EZEQUIEL 42 - Qullan Arunaka DC

Sacerdotenakan utanakapa

1Uka jaqisti Tatitun utapan anqäxaparuw irpsutu, amsta tuqin utjkän uka utanakaruw irpantitu, uka utanakasti Tatitun utap qhipäxankänwa, jist'antat uta anqäxa uñkatasina.

2Taqpach utanakasti, amsta tuqit sayt'urux phisqa tunka metronïnwa, iramarusti pä tunka phisqan metronirakïnwa.

3Maysa tuqitsti manqhäxankir uta anqäxaruw mistüna, ukasti iramarux tunka metronïnwa, maysa tuqitsti qalanakampi suk'suta uta anqäxaruw misturakïna. Ukasti kimsa altusanïnwa, sapa altusasti aynachat qalltasin amsta tuqirux wali jitthapiyatarakïnwa.

4Uka utanak uñkatasinsti mä uta mantañawjaw utjäna, ukasti iramarux phisqa metronïnwa, manqha tuqi sayt'urusti phisqa tunka metronirakïnwa. Uka utan punkunakapasti amsta tuqir uñtatkamakïnwa.

5Amsta patxankir utanakasti, taypi altusankiri, aynachankir utanakat sipansa jisk'akamakïnwa, sapa altusasti aynachankir utanakat sipansa wali jitthapitänwa.

6Uka utanakax kimsa altusanïnwa, alay tuqinkir utanakasti janiw aynach tuqinkir utanakjam pilaranakanïkänti, ukat sapa altusan juk'ampi jitthapitarakïna.

7-8Anqäxankir utanakax taqpachasti sayt'urux pä tunka phisqani metronïnwa. Uka utanak uñkatasinsti mä pirqaw utjäna, ukasti sayt'urux pä tunka phisqan metronirakïnwa, uka pirqasti uta anqäx tuqinkänwa. Taqpachasti uka uta mantañax phisqa tunka metronïnwa.

9Aynachankir utanakar mantañatakisti, inti jalsu tuqinkir uta anqäx tuqiw mantatarakïna,

10kawkhakamatix anqäx pirqax purkän ukkhata.

Aynach tuqinsti yaqha utanakaw utjarakïna, ukanakasti Tatitun utap qhipäxankänwa, uka uta anqäxan pirqapar utachkatatänwa.

11Uka utanakasti taqpachax mä uñtankama, ukch'akamak luratänwa, amsta tuqinkir utanakjam mantañani mistuñani ukhama, ukanak uñkatasinsti mä uta mantañampi kuna.

12Aynach tuqinkir utanakar puriñatakisti, inti jalsu tuqin utjir punku tuqikiw mantapxañapäna, kawkhattix uta mantañawjax qalltaski ukkhata, ukasti muyuntat pirqa uñkatasinkänwa.

13Ukat uka jaqix sarakitu: “Amsta tuqinkir utanakasa, aynach tuqinkir utanakasa, uta anqäx uñkatasinkki uka utanakasa qullan utanakawa. Tatitur jak'achasipki uka sacerdotenakasti ukanwa qullan waxt'äwinak luqtatäki ukanak manq'apxi. Ukarurakiw jupanakax granonakat luqtäwinaka, jucha luratanakat qullan luqtäwinak uchapxi, uka chiqawjan qullanätap layku.

14Sacerdotenakax Tatitun utapar mantapkani ukkhasti, janiw uta anqäxarux mistunipxañapäkiti, janïr uka utaru kuna isinakampitix Tatitur luqtapkän uka isinak isirasisaxa, uka isinakan qullanätap layku. Markachir jaqinak nayraqatar mistuniñatakisti, yaqha isimpiw isthapisinipxañapa” sasa.

Tatitun utap muytatäkis uka pirqan tupupa

15Uka jaqisti Tatitun utap manqhankir uraqinak tupt'asinsti, inti jalsu tuqinkir punku tuqiw anqäxar irpsuwayitu, ukatsti uka muyta tupt'äna.

16Tupuñ lawa aytasisinsti, inti jalsu tuqi tupt'arakïna, ukasti pä pataka phisqa tunkani metronïnwa.

17Ukatsti jank'akiw amstäx tuqi tupt'äna, ukasti pä pataka phisqa tunkan metronirakïnwa;

18aynach tuqisti pä patak phisqa tunka metronirakïnwa;

19tukuyarusti inti jalanta tuqi tupt'arakïna, ukasti pä pataka phisqa tunkani metronirakïnwa.

20Pusi tuqitpach tupt'äna, Tatitun utapan uraqipar pusi tuqit muytat pirqasti pä pataka phisqa tunkani metronkamänwa, uka pirqasti Tatitun utapampi, markampi jaljañatakïnwa.