1 1 (2) Davidasti Nob tuqiruw sarxäna, Ahimélec sacerdoter uñjiri. Uka sacerdotesti wali mulljataw jupar katuqir mistunïna, ukatsti sarakïnwa:
—¿Kunjämarak sapaki juttasti, khitimpisay jutasamänxa? —sasa.
2 2 (3) Davidasti sarakïnwa:
—Reyix mä luräwi phuqhañatakiw khithanitu, nayax kuna iwxanaktix apankta ukanak janiw khitis yatiñapäkiti. Nayan apnaqat jaqinakarusti mayawjan jikisiñatakiw jawsayta.
3 3 (4) Manq'at walpun awtjitu, mä phisqa t'ant'aksay waxt'ita, jan ukax kuna manq'añakïpasaya —sasa.
4 4 (5) Sacerdotex sarakïnwa:
—Utjkitu uka t'ant'ax janiw aliqa t'ant'äkiti, jan ukasti Tatitur luqtatawa, ukampis juman jaqinakamatix warminakampi jan jak'achasis jakapxchi ukkhax churirismawa —sasa.
5 5 (6) Davidasti jan pächasisaw sarakïna:
—Nanakax nuwasiñankasax janiw warminakampix jak'asipkti. Aka jutäwix aliqa jutäwikïkchi ukasa, kunapachatix mistunipkta ukapachax jaqinakaxax q'umäsipkänwa, ukhamasti jichhax q'umakïsipkiwa —sasa.
6 6 (7) Ukatsti sacerdotex Tatitur luqtat t'ant'a Davidarux churäna, ukansti janiw yaqha t'ant'ax utjkänti, Tatitur luqtat t'ant'akiw utjatayna, uka pachpa urux junt'u t'ant'a uskuñatakix ukkhakiw altarat apaqasipkatayna.
7 7 (8) Uka urusti Saúl reyin mayni jilïripaw ukankäna, jupasti qullan chiqawjaruw qhiparatayna. Jupax edomita jaqïnwa, Doeg sutini, Saúl reyin awatirinakapan jilïripänwa.
8 8 (9) Davidasti Ahimélec sacerdoterux sarakïnwa:
—¿Mä lanzacha jan ukax mä espadacha utjtam? Reyin arsutapax sinti jank'akipunïnwa, ukat espadaxsa, yaqha nuwasiñ yänakaxsa jan apasinkti —sasa.
9 9 (10) Sacerdotesti sarakïnwa:
—Jïsa. Goliat jaqin espadap nayaw katuskta, kawkïr filisteorutix jumax Elá sat qhirwan atipjkäyäta ukan espadapax Efod sat isi qhipäxankaskiwa, mä isin llawt'ata. Munstax apasiskam, yaqha nuwasiñ yänakax janiw utjkituti —sasa.
Davidasti sarakïnwa:
—Churitaya, janiw ukat juk'amp sumax utjkaspati —sasa.
10 10 (11) Uka urusti Davidax Saúl reyit jaltxasax imantasiskakïnwa. Ukatsti Gat markan Aquís sat reyiru uñstiriw saräna.
11 11 (12) Aquís reyin jilïrinakapasti sapxarakïnwa:
—¡Akax Davidarakisä, aka uraqin reyipäki ukarakisä! Jupat jayllipxäna akham sasa: “Saúl reyix waranqa jaqinak jiwarayi, ukampis Davidax tunka waranqa jaqinak jiwarayaraki” —sasa.
12 12 (13) Davidasti uka arunak amukiw chuymapar katuqäna, ukat Gat uraqinkir Aquís sat reyirux axsaräna.
13 13 (14) Ukat jupanak nayraqatan uñnaqapax mayjt'äna, ukatsti luqhïkaspas ukhamaw kunar uñtat punkunakar qillqäna, lakapatsti llawsas inakiw jiskhasiskäna.
14 14 (15) Ukat Aquís reyix jilïrinakapar säna:
—Aka jaqin luqhïtap yatisinsti, ¿kunatakirak nayan nayraqataxar irpanipxtasti?
15 15 (16) Janiw nayax kuna luqhinaksa munkti utaxan luqhitasiskañapatakixa —sasa.
Who We AreWhat We EelieveWhat We Do
2025 by iamachristian.org,Inc All rights reserved.
