2 CORINTIOS 11 - Qullan Arunaka DC

Pablon mayjt'asitapa

1¡Nayan pisi chuyman jaqjam parlataxat jan mayjt'asipxamti! Llamp'u chuymampiy ist'apxita.

2Jumanakat llakiskta uka llakisiñax Diosat juti. Nayasti jumanakar mä sapa chachampi jaqichasiñatakiw katuyapxsma, jupasti Cristowa, jupa nayraqatarusti q'uma jan chach uñt'ir mä tawaqurjamaw uñstayapxsma.

3Ukampis axsarañaxaw utjitu, kunjämatix katarix Eva warmir k'arinakapampi sallqantänxa, ukhamach jumanakan chuymanakam sallqantarakispa uk amuyta, ukhamäspa ukasti Cristor q'uma chuymampi arkañat saraqtayapxiristam.

4Jumanakax wali sum katuqapxtaxa khitinakatix yaqha Jesusxat parlasis purinipki ukanakaruxa, kawkïr Jesusattix nanakax parlapksma ukat sipana. Ukhamarakiw yaqha ajaysa sum katuqapxtaxa kuntix nanakat katuqapkäyätas uka Ajayut sipansa, ukatsti yaqha arunak sum katuqapxaraktaxa qhispiyasiñ arunak churapksmas ukat sipan juk'ampi.

5Ukhamasti janiw nayax qhipat jutapki uka jach'achasir apostolunakat sipan jan yäqañäkti.

6Parlataxax jan sumäkchi ukasa, yatiñanak tuqin janiw ukhamäkti; aksti jumanakarux taqi luräwinakaxan uñacht'ayapxsma.

7Criston suma yatiyäwi arunakap jan kun mayisak yatiyapksma, nayapach jisk'ar tukus jumanakan jach'ar aptatäpxañamataki, ¿ukati jan walïkisti?

8Yaqha iglesianakaruw yanap mayta, jupanakaw jumanakar yanapañatak qullqi waxt'apxitu.

9Jumanak taypinkkasasti pist'añan jikxatasta, ukampis janiw khitirus maykti; Macedoniat jutir jilatanakaw kunatix jan utjkitän uk churapxitu. Janiw nayat llakisipxañam munkäyätti, akat qhiparus janipuniw mayipkämati.

10Criston chiqa kankañap uñt'ataxat janiw pächaskti, janiw Acaya chiqanakan khitis uka kusisiñ apaqkitaniti.

11¿Kunatarak ukham parlañaxasti wakisisti? ¿Janich jumanakar munasipksmaxa? ¡Diosaw jumanakar munasitax yati!

12Ukampis kuntix lurkta uk luraskakïwa, ukhamat khitinakatix nanakjam tukuñ munas aytayasiñ thaqhapki ukanakax, jan uka amuyunakapan sarnaqasipkañapataki;

13jupanakax k'ari, sallqjir apostolunakakiwa, Criston apostolunakapäkaspas ukhamaw tukupxi.

14Ukasti janiw kunäkisa, pachpa Supayaw k'ajkir angeläkaspas ukham tuku;

15ukat luqtirinakapax chiqa kankañsa arxatapkaspa ukham tukupxi. ¡Ukampis jupanakax luratanakaparjamaw tukusini!

Pablox apostolütap laykuw t'aqhisi

16Mä kutimpiw sapxsma, jan khitis nayan luqhïtax amuypati; ukampis ukhamtix amuyapxstaxa, luqhi jaqjam parlam sapxita, ukhamat nayan mä juk'a jach'achasiñaxataki.

17Akxa janiw Tatitun parlayatati sisktxa, jan ukasti mä luqhir uñtataw parlaskta, ukatarakwa jach'a jach'a tukuñ munasktxa.

18¡Niyakixay walja jaqinakax luräwinakapat jach'a jach'a tukt'apxchixa, nayan jach'achasiñaxax wakisirakiwa!

19Jumanakax wali yatiñan jaqïkasinsa, taqi chuymampiw luqhi jaqinakarux katuqapxtaxa,

20khitinakatix ch'amampi t'aqhisiyapktam, sallqjapktam, uñisiñat ajanut t'axllipktam ukanakarusa.

21Akanak arsutaxax p'inqasiykchitu ukasa, chiqpachansa nanakax jumanakatakix sinti alt'at chuymaniw tukupxäyätxa, uka jaqinakjama jumanakaru lurañatakixa.

Ukampis mayninakatix jach'achasiñ munchixa, nayas jach'achasiñ munaraktwa, ukax luqhi lurañäskpasaya.

22¿Jupanakax hebreo jaqinakäpxiti? Nayax hebreo jaqirakïtwa. ¿Jupanakax israelita jaqinakäpxiti? Nayax israelita jaqirakïtwa. ¿Jupanakax Abrahamat saraqirïpxiti? Nayax Abrahamat saraqirirakïtwa.

23¿Jupanakax Criston irnaqiripäpxiti? Nayax jupanakatsa juk'ampïtwa, ukham parlasax inas mä luqhi jaqjam parlsta. Nayax jupanakat sipan juk'ampi irnaqawayta, nayarux jupanakat sipan walja kutiw carcelar jist'antapxitu, nayax jupanakat sipan juk'ampi jawq'jataw uñjasta, walja kutiw jiwayat niy uñjasta.

24Judionakax phisqa kutiw kimsa tunka llätunkan jawq'antasax mutuyapxitu.

25Kimsa kutiw lawampi jawq'japxitu, mä kutisti qalampiw k'upjapxitu. Kimsa kutiw barcox qutanjam sarasax jalantäna, ukat niyapuniw axskatta, jach'a qutan mä arumampi mä urumpiw qhantatta.

26Taqi tuqi sarkasax walja kutiw jawiranakampis niy apayasta, lunthatanakampis jalxatayasta, marka masinakax taypina, jayankir jaqinak taypin chijinakan uñjasta. Markansa, pampanakansa, k'ari jilatanak taypinsa, quta taypinsa chijinakan uñjasirakta.

27Walja kutiw irnaqäwinakan jan walt'añanakan uñjasta; walja kutiw jan ikin uñjasta; manq'atsa awtjata umatsa pharjataw sarnaqta; walja kutiw jan manq'atäkti; thayansa thayjata, isitsa jalstataw sarnaqta.

28Taqi akanakatsa, yaqhanakatsa, sapürupuniw iglesianakat llakista.

29Maynitix usuntchixa, nayax usuntaraktwa; maynirutix tinkuyapxchixa, nayax wal llakista.

30Mä kunat jach'achasiñatix utjchixa, nayax uka t'ukha kankañaxat jach'achasirakï.

31Jesucristo Tatitun Dios Awkipaxa, wiñayatak yupaychatäñapax wakisiwa, jupax nayan chiqa arsutax yatiwa.

32Damasco markan jikxatasïyät ukkhaxa, Aretas sat reyin marka apnaqiripax marka punkunakaruw nayar katuntañatakix uñjirinak uchäna;

33ukampis mä jilatanakaw mä canastar nayar uchasin, jach'a uyu pata ventanat warkuqapxitu, ukhamat jupanakan amparapat jaltxäyäta.