RUT 4 - Qullan Arunaka DC

Booz chachax Rut warmimpiw jaqichasi

1Uka qhipatsti, Booz chachax markar mantañawjaruw qunt'asir saräna, kawkhantix jaqinakax aski amtäwinak parlakipañatak tantachasipxirïkän ukkharu. Uka pachasti kawkïr wila masittix Booz chachax parlkäna ukaw uka chiqanjam saraskarakïna, ukat Booz chachax jupar art'äna:

—Jutam, akawjar qunt'asim —sasa.

Uka wila masisti Booz chachan jak'apar qunt'asiriw jutäna.

2Ukspachaw Booz chachax markankir tunka aytat jilïr jaqinakar jawsäna, jupanakarusti ukawjaruw qunt'ayarakïna. Qunt'atäxapxäna ukkhasti,

3Booz chachax wila masipar sänwa:

—Noemí mamax Moab markat kutt'anxi, jupasti Elimélec wila masisan uraqip aljañ amti.

4Nayax uk jumar yatiyañ munsma, jumatix alasiñ munasmaxa, jichhpach alasim aka jilïr jaqinak nayraqatana. Elimélec chachan jak'a wila masipätam laykusti, uraqip alasxañamax wakt'tamwa. Jumatix jan alasiñ munkstaxa, nayar yatiyxita, jumxarusti nayaruw wakt'itu —sasa.

Uka wila masisti ukxarux sänwa:

—Alasïwa —sasa.

5Ukatsti Booz chachax qhanañchänwa akham sasa:

—Sum amuyt'asim, Noemí maman uraqiptix alasiñ munstaxa, moabita Rut ijma warmimpix jaqichasiñamarakiwa, ukhamat uka uraqix jiwirin sutipankaskañapataki —sasa.

6Uka arunak ist'asasti uka wila masix sänwa:

—Ukhamïpanxa janiw alaskiristti, janiw nayax wawanakaxar jan walir uchañ munkti. Ukampis jumatix alasiñ munstaxa, alasiskakim, kuna lurañatix nayar wakt'kitu uk jumaruw churxsma —sasa.

7Khä urunakanxa, Israel markan saranakaparjamaxa, kunapachatix maynix wila masi luräwinaka luraña mayniru churxi, jan ukax, mä kunsa aljañatak parlt'äwi jan phuqhaña munasinxa, lurañapa churxirïki ukax ch'ulla wiskhup apsusisin maynir churxirïna. Uka saranak phuqhañatakisti,

8Booz chachan wila masipax wiskhup apsusisin Booz chacharuw churxäna, akham sasa:

—Jumak alasiskam —sasa.

9Ukatsti Booz chachax, aytat jilïr jaqinakan nayraqatapan säna:

—Jumanakan uñjkataw jichhürux nayax Elimélec, Mahlón, Quelión chachanakan uraqipäkän uka uraqi Noemí mamat alasxta.

10Nayax Rut ijma warmimpiw jaqichasxarakï, ukhamat uka uraqix jiwir Mahlón chachapan sutipankaskañapataki. Ukhamasti janiw Mahlón chachan sutipax wila masinakap taypin chhaqtkaniti, aka markansa janiw sutipax armatäkaniti. Jumanakaw jichhürux taqi ukanak uñjapxista —sasa.

11Taqi ukankirinakasti arsupxarakïnwa akham sasa:

—Nanakaw taqi akanakat arsupxä. ¡Tatitusti munpan utamar mantkani uka warmix Raquel, Lea warminakjamäñapa, jiwasa israelit jaqinakax jupanakan wawanakapäpxtanwa! Jumasti, Belén markanxa, suma uñt'ata, aytat jaqirakïma.

12Tatitux walja wawanak uka warmitxa jumatak utjaypan. Utamankirinakas waljanirakïpan, kunjämatix Judá chachampin, Tamar warmimpin Fares yuqapan wawanakapax waljanïkäna ukhama —sasa.

13Mä juk'a pachatsti, Booz chachax Rut warmimpiw jaqichasxäna. Tatitun munañapatxa, Rut warmix usuriptxänwa, ukatsti mä yuqall wawa wawachasïna.

14Wawax yurkäna ukkhasti, Belenankir warminakax Noemí mamarux sapxänwa:

—¡Tatitux jach'añchatäpan, jupaw jichhürux mä allchhi apayantam, jumar uywañapataki! ¡Uka allchhimasti Israel markan wali aytat jaqïpan!

15Jupax kusisiyätamwa, taykäxäta ukkhasa khuyapt'ayätamwa, yuxch'aman wawapawa, jupasti jumarux walpun munastamxa, jumatakix wali askiwa, paqallqu wawat sipansa juk'ampi —sasa.

16Noemí mamasti wali munasiñampiw wawar ichxart'asïna, ukürut uksarux jupaw wawar sum uywäna.

17Ukham uñjasinxa, uta jak'ankir warminakax sapxänwa:

—¡Noemí mamax mä wawanïxiwa! —sasa.

Jupanakasti wawarux Obed sutimpiw uchapxäna. Obed chachax Jesé chachan awkipänwa, David reyin achachilaparaki.

Davidan nayra achachilanakapa

18-22Fares chachat saraqirinakasti akanakänwa: Hesrón, Ram, Aminadab, Nahasón, Salmón, Booz, Obed, Jesé, David, ukanaka.