JEREMÍAS 22 - Qullan Arunaka DC

Judá reyin utapankirinakatak mä yatiyäwi

1Tatitux sarakituwa: “Reyin utapar saram, ukatsti aka arunak yatiyarakim,

2Judá uraqinkir reyin nayraqatapana, Davidan qunuñapan qunt'atäki uka nayraqatana, reyin yanapirinakapan nayraqatapana, markankir jaqinak nayraqatana: ‘Tatitun arunakap ist'apxam.

3Aka chiqansti kunatix chiqapäki, askïkaraki uk lurapxam, t'aqhisiyatarusti t'aqhisiyiripat qhispiyapxam, yaqha markat jutirinakarusti jan jisk'achapxamti, wajchanakaru, ijma warminakarus janirak kuna jan walsa lurapxamti. Jan juchan jaqinakarusti jan jiwayapxamti.

4Jumanakatix aka arunakaxar ist'asin phuqhapxätaxa, Davidan qunuñapan qunt'asir reyinakax utjaskapuniniwa, jupanakasti carronakxata, caballonakxata reyi utan punkup chiqa mantapxani, jilïrinakana, taqi markpachan jaqinakampi chikt'ata.

5Ukampisa, janitix aka arunakar ist'apkätaxa, aka reyi utax t'unjataw uñjasini. Naya, Tatituw uk arsta.’ ”

6Tatitusti Judá reyin utapatxa akham siwa:

“Jumax nayatakix Galaad qulljamätawa,

Líbano jach'a qullunak patar uñtata,

ukampis juramentompiw arsta,

jumarux ch'usa wasararuw tukuyäma,

jan jaqinakan chiqaruw tukuyäma.

7Jumatakisti mä jach'a ejército khithanï,

jupanakaw jumarux tukjapxätam.

Cedrot lurat suma pilaranakamsa

q'al khuchhunukupxani,

ninaruw phichhantapxarakini.

8“Walja markanakankir jaqinakaw aka chiq sarakipapxani, ukatsti jupanakkamaw jiskt'asipxani: ‘¿Kunatsa Tatitux aka jach'a markar ukham luri?’ sasa.

9Ukxarusti arusxatapxarakiniwa: ‘Jupanakax kuntix Tatitu Diosapax mä arust'äwi jupanakampi lurkäna uka apanukupxatayna, ukatsti yaqha diosanakaruw killisis yupaychapxarakitayna, ukat ukham uka markarux luri’ ” sasa.

Jeremiasan Salum tuqit yatiyäwipa

10-11Josías reyitxa jan jachapxamti,

jiwatapatsa janirak jachapxamti;

jan ukasti Salum yuqapat jachapxam,

jupax jan kuttaniñatakiw sarxi;

janirakiw mayampsa yurïwip uraqi uñjkxaniti.

Tatitux Judá uraqin reyipa Josiasan Salum yuqapat siwa, khititix awkipa qhipat reyïkän ukata, akawjat mistuwaykän ukata: “Janiw jupax kuttankxaniti,

12jan ukasti kawkïr markarutix katuntat apapki ukan jiwxani, aka marksti janipuniw mayampsa uñjkxaniti.

Joacín rey tuqit yatiyäwi

13“¡Joacín, ay kunakïkan jumatxa,

ñanqhanak lurasa,

jan chiqapar uñjasaw utanakamsa,

reyi utanakamsa utachastaxa,

yaqhanakarusti qullqi jan churasakiw irnaqaytaxa!

14Saraktawa: ‘Mä jach'a uta utachasï,

alay patanakar jach'a utanakani’ sasa.

Ventananak jist'araraktaxa,

pirqanaksti cedro lawampiw apakiptaxa,

ukatsti wila samimpiw samichsuraktaxa.

15¿Reyïñax cedrompi k'achachat utan

jakañäkaspas ukhamti amuyasta?

Awkimax suman jakasiwayi;

jupasti chiqaparuw taqi kunsa lurarakïna,

ukat taqi kunas jupatakix walt'arakïna.

16T'aqhisiyatanakarusa,

jan kunaninakarus arxatarakïnwa,

ukat taqi kunas jupatakix walt'arakïna.

Ukapï nayar uñt'añaxa.

Naya, Tatituw uk arsta.

17“Ukampis jumax jan wali lurañanakampi

jikxatatanakamatak llakistaxa;

jan juchanirux jiwaytawa,

markamankirinakarus

ch'ama lurañanakampiw t'aqhisiyaraktaxa.”

18Tatitux Judá uraqinkir Josías reyin Joacim yuqapxat akham siwa:

“Janiw khitis jupan jiwatapat jachirix utjkaniti.

Janiw khitis jacht'asis kunsa siskarakiniti:

‘¡Ay jilata! ¡Ay kullaka!

¡Ay Tata! ¡Ay jach'a rey!’ sasaxa.

19Mä asnorjamaw imantapxani,

Jerusalén marka anqäxaruw

qatatisin liwtanipxani.”

Jerusalén markxat yatiyäwi

20Tatitux Jerusalén markankirinakaruw akham saraki:

“¡Aka markpachar sarapxam;

jach'a qullunak patar makhatapxam,

jan chuymachkay jachapxarakim!

Yanapapxayätam uka markanakax

q'ala tukjatäxiwa.

21Suman sarnaqapkäyätas ukapachaw

nayax jumanakar parlxayapxsma,

ukampis janiw ist'añ munapkistati.

Wayna kankañamatpach ukhampun sarnaqapxtaxa:

¡arunakax ist'añsti janipuniw munapktati!

22Mä thayaw taqi jilïrinakam apasxani,

munasirinakamasti jayar apatäpxaniwa.

Taqi ñanqhanak luratamatxa,

jisk'achjata, p'inqachjataw uñjasïta.

23Jichhax jumax utaman k'uchikïsktawa;

Líbano tuqit apanit cedronak taypina;

¡ukampis niyaw t'aqhisiñ qalltäta,

ayquñanakax purinkätam ukapacha,

ukanakasti wawachasir warmin ayquñapjamäniwa!”

Joaquín reyitak Diosan yatiyäwipa

24Tatitux Joacín jaqin Joaquín yuqaparux, Judá uraqin reyiparux siwa: “Juramentompiw arsta: Kupi amparaxan surtijapäkasma ukasa, amparaxat apanukupunirismawa,

25uñisirinakamaru katuyañataki, jupanakarux wal axsartaxa. Babiloniankir Nabucodonosor reyin amparaparuw katuyäma, caldeo jaqinakan amparaparuw katuyäma.

26Ukatsti jumarusa, taykamarusa yaqha jaya markaruw apanukupxäma, ukan panpachani jiwapxarakïta.”

27Kawkïr markarutix walpun kuttaniñ munapkäta uka markarusti janipuniw kuttanipkätati.

Profetan art'asitapa

28¿Joaquín reyix mä p'akjat chatumpi sasiti,

jan kunatak inamaya jan khitin munata jaqtatati?

¿Kunatarak jupasa, wawanakapasa

jan uñt'at jaya markar apanukut uñjasipxisti?

29Uraqi, uraqi, uraqi:

Tatitun arunakap ist'am.

30Tatitux siwa:

“Aka jaqirux mä jan wawani jaqïkaspas

ukham qillqantapxam;

jakañapan aynacht'kaspas ukhama.

Janipuniw jichhax mayni wawapasa

Judá uraqi wasitat apnaqañatakix

Davidan qunuñapar qunt'askaniti” sasa.