SANTIAGO QALLTA ARUNAKA - Qullan Arunaka DC
QALLTA ARUNAKAAka qillqatan qalltäwipax khitirus apaykaspa ukham qillqatawa, ukatsti mä yatichäwir uñtatarakiw tukt'ayi. Aka qillqatasti aka uraqpachan ch'iqitatatäpkän uka Tatitur iyawsirinakar apayatawa. Aka qillqatax kunjämtix Cristonkirjam jakañäki ukxat parlistu, ukatsti ukham jakañan iyawsañan achupätapat parlarakistu; janitix uka suma luräwinakax mayni jaqin sarnaqäwipan uñacht'ayaski ukkhaxa, uka iyawsäwipax jiwatawa (2.14-26).Aka qillqat qillqirix Diosat jutki uka yatiñ kankañ jikxatapxañapatakiw iwxt'i, kunapachatix iyawsañax yant'atäki ukkhax uka yatiñ kankañax sinti wakiskiriwa, uksti iyawsañampi mayisisakiw jikxatañäni (1.1-8). Ukxarusti jan kunanïñxata, qamirïñxata, yant'anakxata, chiqpach Diosar arkañan suma luräwinakan uñacht'ayasitapxat parlarakistu (1.9-27). Ukhamarakiw taqinir khuskhat uñjañat iwxt'i (2.1-13). Ukxarusti laxran jan walïtapat parli, kunayman tuqit amuyt'ayasina, kuna jan walinaktix utjayki ukanakampita (3.1-12), ukat juk'ampis chiqpach yatiñ kankañxat parlaraki (3.13-18).Uka pachparakiw khitinakatix ch'axwanak utjayapki, akapachampi sumankapki, jilanakapatak taripir sayt'apki, inak irnaqayasir qamirinakarux qhuru arunakampiw iwxt'i (4.1—5.6). Llamp'u chuymanïñxata, Tatitur mayisiñxata, yaqha amuyt'äwi arunakampi iwxt'asaw qillqirix tukt'ayi (5.7-20).
