ÉXODO 27 - Qullan Arunaka DC

Broncet lurat altara(Ex 33.1-7)

1“Ukatsti acacia lawat mä altar luräta, uka altarasti cajonäñapawa, pusi thiyanakapax pä metro pä tunka phisqan centimetroni; sayarusti mä metro pä tunka phisqan centimetroni.

2Uka altaran pusi thiyapatakisti pusi waxranak luräta, ukanakasti altarampix mayakïñapawa, uka altarsti broncempiw lip'ikipayäta.

3Uka altaran apnaqañ yänakapax broncet luratkamakïñapawa: qhilla uchañanaka, lampanaka, jach'a qirunaka, achtayañanaka, nina sank'a uchañanaka.

4Ukxarusti broncet mä rejilla lurarakïta, uka rejillarusti bronce argollanak pusi esquinapar uchäta.

5Ukatsti altar thiya aynach tuqiruw uka rejilla uchäta, ukasti chikachika altar amsta tuqinkaniwa.

6Ukxarusti, acacia lawat pä muruq'u lawanak uka altaratakix lurarakïta, ukarusti broncempiw lip'suyäta.

7Uka muruq'u lawanakax argollanak taypir sut'untatäñapawa, altar purap thiyaru, ukhamat altar kallañataki.

8Uka altarax p'iyäñapawa, lawat luratarakïñapawa, kunjämtix qullun uñjktas uka kipkakïñapawa.

Tatitumpi Jikisiñ Carpan utänqapa(Ex 38.9-20)

9“Ukxarusti Tatitump Jikisiñ Carpatakix utänqap luräta. Ukasti aynach tuqirux lino k'anthitat lurat cortinanïñapawa, pusi tunka phisqan metro iranar janatatata.

10Pä tunka sayirinakapasa, pä tunka takxäsirinakapas broncet luratäñapawa, t'iriñanakapampi, anillonakapampisti qullqit luratäñapawa.

11Uka kipkaraki, amsta tuqirusti cortinanïñapawa pusi tunka phisqan metror janatatata, pä tunka sayirinakani, broncet lurat pä tunka takxäsirinakani, qullqit lurat t'iriñanakani, anillonakani.

12Inti jalanta tuqirusti pä tunka payan metro chikatani cortinanïñapawa, anqäx iranar janatatata, tunka sayirinakampi, tunka takxäsirinakampi.

13Inti jalsu tuqirusti, anqäx irananxa pä tunka payan metro chikatani cortinanïñapawa.

14Maysa tuqi mantañansti paqallqu metro cortinanïñapawa, kimsa sayirimpi, kimsa takxäsirimpi;

15maysäx thiyatsti, paqallqu metro cortinaraki, kimsa sayirimpi, kimsa takxäsirimpi.

16Carpa anqäxar mantañäki ukawjansti, llätunka metro cortinanïñapawa, morado telata, wila morado telata, wila telata, lino k'anthitata, wali suma p'itakipata, pusi sayirimpi, pusi takxäsirimpi.

17Carpa anqäx muyuntir sayirinakax qullqit lurat anillonakanïñapawa, qullqit lurat t'iriñanakani, broncet lurat takxäsirinakani.

18Carpan anqäxapax sayt'urux pusi tunka phisqan metronïñapawa, purap iranarusti pä tunk payan metro chikatani, alayarusti pä metro pä tunka phisqan centimetroni. Uka cortinanakax lino k'anthitat luratäñapawa, takxäsirinakapasti broncet luratäñaparakiwa.

19Qullan utjäwin yupaychañatak kuna yänakatix apnaqañatak wakiski ukanakasti broncet luratäñapawa, taqpach ch'akurunakapasa, carpa anqäxapan ch'akurunakapas broncet luratäñaparakiwa.

Lamparanak nakhayañ aceite(Lv 24.1-4)

20“Ukxarusti israelitanakar sarakim: lamparanakan jan jiwt'as sapür qhanayañapatakix suma oliva aceite apanipxpan.

21Aaronampi, wawanakapampiw Tatitump Jikisiñ Carpan arum paqar qhanañapatak uka lamparanak wakichani, arust'äwi lurat arca uñkatasinkki uka cortina qhipäxana. Aka kamachix israelitanakataki, wawanakapan wawanakapatakis wiñayatakïniwa.