2 SAMUEL 13 - Qullan Arunaka DC

Amnón chachan Tamar kullakapar jan wal luratapa

1Davidan wawapa, Absalón yuqapax mä kullakanïnwa, Tamar sutini, uka kullakapasti wali suma uñnaqt'an tawaqünwa. Ukhamïpansti Davidan Amnón sat mayni yuqapax, Tamar tawaqur walpun munapayatayna,

2ukham munapayasasti tawaqutjam llakisisax usuntarakïnwa; Tamar kullakapax janirakiw ukakamax chachanakampi sarnaqañsa yatkataynati; ukat Amnón jaqix kullakapar jan kuns lurirjamäkänti.

3Amnón jaqix mä uñt'at masinïnwa, uka jaqisti sinti sallqa jaqïnwa, Jonadab sata, Simá jaqin yuqapänwa, uka Simá chachasti Davidan jilaparakïnwa.

4Mä urusti, Jonadabax Amnón jaqiruw jiskt'äna:

—Reyin yuqapa, ¿kunas kamachtam? ¿Kunatarak urut urutjam t'ukhantasktasti? ¿Janit nayar yatiykitasma? —sasa.

Amnón jaqisti ukxaruw sarakïna:

—Absalón jilaxan Tamar kullakaparuw walpun munta —sasa.

5Jonadab jaqisti akham sarakïna:

—Ikiñar ikintam, ukatsti wali usutäkasmas ukhamaw tuküta. Awkimax jumar uñjir jutkani ukkhasti, juparux akham säta: “Tamar kullakaxar nayar uñjir khithanita, aka pachpan manq'a phayt'arapitpan nayan uñjkata, churkitani uk manq'asiñaxataki” sasa, ukhamat jumax jupar uñjäta, churkätam uksa manq'asirakïta —sasa.

6Ukat Amnonax ikiñar ikintäna, wali usutäkaspas ukhamaw tukurakïna. Reyix jupar uñjir jutkän ukapachasti, Amnonax achikt'asisaw jupar säna:

—Tamar kullakaxar khithanita, aka pachpar jutasin pä torta lurt'arapitpan, amparapampi nayar manqt'ayarakitpan —sasa.

7Ukat Davidax Tamarar jawsayasin jupar säna:

—Amnón jilaman utaparuy saram, manq'a phayt'anirapim —sasa.

8Tamarasti Amnón jilapan utaparuw saräna, jupasti ikiñankaskänwa. Ukatsti jak'u aptasin chapunti, uka pachpan tortanak wakichasin phayt'araki;

9ukatsti sartén katusin Amnonar tortanak luqtäna; ukampis Amnonax janiw manq'añ munkänti, ukan jikxatasir uywatanakarusti khithanukurakïnwa.

10Uywatanakax taqini mistuwayxapxän ukkhasti, Amnonax Tamar kullakapar sänwa:

—Ikiñaxar manq'a apanirapita, amparamampi manqt'ayita —sasa.

Tamarasti phayt'katayna uka tortanak aptasin Amnón jilapatak ikiñ utaparuw aparapïna,

11ukampis manq'a apt'ata jak'achaskän ukhamaruw Amnón jaqix ch'amamp katthapisin sarakïna:

—Kullakaxay, jutam, nayamp ikintam —sasa.

12Tamarasti sänwa:

—¡Janiw jilata, jan ukham nayar jan wal luristati, ukham lurañax janiw Israel markan utjkiti! ¡Jan ukham ñanqha luramti!

13¿Kawkirurak nayasti p'inqachat uñjasisin saririststi? Jumasti Israel taypin mä jan chuyman jaqit uñt'atarakïsmawa. Achikt'asïma, reyimp parlam, jupasti nayan jumampïñaxatakix iyawsaniwa —sasa.

14Amnón jaqisti janiw ist'añ munkänti, jupax Tamar tawaqut sipan juk'amp ch'amanïtap laykux, ch'amampikiw liwnuqasin Tamarampix ikintäna.

15Ukham warmt'asxatatsti, Amnón jaqix Tamar kullakapar walpun uñisxäna, kunjämtix jupar walpun munapaykäna ukat sipan juk'amp uñisxäna. Ukat tawaqur jach'at säna:

—¡Sartam, akat saram! —sasa.

16Tamarasti achikt'asïnwa:

—¡Janiw jilata, jan ukham nayar khithanukustati! Akat nayar jaqunukutamax nayar lurkista ukat sipan juk'amp jan walïspawa! —sasa.

Amnón jaqisti janiw jupar ist'añ munkänti;

17jan ukasti, uywatapar jawsasin säna:

—¡Aka warmir akat wayunukum, ukat punku sum jist'antarakim! —sasa.

18Uywatasti, Tamar tawaqurux anqaruw wayunuküna, punksa sum jist'antarakïna. Tamarax suma isimpi isthapt'atänwa, kunjämtix reyinakan tawaqu phuchhanakapax isthapt'asipxirïkän ukhama,

19jaqunukut uñjasisasti, qhillampiw p'iqipxar willxatasïna, uka suma isip ch'iyanuqasirakïna, amparanakapampi p'iqip katt'asisaw jacht'asis thakhinjam sarxäna.

20Absalón jilapasti uk yatisinxa jupar jiskt'änwa:

—¿Amnón jilamat akham lurtam? Ukhamächi ukasti, janiw kuns parlätati, munat kullaka, jupax jilamawa. Jan ukxat sinti llakisimti —sasa.

Tamarasti ukham apanukut uñjasisax Absalón jilapan utapan qhiparxäna.

21David reyisti uk yatisinxa, walpun q'apisïna; ukampis Amnón yuqaparux janiw uka luratapat kuns kamskänti, juparux sinti munasirakïna, jilïri wawapätap layku.

22Absalonax janiw Amnonar parlxaykxänti, walpun jupar uñisïna, Tamar kullakapar ukham ñanqha luratapata.

Absalonax Amnonar uka jan wali luratapat phuqsusi

23Pä mara qhipatsti, Absalonan jaqinakapax Baal-hasor chiqan ovejanakapat t'awra yawisipkäna, Efraín marka jak'ana, ukat Absalonax manqt'asiñatak reyin wawanakapar taqinir jawsayäna.

24Jupa kipkaw reyin ukar saräna, juparusti sänwa:

—Jaqinakaxax ovejanakaxat t'awra yawisipki, nayax muniristwa, juma reyix, jilïr yanapirinakamamp chik nayar tumpt'añama —sasa.

25Reyisti sänwa:

—Janiw wakiskaspati wawaxay, janiw taqpachan sarapkiristti, jumatak sinti ch'amäspawa —sasa.

Absalonax walpun achikt'askchïn ukasa, reyix janiw sarañ munkänti, ukampis aski waxt'äwip jupar churäna.

26Ukat Absalonax sarakïna:

—Jan wakiskchi ukaxa, Amnón jilaxakisay sarpan —sasa.

Reyisti jiskt'arakïnwa:

—¿Kunatarak Amnón jilaman sarañap muntasti? —sasa.

27Ukampis Absalonax achikt'askakïnwa, ukat reyix Amnonampiru, mayni wawanakapampir jupamp chik khithäna.

Absalonasti reyitakjam mä suma manq'äwi wakichayatayna,

28uywatanakaparusti sarakitaynawa: “Amnonar walpun amuyapxäta machantatäxani ukapachaw nayax sapxäma: ‘Jiwayapxam’ sasa, ukatsti jumanakax jiwayapxätawa. Jupar jiwayañ janiw axsarapxätati, nayaw sapxsma. Ukhamasti ch'amañcht'asipxam, jan axsarapxamti” sasa.

29Absalonan uywatanakapasti arunakaparjam phuqhasaw Amnonar jiwayapxäna. Uk uñjasasti reyin maynïr wawanakapax mulanakapar lat'xatasin jaltxapxäna.

30Jupanakax thakhinjam sarasipkäna ukapachasti, mayniw Davidarux yatiyxatayna: “Absalonax reyin taqpach wawanakaparuw jan maynin jiwayi” sasa.

31Uk ist'asinsti, reyix qunuñapat sartasin chuyma ust'ataw isinakap ch'iyanuqasïna, uraqiruw liwitattarakïna. Jupa chika ukankapkän uka jilïr yanapirinakapasti, isinakap ch'iyanuqasipxarakïnwa;

32ukatsti Davidan jilapa, Simá jaqin Jonadab yuqapax akham arsüna:

—Jach'a rey, jan amuyamti taqpach wawanakaman jiwaratapxa. Janiw taqini jiwarapkiti, jan ukasti Amnón saparukiw jiwayapxi, ukhampun Absalonax amtatayna, kunürutix Amnonax Tamar kullakapar waynaqkatayna ukürutpacha.

33Ukhamasti, jach'a rey, jan amuyamti taqi wawanakamas jiwaratäkaspa ukhama. Amnón sapakiw jiwata —sasa.

34Absalonan jaltañapkamasti, uñch'ukirit uskutäkän uka waynax, akatjamat walja jaqinakar uñjäna, Horonaim thakhi chiqa qullu irananjam saraqasinkiri. Ukat jupax reyir yatiyir saräna, Horonaim thakhinjam walja jaqinak saraqasinkir uñjkatayna uka.

35Jonadabasti ukapachaw reyir sarakïna:

—Reyixay, niyaw wawanakamax jutaski, naya luqtirimax sapunsmawa —sasa.

36Janïraw parlañ tukuykänti, ukkhaw reyin wawanakapax purintanxapxäna, ukatsti wali jach'at jachapxäna, wararipxarakïna. Reyisa, taqi yanapirinakapas walpun jachapxarakïna.

37-38Absalonasti jaltxänwa, Amiud jaqin Guesur markan reyipa, Talmai yuqapan ukaruw sarxäna, ukatsti kimsa maraw uka markankäna. Davidax sapüruw Amnón wawapan jiwatapat jachäna,

39chuymachasxän ukapachasti, walpun Absalón wawaparux uñjañ munäna.