NÚMEROS 10 - Qullan Arunaka DC

Qullqit lurat trompetanaka

1Tatitux Moisesar sarakïnwa:

2“Qullqit pä trompetanak luram, martillomp liq'suta, ukampiw jaqinakar tantachthapïta, ukampiw sarxaruñatakis yatiyäta.

3Paypach trompeta phust'askan ukapachasti, taqpach markaw juma nayraqatan tantachasini, Tatitump Jikisiñ Carpa mantañana.

4Ukampis mä sapa trompetak phust'askani ukapachax, ayllunakan jilïr irpirinakapakiw tantacht'asini.

5Trompetanak phust'atxaru, jach'at arnaqasiñanakampïni ukkhasti, inti jalsu tuqin utjnuqtatäpki ukanakaw sarxarupxani,

6payïr phust'atxarusti, aynach tuqin utjnuqtatäpki ukanakaw sarxarupxarakini. Ukhamasti, trompetanak phust'atxar jach'at arnaqasiñanakampix sarxaruñatakïniwa.

7Jaqinakan tantachasiñapatakisti, trompetak phust'apxani, ukasti mä chimpüniwa.

8Aarón chachat saraqir sacerdotenakakiw trompetanak phust'apxani. Aka kamachinakax jumanakatak wiñayatakïniwa.

9“Nuwasïwi utjipantix, jumanakan nuwasir mistupxañam wakiskan ukapachasti, uka trompetanak phust'apxäta, ukatsti taqi ch'amamampiw art'asipxäta. Ukhamat naya, Tatit Diosamax jumanakat amtasï, ukatsti uñisirinakamat jumanakarux qhispiyapxäma.

10Kusisiñ urunakansa trompetanak phust'apxarakïta, uruyañ urunakansa, machaq phaxsi urunakansa, kunapachatix nakt'ayat luqtäwinaka, sumankañ wilañchanak luqtasipkäta ukapachasa. Ukhamat nayax jumanakat amtasipxäma. Nayaw jumanakan Tatit Diosamätxa.”

II. ISRAELITANAKAN KIMSA TUNKA MARA SARATAPAMPITA, CADÉS WASARAN UTJNUQTATAPAMPITA(10.11—21.35)Israelitanakax Sinaí wasarat sartawayapxi

11Tatitump Jikisiñ Carpa patxankkän uka qinayanakax, pä mara, payïr phaxsina, pä tunka uru saraqataruw unxtxäna.

12-13Ukürusti, israelitanakax kunjämtix Tatitux jupanakar Moisés tuqi arsuwaykatayna ukhamarjamaw sartasin uka qinayar arkapxäna, Sinaí wasarata, Parán wasarkama.

14Nayraqat sarantirinakax Judá ayllun wiphalapanïkän uka ejercitow sarantäna, jupanakan jilïripax Nahasón chachänwa, Aminadab chachan yuqapa.

15Isacar ayllun ejercitop nayraqatarusti Natanael sat Suar chachan yuqapaw sarantäna,

16Zabulón ayllun ejercitop nayraqatarux Eliab sat Helón chachan yuqapaw sarantäna.

17Ukapachasti, Tatitump Jikisiñ Carpa jararapxäna, ukatsti Guersón chachat saraqirinakampi, Merarí chachat saraqirinakampiw, uk apapxäna.

18Ukxarusti Rubén ayllun wiphalapanïki uka ejercitow sarantäna; jilïr irpiripax Elisur chachänwa, Sedeúr chachan yuqapa.

19Simeón ayllun ejercitop nayraqatarusti Selumiel jilïr irpiripaw sarantäna, Surisadai chachan yuqapa.

20Gad ayllun ejercitop nayraqatarusti, Eliasaf sat Reuel chachan yuqapaw sarantäna.

21Ukxarusti Quehat chachan saraqirinakapaw Tatitump Jikisiñ Carpan yänak apt'asit sarantapxäna. Utjnuqäwir puripxän ukkhasti, Tatitump Jikisiñ Carpax niyaw sayt'ayatäxäna.

22Ukxarusti Efraín ayllun wiphalapanïki uka ejercitow sarantäna, jilïr irpiripax Elisamá chachänwa, Amihud chachan yuqapa.

23Manasés ayllun ejercitop nayraqatarux Gamaliel sat Pedasur chachan yuqapaw sarantäna.

24Benjamín ayllun ejercitop nayraqatarux Abidán sat Guidoní chachan yuqapaw sarantäna.

25Tukuyarusti, mayni ejercitonakan qhipapatxa, Dan ayllun wiphalapanïki uka ejercitow sarantäna, jilïr irpiripasti Ahiézer chachänwa, Amisadai chachan yuqapa.

26Aser ayllun ejercitop nayraqatarusti Paguiel sat Ocrán chachan yuqapaw sarantäna.

27Neftalí ayllun ejercitop nayraqatarusti Ahirá sat Enán chachan yuqapaw sarantarakïna.

28Ukhamaw israelitanakan ejercitonakapax thakhinjam tam tama sarantapxäna.

Moisesax warmipan jilaparuw jupa chik sarañapatak jawsi

29Mä urusti, Moisesax warmipan jilaparuw jawsäna, ukasti Hobab satänwa, Reuel sat madianita chachan wawaparakïnwa, juparusti akham säna:

—Tatitux churapkitani uka uraqiruw nanakax sarasipkta. Jutam, nanakamp chik saram, nanakax sum uñjapxäma, Tatitux arupampiw arsu Israel markar munasiñamp uñjañataki —sasa.

30Ukampis Hobab chachax jupar sänwa:

—Janiw sarkiristti, nayax uraqixarukiw kuttxä, wila masinakax jak'aru —sasa.

31Moisesasti saskakïnwa:

—Jan jaytanukupxistati, jumax sum uñjtaxa kawkharutix wasaran utjnuqtapkirista ukxa, jumaw nanakar irpapxitasma.

32Nanakamp chikatix sarätaxa, kuna suma yänaktix Tatitux churapkitani ukanakat jaljt'asiñäni —sasa.

33Ukhamaw jupanakax Tatitun qullupat sartawayxapxäna, ukatsti kimsüruw sarapxäna. Tatitun arust'äwi arcapax jupanakan nayrap saräna, kawkharutix samart'apkaspa ukawja thaqhasa.

34Sarxarupkän ukapachasti, Tatitun qinayapax urun jupanakxankänwa.

35Arca apxarupkän ukkhasti, Moisesax sänwa:

“¡Tatituxay, sartasim!

¡Uñisirinakamax aywitatapxpan!

¡Jumar uñjasax uñisirinakamax jaltxapxpan!” sasa.

36Arcax sayt'kän ukkhasti, Moisesax sänwa:

“¡Tatay, Israel markar jan apanukumti,

wali mirantat markamar jan apanukumti!” sasa.