JEREMÍAS 34 - Qullan Arunaka DC

Sedequías reyitak yatiyäwi

1Kunapachatix Babiloniankir Nabucodonosor reyix taqi markanakat jawsthapit ejercitopampi, jupax apnaqkän uka markanakampi Jerusalén markaru, ukhamaraki taqi uksa tuqinkir markanakar nuwantaskäna, ukapachaw Tatitux Jeremías profetar parlxayäna akham sasa:

2“Naya Tatitu, Israelan Diosapaw maysma, Judá uraqin Sedequías reyipar saniñamataki akham sasa: ‘Nayaw Jerusalén markxa Babiloniankir reyir katuyä, ninampi phichhantañapataki.

3Jumasti amparaparuw jalt'äta, ukatsti janiw qhispkätati; katuntapxätamwa ukatsti juparuw katuyapxätam, jupa nayraqatar uñstayatatsti Babiloniaru apayataw uñjasirakïta.

4Ukampis jichhax Sedequías reyi, ist'am, kuntix naya Tatitux siskäma uka arunaka: Janiw jumax espadampi jiwayatäkätati.

5Jan ukasti suma jiwa jiwäta, imäwimansti suma q'apkir qullanak q'aphichapxani, kunjämatix nayra awkinakaman imäwipan q'aphiyapxirïkäna ukhama, ukatsti jumat jachasaxa: “¡Ay tata!,” sapxarakiniwa. Naya, Tatituw uk arsta, aruxsa churarakta.’ ”

6Jeremías profetasti taqi uka arunak Sedequías reyirux Jerusalén markan yatiyarakïna.

7Ukchañkamasti Babilonia reyin soldadonakapax Jerusalén markaru, Laquis, Azeca sata uka markanakaruw nuwantasipkäna, kawkïr suma pirqanakampi muyuntata markanakatix Judá uraqin qhiparkatayna uka markanakaru.

Hebreo t'aqhisiyat uywatanakar antutxañ tuqit arust'äwin jan phuqhasitapa

8Tatitux wasitat Jeremiasar parlxayäna, kunapachatix Sedequías reyix t'aqhisiyatanakar antutxañatak mä arust'äwi Jerusalén markan jakir taqi jaqinakampi lurkäna uka qhipata.

9Uka arust'äwisti akhamänwa: Janipuniw khiti israelitasa marka masinakaparux t'aqhisiyañapäkänti, jan ukasti antutnukxañapänwa.

10Taqi jilïrinakasa, taqi jaqinakasa uka arust'äwirux walikiw sapxänwa, ukatsti t'aqhisiyatanakaparux antutnukxapxänwa, janirakiw maynis t'aqhisiyatäñataki qhiparkxänti.

11Ukampis jupanakax ukham t'aqhisiyatanakar antutnukxatatsti, walpun amtasipxäna, ukat wasitat uka t'aqhisiyatanakar jawsayasin luqtayasipxarakïna.

12Ukat Tatitux Jeremiasar parlxayäna, akham sasa:

13“Naya, Israelan Diosapaw nayra awkinakamampi Egipto markat apsunkta ukapachax, mä arust'äwi lurta, kunapachatix jupanakax t'aqhisiyata taqi kunsa lurapkäna ukapacha.

14Jupanakarux sarakïyätwa: Sapa paqallqu mara saraqatarusti, kawkïr hebreo jaqitix jupa pacha aljasi ukatsti suxta mara luqtaraki ukarux antutxapxätawa sasa. Ukampis nayra awkinakamax janiw nayarux ist'apkitänti, janirakiw jaysapkitänsa.

15Jumanakasti jichhürux sarnaqäwinakam mayjaptayxapxtawa, kunatix nayatakix askïki uk lurapxaraktaxa, marka masi t'aqhisiyatanakamaru antutxasaxa. Ukatsti nayatak satäki uka utan, naya nayraqataxan mä arust'äwiru mantapxtaxa.

16Ukampis jichhax qhiparuw kuttasipxtaxa, janiw uka arust'äwirux phuqhapktati, jan ukasti nayan sutixsa takisipxtawa, kawkïr t'aqhisiyatanakarutix jumanakax antutnukupkta ukanakarux wasitat t'aqhisitar tukuyas taqi kun lurayasipxtaxa.

17Ukat naya, Tatitux arsta: Jumanakax janiw nayarux ist'apkistati, kawkïr marka masinakamatix t'aqhisita taqi kun luras sarnaqasipki ukanakarusti janirakiw antutapktati; ukatpï jichhax nayax nuwasiñampiru, kunayman usunakampiru, mach'ampir antutkatapxämaxa, ukanakasti jumanakarux taqi aka markanakatakis wali axsarkañ tukuyapxätam. Naya, Tatituw uk arsta.

18-19Judá uraqina, Jerusalén markan jilïrinakapax, reyin utapan yanapirinakapampi, sacerdotenakampi, taqi jaqinakamp chikaw naya nayraqatan mä vaca qallu payar kharjasa, ukatsti uka taypi sarakipasawa mä arust'äwi lurapxäna. Ukampis uka arust'äwi takisipxänwa, janirakiw phuqhapkänti.

20Ukat jichhax nayax jiwayir uñisirinakaparuw katuyä, jiwat janchinakapasti jach'a jamach'inakana, montenkir animalanakan manq'añapatakïniwa.

21Judá markan Sedequías reyiparusa, taqi yanapirinakaparusa, jiwayir uñisirinakapan amparaparuw katuyarakï, Babiloniankir reyipan ejercitopan amparaparu, jichhasti uka ejercitox janiw Judá uraqirux nuwantkarakiti.

22Uka uñisirinakarusti wasitat aka markarux kutt'ayanirakï, ukatsti tukjayarakïwa, katuntasinsti ninampiw phichhantayarakï. Judá uraqinkir yaqha markanakarusti ch'usa wasarar jan jaqin tukuyarakï. Naya, Tatituw uk arsta.”