2 CRÓNICAS 13 - Qullan Arunaka DC

Abiam reyin Judá marka apnaqatapa(1 R 15.1-7)

1Abiam reyix kunapachatix Jeroboam reyix Israelan tunka kimsaqallqun mara marka apnaqkäna ukapachaw Judá markan apnaqañ qalltäna.

2Jupasti Jerusalén markan kimsa maraw apnaqäna. Taykapax Micaías satänwa, jupax Guibeá chiqankir Uriel chachan phuchhapänwa.

Abiam reyimpi, Jeroboam reyimpix, nuwasiñankapxänwa.

3Abiam reyix pusi patak waranqa ajllit soldadonakampiw nuwasiñ qalltäna. Jeroboam reyisti Abiam reyimpi nuwasiñatakix kimsaqallq patak waranqa ajllita soldadonak wakicht'arakïna.

4Nuwasiñax qalltkän ukkhasti, Abiam reyix Efraín qullunakankir Semaraim sat qullu patar sayt'asisaw akham art'asïna: “¡Jeroboam ist'ita, Israel markankirinaka ist'apxita!

5¿Janit jumanakasti yatipkta, Israelan Tatitu Diosapana, Davidaru ukhamarak saraqirinakapar wiñayatak Israel markar reyit apnaqañapataki, jan p'akintkaya arust'äwi lurasa katuykäna uksti?

6Ukampisa, Nabat chachan Jeroboam yuqapax, David reyin Salomón yuqapan uywiripatakiw sayt'asïna.

7Juparusti jan wali lurir jayra jaqinakaw jaqkattapxäna, ukatsti Salomón chachan Roboam yuqaparux atipjapxänwa, jupasti waynäskatap laykux janiw jupanakar saykatirjamäkänti.

8Jichhasti jumanakax Davidan wawanakap tuqi Tatitun apnaqata markapatakiw sayt'asiñ amtapxtaxa, jumanakan waljanïpxatam layku, Jeroboam chachax qurit vaca qallunak lurarapipktam jumanakan diosamäñapataki uka laykukiw sayt'asipxtaxa.

9¿Janit jumanakasti Aarón chachat saraqir Tatitun sacerdotenakaparu, levitanakar jaqunukusa, ukatsti kunjämtix Tatitur jan uñt'ir markanakax lurapki ukhama jumanakan munañamarjam sacerdotenak utt'ayasipktasti? ¡Khititix mä vaca qallumpi, paqallqu urqu ovejampi luqtasiñatak jutki ukarux k'ari diosanakan sacerdotepjam utt'ayapxtaxa!

10Ukampis nanakatakix Tatituw Diosaxaxa, janiw jupar apanukupkti. Kawkïr sacerdotenakatix Tatitur luqtapki jupanakax Aarón chachat saraqir wawanakawa, khitinakatix luräwinakampi phuqhapki jupanakax levitanakawa.

11Jupanakax willjtat jayp'ukamaw Tatiturux nakt'at wilañchanaka, inciensonak luqtapxi, ukatsti q'umachat mesa patar t'ant'anak uchapxi, sapa jayp'uw qurit lurat candeleron qhanki uka lamparanak naktayapxi. Nanakax kuntix Tatit Diosaxax sapkitu ukhamarjamaw phuqhapxta, ukampis jumanakax jupar apanukupxtawa.

12Amuyasipxam, jiwas nayraqatan Diosampi sacerdotenakapampiw ukankasipki, jumanakamp nuwasiñataki trompetanakan phust'asiñapatakix wakicht'atawa. Ukhamasti israelitanaka, janiy nayra awkinakaman Tatit Diosapampi nuwasipxamti, janiw atipjapkätati” sasa.

13Jeroboam reyix soldado tamanakaparux akatjamat Abiam reyin ejercitopar muyuntasin qhipäxat katuntañapatakiw khithäna, Jeroboam reyin jach'a ejercitopax Judá ejerciton nayraqatapankänwa, ukchañkamasti mä tama soldadonakax qhipäxat nuwantanipxäna.

14Kunapachatix Judänkirinakax qhipäx tuqiru uñtasipkän ukkhaxa, jupanakarux nayräxata, qhipäxat jalxatanipxatap amuyasipxäna. Ukat Tatitur art'asipxäna, sacerdotenakasti trompetanak phust'apxarakïna.

15Kunapachatix Judá markankirinakax nuwasiñatak art'asipkän ukkhaxa, Diosax Jeroboam reyiru, taqpach israelitanakaruw atipjäna, Abiam reyin nayraqatapana, Judá uraqinkir jaqinak nayraqatapana.

16Israelitanakasti Judá jaqinak nayraqatat jaltxapxänwa, Diosaw jupanakan amparaparux katuyxatayna uka layku.

17Abiam reyimpi jaqinakapampix walja jaqinakaruw jiwarayäna, ukansti israelita jaqinakatxa phisqa patak waranqa ajllita soldadonakaw jiwarapxäna.

18Ukhamaw khä urunxa, israelita jaqinakax jisk'achjata uñjasipxäna, Judá uraqinkir jaqinakasti nayra awkinakapan Tatit Diosapar katuyasitap laykuw wali ch'aman tukupxäna.

19Abiam reyix Jeroboam reyiruw arktäna, ukatsti Betel, Jesaná, Efraín uka markanak jisk'a markanakapamppach aparäna.

20Jeroboam reyisti, Abiam reyin jakañapkamax janiw munañanïkxänti. Qhiparusti Tatitux mutuyänwa, ukat Jeroboam reyix jiwxäna.

21Ukchañkamasti Abiam reyix wali ch'amaniw sayt'xäna. Jupax tunka pusin warminïnwa, yuqanakapax pä tunka payanïnwa, phuchhanakapasti tunka suxtanirakïnwa.

22Abiam reyin sarnaqäwipasa, taqi kunanaktix jakäwipan lurkäna ukanakasa, Iddo profetan qillqatapan qillqatawa.