qurit lurat k'achachañanakampi uchantata.

10 10 (11) Phuchhaxay, uñtanim;

jinchum alkatanisin ist'ita:

Markamat armasxam,

wila masinakamat armasxarakim,

11 11 (12) reyix suma uñnaqt'anïñam muni;

jupaw uywirimaxa, juparux jaysañamawa.

12 12 (13) Tiro markankir reyin phuchhapa,

qamir markanakax churäwipampiw

suma chuymam jikxatañ munapxi.

13 13 (14) ¡Akaxay, reyin phuchhapax

wali k'achachataw mantani!

¡Isipas qurimp k'achachatawa!

14 14 (15) Reyin ukarux suma isthapitpun irpapxi;

qhipap nayrap sarir tawaqunak taypina.

15 15 (16) Wali kusist'asisaw sarantapxi;

reyin utaparuw kusisit mantapxaraki.

16 16 (17) Jach'a rey,

wawanakamax nayra awkinakam lantiw reyit qunt'asipxani,

taqpach uraqir jilïrit utt'ayarakïta.

17 17 (18) Nayax sapa mita jaqinak taypin

sutim aytatäñapatakix ch'amachasï,

markanakasti wiñayan wiñayapaw

jumarux jach'añchapxätam.