ISAÍAS 58 - Qullan Arunaka DC

Chiqpach ayuno

1Tatitux situwa:

“Jan axsarasa, wali jach'at art'am,

kunkamax mä trompetäkaspas ukham art'asim;

Israel markaxarusti

jan wali luratanakapat juchañcham.

2Sapüruw thaqapxitu,

sarnaqäwinakax jikxatasasti k'uchikïpxiwa,

mä suma askinak lurir markäpkaspas ukhama,

kamachinakaxsa sumsa phuqhapkaspa ukhama;

chiqa kamachinak mayipxitu,

nayar jak'achasisinsti k'uchikïpxarakiwa,

3ukatsti sapxarakiwa:

‘¿Kunatakirak ayunañänisti?, Tatitux janixay uñjkchitixa.

¿Kunatakirak ch'am tukuskañänisti?, jupax janixay amuykchitixa’ sasa.

Ayunañ urunsti jumanakax aljasiñanakaruw uskusipxtaxa,

irnaqirinakamatsa ch'am q'al thalsupxtaxa;

4ayunañ urunxa jumanakax ch'axwañanakana,

jucha lurañanakan sarnaqapxtaxa,

jiwayañatakjamaw nuwantasipxtaxa.

Ukham ayunañ urunxa,

janiw nayax mayisitanakam ist'kiristti.

5Ukham ayuno lurañaxa,

nayatakix janipuniw kuna askïkisa.

Mä alir uñtataw p'iqinakam alintapxtaxa,

chhankha isinakampi isthapisisaw qhillxan ikipxtaxa.

Uka luräwiruw ‘Ayuno’ sapxtaxa,

‘Tatitutakisti aski uruwa sapxaraktawa’,

6chiqpachansa janiw ukax ukhamäkiti.

Kawkïri ayunotix kusisiykitu ukax akawa:

ina ch'usat katuntatanakar antutxañawa,

t'aqhisiyatanakar antutxañawa,

jan suman uñjañanak apanukxañawa;

7manq'at awtjatarux manq'a churañawa,

jan utaninakarusti utamar katuqañawa,

jan isinirux ist'ayañawa,

jaqi masirusti yanapt'añarakiwa.

8Ukapachaw qhanamax,

qhantati warawarar uñtat k'ajani,

usuchjatanakamas jank'akiw qullatäxani.

Chiqa kankañamasti juman nayraqatam sarani,

qhapaq kankañaxarakiw juman qhipamat arkanïtam.

9Jawsitäta ukkhax nayax ist'ämawa;

yanapa mayisisatix arnaqasïtaxa,

nayasti: ‘Akankasktwa’ sarakïmawa.

Jumatix khitirus jan t'aqhisiykäta,

mayninakarus janirak jisk'achkäta,

kuna k'ari arunaksa jan parlkäta,

10manq'at awtjatarus t'ant'am waxt'äta,

t'aqhisitanakarus yanapt'arakïta ukapachaxa,

ch'amak taypin qhantäta,

chika uru qhanar uñtataw qhantäta.

11Nayax jumarux irpaskapunïmawa,

wasaranxa manq'añ jilarkir churäma,

janchimarusti ch'amañcharakïmawa,

suma qarpata panqar yapjamaw tuküta,

uma jalsur uman phuqt'ataw tukurakïta.

12Markamasti nayra t'unjat pirqanak wasitat sayt'ayani,

nayra pacha uta qalltanak wasitat sayt'ayani.

Markamarusti ‘Liwisit pirqanak sayt'ayiri,

t'unjat utanak wasitat utachiri’ sasaw sutichapxani.

Sábado urut iwxt'anaka

13“Sábado urxa yäqapxapunim;

uka qullan uruxansti janipun kuna aljasiñanakansa sarnaqapxamti,

uka urusti jumanakatakix kusisiñ urüñapawa,

mä qullan urüñaparakiwa.

Uka urux Tatitur luqtat urüñapawa.

Ukham uka uruxarux yäqapxäta,

jan kuna aljasiñanakar uskusisa,

jan wali arunak jan parlasa.

14Ukhamtix phuqhätaxa, kusisiñ nayan jikxatäta.

Markanak irptir tukuyäma,

Jacob awkiman uraqip jumarux churäma.”

Pachpa Tatituw ukham arsu.