PROVERBIOS 18 - Qullan Arunaka DC

1Jupatakik kuns munir jaqix, munañaparukiw sarnaqi,

suma iwxt'anaksa janiw katuqaskiti.

2Jan amuyt'an jaqix janiw yatiqañ amtanïkiti;

jupan amuyupak parlañ muni.

3Ñanqha lurañanxa, p'inqachäwikiw utji;

jach'a jach'a tukuñansti, jisk'achayasiñakiw utji.

4Yatiñan jaqin arunakapax uma jalsunakar uñtatawa,

jalir jawirar uñtat jakañ phuch'urakiwa.

5Taripirinakan juchan jaqit arxatañapax janiw askïkiti;

jan juchan jaqin arsusitanakapar janiw sañas janirakiw askïkiti.

6Jan amuyt'an jaqin parlatanakapax ch'axwañanak utjayi,

jan wali arupasti tuqisiñanak utjayaraki.

7Jan amuyt'asir jaqin parlatapax jupa pachparuw aynacht'ayi;

arunakapasti jakañapatakix sipitar uñtatawa.

8Arunak apnaqir jaqin parlatanakapax suma muxsjamawa,

ukampis chuyma manqhir mantasin jan walt'ayi.

9Jayrasir jaqimpi, tukjir jaqimpix,

¡niyas jilapurjamawa!

10Tatitun sutipax jach'a pukarar uñtatawa,

uka tuqiruw aski jaqinakax qhispiyasiñatak jalapxi.

11Qamiritakix qamir yänakapax

pirqanakampi muyuntat markäkaspas ukhamawa.

12Jach'a jach'a tukuñax, aynacht'añawa;

llamp'u chuyma tukuñasti, jach'ar aptatäñawa.

13Janïr sum ist'kasin arsuñax,

jan amuyt'asirïña, mä p'inqarakiwa.

14Usutarux ch'am katxatatapaw wayxäsi,

ch'ama thayjtatarusti, ¿khitirak waytaspasti?

15Yatiñan jaqinakampi, ch'ikhi jaqinakampiw

thaqhapki uka yatiñ kankañ jikxatapxi.

16Mä suma churäwimpix kawkhakamas mantañakiwa,

wali aytat jaqin nayraqatapkamaw puriyi.

17Nayraqat arsusirix, jani juchanïkaspa ukhamaw arsusi;

jupampi juchikiristi purinisin qhanstayi.

18Tatitun taripäwipaw ch'axwañanakar tukuyi,

yaqha yaqharak ch'axwirinakar jaljtayi.

19Mä jach'a pirqa tinkuyañax juk'amp jasakiwa,

chuyma usuchjat jila masir chuymachañat sipana.

20Sapa mayniw parlatapatjam katuqi,

churäwipsa, jan ukax mutuyäwipsa.

21Jakañampi, jiwañampix parlatatjam wakisi;

sinti parlirinakax jan walt'añanakampiw t'aqhisini.

22Mä suma warmi jikxatañax suma aski jikxatañawa;

Diosan khuyapayasiñap katuqañawa.

23Jan kunan jaqix achikt'asisaw arsu;

qamir jaqisti jach'a jach'a tukusaw parli.

24Yaqhip masinakax jank'akiw apanukusi,

ukampis mayni masinakax jilasat sipan juk'ampiwa.