JEREMÍAS 27 - Qullan Arunaka DC

Yuku tuqit amuyt'äwi

1Josiasan yuqapa Sedequiasax Judá uraqi apnaqañ qalltkän ukapachaw Tatitux Jeremiasar parläna,

2akham sasa: “Mä yuku lurasim, ukarusti ñach'antañanak uchantam, ukanaksti kunkamxarurak taqpach uchasim.

3Ukatsti kawkïr khithanakatix Sedequías reyir uñjir Jerusalén markar jutapkatayna ukanak tuqi mä iwxa apayarakim Edom, Moab, Amón, Tiro, Sidón markanakan reyinakaparu.

4Jupanakarusti reyinakapar yatiyapxañapatak sarakim; naya, taqi ch'aman Tatitu Israelan Diosapaw arsta:

5Nayaw jach'a ch'amaxampi aka uraqi lurta, jaqinaksa, taqi animalanaksa, ukatsti khitin apnaqañaptix munkirista ukaruw churarakirista.

6Jichhax walikiwa, nayasti taqi aka uraqinakxa, Nabucodonosor luqtirixan amparaparuw katuyta, jupasti Babilonia markan reyipawa, ch'uminkir animalanaksa juparurakiw katuyta.

7Taqi markanakasti jupampiru, wawapampiru, allchhipampiru katuyatawa, jupanakaw apnaqapxani, kunürutix markapar yaqha jach'a markanakampi, jach'a ch'aman reyinakampi apnaqatäñax wakt'kani uka urukama.

8Kawkïr markanakatixa, jan ukax reyinakas Nabucodonosor reyimpi jan apnaqayasiñ munkani ukanakarux, nayaw nuwasiñanakampi, mach'anakampi, kunayman usunakampi mutuyarakï, taqinis jupan apnaqatäñapkama. Naya, Tatituw uk arsta”.

9“Ukhamax jumanakax jan ist'apxamti uka profetanakaru, yatirinakaru, samkanak qhanañchirinakaru, layqanakaru, janiraki akat qhiparu kunanakatix luraskani ukanak yatiyañ munirinakarus ist'apxamti, jupanakasti Nabucodonosor reyir jan jaysapxañamatakiw ukham amtayasipktam.

10Kuntix jupanakax jumanakar sapktam ukanakax k'arikamakiwa, jumanakatix jupanakar ist'apxäta ukkhasti, yaqha markanakar katuntat apayatäpxätawa, uka markan jiwarapxarakïta.

11Ukampis kawkïr markatix Nabucodonosor, Babilonia markan reyipar jaysani ukanakarusti, nayax uraqipan qhiparayaskä, ukan jakasiñapataki, ukan yapuchasiñapataki. Naya, Tatituw uk arsta.”

12Naya, Jeremiasasti taqi uka arunak Judá uraqin Sedequías reyiparux yatiyta, ukatsa saskaktwa: “Jumanakatix jakañ munapxstaxa, Babilonia markankir reyiparu, ukhamarak jaqinakapar jaysapxam.

13¿Kunatarak jumasa, markamasa uka nuwasïwinakana, mach'anakana, kunayman usunakampi jiwarapxätasti? Tatitusti qhanak sawayi: kawkïr markanakatix Babilonia markan reyiparu jan jaysapkani ukanakarux taqi uka t'aqhisiñanakaw jutani.

14Jan ist'apxamti kawkïr profetanakatix Babilonia markan reyipar jan jaysapxañamatak amtayapktam ukanakaruxa, taqi uka parlatanakapasti k'arikamakiwa, sasa.

15Tatitusti sarakiwa: ‘Janiw nayax jupanakarux khithankti’ sasa, jupanakasti inakiw Tatitun sutipxar parlasipki. Uka k'ari profetanakax Tatitun jumanakar aka uraqit jaqunukuñapak munasipki, ukatsti uka k'ari profetanakasa, jumanakasa taqiniw jiwarapxäta” sasa.

16Ukatsti sacerdotenakampiru, taqi jaqinakampiruw parlarakta, jupanakarusti saraktwa: “Tatitux akham siwa: ‘Kuna yänaktix Tatitun utapat apapkatayna ukanakax jank'akiw kuttayanitäxani sasa parlxayapktam uka profetanakarux jan ist'apxamti. Uka parlatanakapax k'arikamakiwa.

17¡Jan jupanakarux ist'apxamti! Jan ukasti Babiloniankir reyir jaysapxam, ukapachakiw jakapxäta. ¿Kunatarak aka Jerusalén markasti mayjar q'ala t'unthapit uñjasispasti?

18Jupanakatix chiqpach profetäpxchi, ukat nayan arunakaxarak parlapxchi ukaxa, kawkïr yänakatix utaxana, Judá uraqin reyipan utapana, Jerusalén markansa jilt'atäski uka yänakax Babiloniar jan apatäñapatak naya, taqi ch'aman Tatitur mayipxitpan.’

19-21“Kunapachatix Nabucodonosor reyix Jeconías jaqin Joaquín yuqapar khititix Judá uraqin reyipäki ukar apkäna, ukatsti Judá uraqinkiri, Jerusalén markankiri taqi jilïr jaqinakapamp chika Babiloniar apanukkäna ukapachasti, uka jach'a pilaranaka, broncet lurat uma uskuñäki uka, Tatitun utapan kuna jila alan yänakatix utjkäna ukanaksti janiw apaskänti. Taqi ch'aman Tatitusti uka yänakatxa, kawkïrinakatix Jerusalenana, Judá uraqin reyipan utanakapansa jilt'kän uka yänakatxa akham siwa:

22‘Taqi uka yänakxa Babiloniaruw apasxapxani, ukatsti kunapachatix nayax wasitat aka chiqar kuttayanxañ munkä ukkhakamaw ukankarakini. Naya, Tatituw uk arsta.’ ”