ISAÍAS 66 - Qullan Arunaka DC

Diosar jan kusisiykir yupaychäwi

1Tatitux siwa:

“Alaxpachax nayan qunuñaxawa,

uraqisti kayunakaxan takt'añapawa.

Nayan samart'añaxatakix

janiw khitis mä uta nayatak lurkaspati.

2¡Taqi akanak nayaw amparaxamp lurta,

taqi kunas nayankiwa!

Naya Tatituw uk arsta.

“Kawkïr jaqirutix nayax uñtkta ukaxa,

jan kunani, llakt'at sarnaqki,

arunakaxsa sum phuqkaraki uka jaqiwa.

3Ukampisa mä urqu vaca wilañcha luqtapki,

jaqirus jiwayasipkaraki ukham jaqinakaw utji;

mä ovejsa wilañcha luqtañatak kharinukupki,

ukamp chiksti anurus jiwayasipkaraki,

granonak luqtasasti, ukampi chikxa khuchhin wilapsa luqtasipki,

inciensonak q'uphichasasti,

k'ari diosanakarus yupaychasipkaraki.

Uka jaqinakax kuntix munapki ukhampun lurapxi,

ukham lurañ amtapxaraki.

4Nayarakiw jupanakatak t'aqhisiñ ajllï,

kuntix jupanakax wal axsarapki ukanak apayanï.

Kunapachatix jawskäyäta ukapachax janiw jaysapkitänti,

parlataxsa janirakiw ist'apkänti;

kuntix nayax jan munktxa uk lurapxäna,

kuntix nayarux phiñasiykitu uk lurañ ajllisipxäna.”

Taripäwimpi, qhispiyäwimpi

5Tatitun arunakap ist'apxam,

khitinakatix arunakap phuqhapkta ukanaka:

“Jumanakan yaqhipa marka masinakamaxa,

khitinakatix jumanakar uñisipktam,

nayan sutix aytasipxatam layku arknaqapktam,

ukanakasti sapxiwa:

‘Tatitux jach'a kankañap uñacht'aypan;

jumanakarusti k'uchik uñjañ munapxsma’ sasa.

Ukampis jupanakax mä p'inqa jisk'achjataw uñjasipxani.

6Mä jach'a aruw markat ist'asi,

wali jach'a aruw Tatitun utapat ist'asi,

uka jach'a arux pachpa Tatitun arupawa,

uñisirinakapar tuqintir arurakiwa.

7“Jerusalén markax akatjamat wawachasi,

janïra usuñapatak waytkataw wawachasi.

8¿Khitis ukar uñtasit arunak ist'ixa?

¿Khitich uka kipkak uñjarakixa?

¿Mä markax mä urunakti uñstaspaxa?

¿Mä markas mä juk'a pachanakcha uñstarakispaxa?

Jerusalén markasti mä urunak uñsti.

9Janiw nayax kunäkipansa

uka markan uñstañap jark'kiriskäyätti,

nayätwa jakañ churir Tatituxa.”

Arsutaxax ukhamapunïniwa.

10Tatitux siwa:

“Jumanakax Jerusalén markarux wal munasipxta,

jupamp chikaw jachapxta,

jichhax wal kusisipxam,

jupamp chikarak kusisipxam;

11jupasti mä taykjamaw jumanakarux

chuymachañampi uywapxätam,

uka chuymachasiñampi phuqt'atäpxañamkama.

12Ukatpï naya Tatitux sistxa:

Nayaw jupxarux sumankañ mä jawirar uñtat jutayä,

markanakan qamir yänakapasti,

mä jach'a jawirjamaw jupxarux jutani.

Jupaw jumanakarux manq'ayapxätam,

amparaparuw ichxart'asipxätam,

qunqurinakapxar qunt'ayasaw munart'asipxätam.

13Kunjämatix mä taykax wawaparux chuymachixa,

ukhamarakiw jumanakarux chuymachapxäma,

Jerusalenansti chuymachasiñ jikxatapxarakïta.”

14Kunapachatix jumanakax akanak uñjapkäta ukkhasti,

chuymanakamax kusisiniwa;

machaq ch'amanïpxätawa.

Tatitusti arkirinakap taypin ch'amap uñacht'ayani,

uñisirinakap taypinsti phiñasiñap uñacht'ayarakini.

15Tatitux nina taypinjam purinini,

carronakapasti mä tutuka thayar uñtatawa;

wali ch'amampiw phiñasiñap uñacht'ayani,

mutuyäwipasti aqkir ninjamäniwa.

16Jïsa, Tatitux ninampiw taripäwi lurani,

taqi akapacharusti espadapampiw uñjani,

waljanirurakiw jiwarayani.

17-18Tatitusti siwa:

“Khitinakatix panqar yapunakar mantasa

yaqha diosanakar yupaychapkta,

khitinakatix khuchhi aycha manq'apkta,

achakunakan aychapa,

jan ukax, yaqha q'añu animalanakan aychapsa manq'apkta,

ukanakax mäpita tukjatäpxätawa,

nayasti amuyunakamsa, luratanakamsa yatiraktwa.

“Ukapachasti naya kipkaw taqi jach'a markanakaru,

jisk'a markanakar tantacht'añatak jutä,

jupanakasti jutasin k'ajkir kankañax uñjapxani.

19Nayax mä chimpu churapxäma:

ukatsti yaqha markanakaruw khithapxäma,

Tarsis, Libia, Lidia,

Tubal, Grecia markanakaru,

ukhamarak quta tuqinkir jaya markanakaru,

uka markanakasti janipuniw nayxat parlir ist'apxirïkänti,

janirakiw nayan jach'a kankañaxsa uñjapxirïkänti;

uka khithatanakaw nayan jach'a kankañaxat markanakar yatiyapxani.

20Jupanakax taqi markanakat

jumanakan marka masinakamarux irpanxapxani,

yaqhipanakarux caballonakxata,

mayninakarusti carronakxata,

mulanakxata, camellonakxat kuna.

Jerusalén qullan qulluxanxa,

jupanakax nayatak mä waxt'äwjamäniwa,

kunjämtix Israelitanakax nayan utaxaru

q'uma qirunakar waxt'äwi apanipki ukhama.

Naya Tatituw ukham arsta.

21“Jupanakatsti yaqhipanakarux

sacerdotëpxañapatakiw ajllï,

yaqhipanakarusti,

Tatitun utapan yanapasirinak ajllirakï.

Naya Tatituw ukanak arsta.”

22Tatitux sarakiwa:

“Kunjämatix machaq alaxpachasa, machaq uraqisa,

kunanaktix nayax lurktxa ukanakax wiñayatakïnixa,

ukhamarakiw wawanakamasa, sutimas wiñayatakirakïni.

23Sapa phaxsi qalltana,

sapa sábado samarañ urunxa,

taqi jaqinakax nayraqatar killt'asiriw jutapxani.

Naya Tatituw uk arsta.

24“Kunapachatix markaxax misttankan ukkhasti,

khitinakatix nayatak sayt'asipkäna

uka jaqinakan jiwat janchinakap uñjapxani.

Ukanak manq'ir laq'unakasti janiw jiwapkaniti,

jupanakar nakhantir ninasti janipuniw jiwt'kaniti.

¡Taqi jaqinakatakisti wali axtaskañäniwa!”