JUECES 14 - Qullan Arunaka DC

Sansonan jaqichasitapa

1Sansonasti mä urux Timná markaruw saräna, ukatsti mä filistea tawaquruw uñtäna,

2utapar kuttasinsti, awkip taykaparuw yatiyäna. Jupanakarux sänwa:

—Nayax Timná markan mä filistea tawaquruw uñjanta, jichhasti sart'arapipxitaya, jupampiw jaqichasiñ munta —sasa.

3Ukampis awkip taykapax sänwa:

—¿Kunatarak jumasti uka filisteo jucharar jaqinak taypiru warmi thaqhir sartasti? ¿Janit warmix wila masinakas taypina, jan ukax israelitanak taypin utjkisti? —sasa.

Sansonasti sänwa:

—Uka tawaquruw walpun munta, nayan warmixäñapatak irpaqanirapipxita —sasa.

4Awkip taykapasti janiw amuyapkänti Tatit pachpa taqi kunsa ukhamäñapatak wakt'ayatapa, Tatitux filisteonakampi kunjämatsa nuwasiñ thaqhaskäna, uka urunakansti filisteonakaw israelitanakar apnaqäna.

5Ukhamasti, Sansonax awkipampi, taykapampiw Timná markar saräna. Kunapachatix Sansonax markan uva yapunakapar purkän ukkhaxa, mä leonaw warart'asis jupar jalxatäna.

6Ukapachaw Tatitun ajayupax Sansonar purïna, ukat mä cabritökaspas ukhamak leonarux jisk'a jisk'a tukjäna; ukampis ukxa janiw awkip taykaparux yatiykänti.

7Ukatsti sarasinxa, kawkïr tawaqurutix munkäna ukampiw parlanïna.

8Mä qawqha urunakatsti, kunapachatix Sansonax uka tawaqumpi jaqichasiñatak wasitat kutt'kän ukkhaxa, uka jiwat león uñjt'iriw thakhit saraqawayäna, jiwat leonxansti walja mamurayanakampi, mamurayanakan misk'i tapapampi jikxatäna.

9Misk'i apsuñatakisti amparampiw jat'süna, uk manqt'asisaw saräna. Ukat awkipar taykapar jikxatasin uka misk'i churäna, jupanakasti manq'asipxänwa, ukampis janiw kawkhat uka misk'i apsunitapsa jupanakar yatiykänti.

10Sansonan awkipasti tawaqun utaparuw saräna; Sansonasti ukan mä phuñchhäwi luräna, kunjämtix waynanakax lurapxirïki ukhamarjama.

11Filisteo jaqinakan Sansonar axsaratap laykusti, kimsa tunka waynanak jupan ukar irpapxäna, jupampi chika ukankapxañapataki.

12Sansonasti uka waynanakarux sänwa:

—Nayasti mä jiskt'a jiskt'apxäma. Aka paqallqu uru phuñchhäwintix uka chiqt'apxätaxa, nayax sapa mayniruw linot lurat suma isimpi, phuñchhäwir sarañ suma isimpi churapxäma.

13Ukampis janitix chiqt'apkätaxa, jumanakat sapa mayniw nayarux linot lurat suma isimpi, phuñchhäwir sarañ suma isimpi churapxitäta —sasa.

Jupanakasti sapxänwa:

—Jiskt'apxitaya nanakan yatxatañaxataki, nanakax taqiniw ist'añ munapxta —sasa.

14Ukatsti Sansonax sänwa:

“Manq'antirit manq'aw mistu,

ch'amanit misk'iw mistu” sasa.

Kimsa uru sarakipxipansti, waynanakax janiw uka jiskt'aru qhanañchirjamäpkänti;

15ukat pusïr urun Sansonan warmiparux sapxäna:

—Chachamar arsuyam, kuntix uka jiskt'apax sañ munki uka, jan ukasti jumampiru, awkiman wila masipampirux ninampiw phichhantapxäma. ¡Jumanakasti nanakarux yänakaxa apaqañ laykukjamakiw jawsapxistaxa! —sasa.

16Ukatsti jupax Sansonar uñjt'iriw saräna, ukatsti jacht'asisaw säna:

—¡Jumax janiw nayar munkistati! ¡Jumax uñisistawa! Marka masinakaxarux mä jiskt'anak chiqt'añatak churatätaxa, nayarusti janiw kunäkitix uk yatiykistati —sasa.

Sansonasti sänwa:

—Janiw nayax awkixarusa, taykaxarus uk yatiykti, ¿ukatti jumarux uk yatiyirisma? —sasa.

17Ukampis Sansonan warmipax paqallqu urpachaw phuñchhäwin chachap jak'an jachäna, ukham sinti jachir uñjasin chachapax juparu khuyapt'ayasaw kuntix uka jiskt'ax sañ munki uk yatiyxäna. Ukatsti warmipax jank'akiw marka masinakapar yatiyir saräna.

18Paqallqüri urusti, janïr intix jalantkipan, filisteonakax Sansonan ukar sarasin sapxäna:

“Janiw misk'it sipan juk'amp muxsax utjkiti,

janirakiw leonat sipan juk'amp ch'amanix utjkiti” sasa.

Sansonasti ukxaruw jupanakar säna:

“Jumanakasti vaca qalluxampi qhullisakiwa

uka jiskt'aru chiqt'apxtaxa” sasa.

19Ukatsti ukspachaw Tatitun ajayupax Sansonxar purïna; ukat Sansonax Ascalón chiqaru saräna, ukawjansti kimsa tunka jaqinakaruw jiwarayäna, ukanakat isinakap aparaniwayasin, ukampiw jiskt'anak chiqt'apkatayna ukanakarux arsutap phuqhäna. Uka qhipatsti wali phiñasitaw awkipan utapar kutt'xäna,

20Sansonan warmipasti mayni jilat masipar churatäxänwa.