SALMOS 63 - Qullan Arunaka DC

SALMO 63Diosax jaqin kusisiñapawa 1 Davidan q'uchupa, Judea wasarankkän ukapach qillqat q'uchu.

1 1 (2) ¡Diosaxay, jumaw Diosaxätaxa!

Jumarux walpun thaqsma,

ajayuxax jumatjam pharjatawa;

taqi chuymapuniw jumarux munsma,

jan umani, jan jakañan waña uraqir uñtata.

2 2 (3) ¡Qullan utaman uñjañ munsma,

ch'amamampi jach'a kankañamampi uñjañ munta,

3 3 (4) munasiñamax jakañat sipan juk'ampiwa!

Lakaxampiw jumarux yupaychäma;

4 4 (5) taqi jakäwixampiw jach'añchäma,

jumat mayisiñatakix amparanakax aytä.

5 5 (6) Jach'a manq'äwinkir jaqjamaw kusisï,

lakaxasti kusisitaw yupaychätam.

6 6 (7) Arumanakax ikiñan jumat amtasta,

ikintataw jumxat lup'irakta;

7 7 (1) jumaw nayan yanapirixätaxa.

¡Amparamankasax kusisitätwa!

8 8 (1) Jakañaxax jumampi chikt'atawa;

kupi amparamasti janiw antutnukkituti.

9 9 (1) Nayar jiwayañ munirinakasti,

manqhapacharuw jalantapxani;

10 10 (1) ¡espadampi jiwarayataw uñjasipxani,

qamaqinakan manq'antataw tukusipxani!

11 11 (1) Reyisti Diosankasaw kusisini;

sutip layku juramento luririnakaw q'uchupxani,

k'arinakan lakapasti llupt'atäniwa.