JUECES 9 - Qullan Arunaka DC

Abimélec

1Gedeonan Abimélec yuqapax Siquem chiqaruw saräna, taykapan wila masinakapamp parliri, jupanakarusti sänwa:

2—Jiwasan wila masinakan sutipxaruw achikt'asipxsma, Siquem chiqankir jakirinakar amuyt'ayapxañamataki, mä jaqin apnaqatäñaw walïspa, janiw Gedeón awkixan paqallq tunka taqpach wawanakapamp apnaqatäñax walïkaspati —sasa.

3Abimélec chachax jupanakan wila masipänwa, ukat taqiniw jupar jaqkattasin Siquem jaqinakar amuyt'ayiri sarapxäna, juparu arkapxañapataki.

4Ukhamarus Baal-berit diosan utapat paqallq tunka qullqi apsusin Abimélec chacharuw churapxäna. Uka qullqimpisti Abimélec chachax wali qhuru jaqinak mink'äna, juparu arkapxañapataki. Uka jaqinakax jupampiw

5Ofrá sat markaru sarapxäna, kawkintix awkipax jakkatayna ukkharu, ukansti, uka qhuru jaqinakaxa, mä sapa qala patxarukiw Abimélec chachan paqallq tunka jilanakapar jiwarayapxäna. Jotam sata, Gedeonan sullka yuqapakiw imantasisin qhispïna.

6Uka qhipatsti Siquem chiqankiri, Bet-miló chiqankir jaqinakax, taqpachaniw Siquem chiqan utjkäna uka encina sat quqa jak'ana, axsarat qala jak'an tantacht'asipxäna, ukatsti Abimélec chacharuw reyit utt'ayapxäna.

7Jotam chachasti, Abimélec chacharu reyit utt'ayapxatap yatisinxa, Guerizim qulluruw makhatäna, ukawjatpach wali jach'at art'anïna, taqin ist'añapataki:

“¡Siquem chiqankir jaqinaka, wal ist'apxita! ¡Diosasti jumanakarux ist'arakpan!

8“Mä urux quqanakax reyinïñ munapxäna, ukatsti olivo quqaruw jupanakan reyipäñapatak mayipxäna.

9Ukampis olivo quqax janiw munkänti, jupax sänwa: ‘Quqanakan reyipäñaxatakix aceite utjayañ jaytxañaxäspawa, uka aceitex wali askiwa jaqinakampiru, Diosampir jach'añchañataki’ sasa.

10“Ukatsti quqanakax higo aliruw reyipäñapatak mayipxäna.

11Ukampis higo alix janiw munkänti, jupax sänwa: ‘Quqanakan reyipäñaxatakix suma muxsa higo achunak utjayañ jaytxañaxäspawa’ sasa.

12“Ukatsti quqanakax uva aliruw reyipäñapatak mayipxarakïna.

13Ukampis uva alix janiw munkänti, jupax sänwa: ‘Quqanakan reyipäñaxatakix vino utjayañ jaytxañaxäspawa, uka vinox jaqinakarusa, Diosarus kusisiyañatakiwa’ sasa.

14“Ukhamasti quqanakax mä ch'aphi aliruw jupanakan reyipäñapatak mayipxäna.

15Ukampis ch'aphi alix jupanakar sänwa: ‘Jumanakatix chiqpachan nayaru jumanakan reyimäñataki munapxstaxa, taqiniw ch'iwixa manqhir mantapxañama. Jan ukhamäkaspa ukasti, ch'aphi alit mä ninaw mistuni, uka ninasti Líbano chiqankir cedro quqanakaruw nakhantani’ sasa.

16“Jichhasti, nayax jumanakaruw jiskt'apxsma: ¿Jumanakax chiqpach chuymampit Abimélec chachar reyit utt'ayasipxta? ¿Jumanakax Gedeonat amtasisin, wila masinakaparux munasiñampit uñjapxta, kunjämtix jupax jumanakar khuyapt'ayañamp uñjapktam ukhama?

17Nayan awkixax jumanak layku nuwasisax, niyaw jakañapsa apt'asiwayi, kunapachatix madianitanakamp nuwasis amparapat qhispiyapktam ukkhaxa;

18ukampis jumanakax, awkixan wila masinakapatak sayt'asisax paqallq tunka yuqanakapsa mä sapa qalxarukiw jiwarayapxtaxa. Ukhamarusa, Abimélec chacharuw Siquem jaqinakan reyipat utt'ayapxta, tayka tuqit jumanakan wila masimätap layku.

19Ukampis jichhüruw nayax jumanakar sapxsma: Jumanakatix Gedeonarusa, wila masinakaparus suma chuymampi uñjapxstaxa, Abimélec chachax jumanakan kusisiñamäpan, jumanakasti jupan kusisiñapäpxarakim;

20jan ukhamäkaspa ukasti, ¡Abimélec chachat mä ninax mistpan, ukatsti Siquem, Bet-miló chiqankirinakar nakhantpan, jan ukax uka pä markanakat, ninax mistusin Abimélec chachar nakhantarakpan!” sasa.

21Uka arunak sasinsti, Jotam chachax jaltxänwa, Beer chiqar jakiriw sarxäna, Abimélec jilaparu axsaratap layku.

22Abimélec chachax kimsa maraw israelitanakarux munañapar apnaqäna,

23ukampis Diosaw Abimélec chachataki, Siquem markankiritakix mä ñanqha ajay uchäna, Siquem markankirinakan Abimélec chachatak sayt'asiñapataki,

24ukhamat Abimélec chachax Gedeón awkipan paqallq tunka yuqanakapa jiwarayatapata mutuyäwi katuqañapataki, ukhamaraki Siquem chiqankirinakasa yanapapxatap layku, mutuyäwi katuqapxañapataki.

25Siquem markankirinakat yaqhip jaqinakapax qullu patanakan imantasïna, uka jak'a thakhi saririnakarux jalxatasin yänakap lunthatapxirïna. Abimélec chachasti taqi ukanakat yatxatäna.

26Mä urusti, Ébed chachan Gáal sat yuqapax Siquem chiqaruw jilanakapampi saräna, uka markankir jaqinakampisti askit uñt'ayasïna,

27uka jaqinakasti uva apthapiriw pampar sarapxäna, uka uvat vino lurapxäna, ukatsti mä jach'a phuñchhäwi lurapxäna, diosanakapan utapan manq'asa, umasa, Abimélec chachar ñanqhachasa.

28Gáal chachasti sänwa: “¿Abimélec jaqisti, khitïtaparak amuyaspachasti? Jupax Gedeonan yuqapakïchixaya, yanapiripax Zebul jaqiwa. Jiwas Siquem markankirinakasti, ¿khitïpxaraktan jupanakan t'aqhisiyat sarnaqañasatakisti? Jiwasax Hamor chachan luqtiripäñasawa, jupaw Siquem marka utt'ayirixa, janiw Abimélec chachan luqtiripäñasäkiti!

29¡Nayatix jumanakan jilïrimäristxa anchhichpachaw Abimélec chachar alisnukurista!” Jupar siristwa: “¡Abimélec, saram, soldadonakam tantacht'am ukatsti nayampi nuwasir jutam!” sasa.

30Kunapachatix marka apnaqiri Zebul jilïrix Gáal chachan parlatap ist'kän ukkhaxa, wal phiñasïna,

31ukat jupax Abimélec chacharu mä yatiyäwi apayäna, jupasti Arumá chiqankaskänwa, akham sasa: “Ébed chachan Gáal yuqapax jilanakapampiw Siquem markar purinipxi, ukatsti jaqinakaruw amtayaski, jumar saykatañataki.

32Ukhamasti jumax, jichha arumpacha soldadonakamampi mistuwayasin pampar imantasipxam.

33Willjtarusti inti jalsunkipan markar katuntam, kunapachatix Gáal chachax jaqinakapampi nuwasiñatak mistunipkani ukkhaxa, jumax kunjämtix jupar lurañ munkta ukham luram” sasa.

34Ukhamaw Abimélec chachax jaqinakapampi uka arumax mistüna, ukatsti pusi tamar t'aqjtasaw Siquem jak'ar imantasipxäna.

35Gáal chachax marka punkur mistunkän ukkhaxa, Abimélec chachampi jaqinakapampix imantasipkän ukawjat mäkiw mistunipxäna.

36Jupanakar uñjasasti, Gáal chachax Zebul chacharux sänwa:

—¡Uñtam, qullu patanakat jaqinakaw saraqtasinki! —sasa.

Zebul chachasti sänwa:

—Janiw jaqïkiti, qullunakan ch'iwipäskiwa, ukakiw jumatak jaqjam uñtasi —sasa.

37Ukampis Gáal chachax saskakïnwa:

—¡Sum uñtam! ¡Walja jaqinakaw ‘Aka uraqin kururupa’ satäki uka qullut saraqasinki! ¡Yaqha tamasti, yatirinakan Encina quqapar sarki uka thakhinjam jutasipki! —sasa.

38Zebul chachasti sänwa:

—¡Jichhax arsumaya! ‘Abimélec chachax khitisa jiwasan jupar luqtañataki’ saraktasä. Ukaxay ejercitoxa, jumatakix janjamakiw kunäkänsa. ¡Jichhax mistumaya jupanakamp nuwasiri! —sasa.

39Gáal chachasti Siquem chiqankir jaqinak nayraqatapan, Abimélec chachamp nuwasiriw mistuwayäna.

40Abimélec chachax arktänwa, Gáal chachasti jupat jaltxänwa. Marka punkunakamppachan jiwaratanakax utjäna.

41Abimélec chachax Arumá chiqaruw qhiparxäna, Zebul chachasti Siquem markat Gáal chachampiru, jilanakapampiruw alisnuküna.

42Qhipürusti Siquem markankirinakax pamparuw mistupxäna. Abimélec chachasti uk yatisinxa,

43ejercitop kimsa tamaruw t'aqjäna, ukatsti pamparuw imantasïna; ukat kunapachatix Siquem markankirinakaru mistsuniri uñjkän ukkhaxa, jupax imantaskän ukawjat mistsunisin jupanakarux katuntäna.

44Abimélec chachampi, tama jaqinakapampiw marka punku katuntasipxäna, ukchañkamasti maynïr pä tama jaqinakax pampan sarnaqirinakaruw katuntasin jiwarayapxäna;

45uka urusti Abimélec chachax Siquem marka katuntañkamaw nuwasïna. Katuntasinsti, uka marka q'alpun tukjäna, jaqinakapsti taqpach jiwarayäna, ukatsti uka markarux jayumpiw phawantäna.

46Siquem pukarankirinakasti, kuntix Abimélec chachax lurkatayna uk yatisinxa, El-berit sat yupaychañ utar imantasiriw sarapxäna.

47Abimélec chachasti, taqpachani ukawjan tantachasipxatap yatisax,

48taqi jaqinakapampiw Salmón qullur makhatäna, ukatsti hachampiw quqan mä laymip phat'aqäna; ukatxa kallachipxaruw uk uchasïna, jaqinakaparusti sänwa: “Kunjämtix nayax lurkta, ukhamarak jumanakax jank'ak lurapxam” sasa.

49Taqiniw quqa layminak jank'ak phat'aqasin, yupaychañ utakam Abimélec chacharux arkapxäna, purisinsti, ukawjan layminak phint'asinxa ninampiw phichhantapxäna, ukhamat Siquem pukaran imantasiri chachanakaru, warminakaru jiwarayasa, taqpachanix niya waranqänwa.

50Ukatsti Abimélec chachax Tebés chiqaruw sarantäna, wakicht'asisinsti uka markar nuwantasaw katuntäna.

51Uka marka taypin mä pukaraw utjatayna, ukarusti uka markankiri chachanaka, warminaka taqiniw imantasipxäna. Punkunakap sum jist'antasasti pukar pataruw mistupxäna;

52ukampis Abimélec chachax pukara punkukamaw purïna, ukat tukjäna. Ninampi phichhantañatakiw wakicht'asïna,

53ukapachaw mä warmix molino qalampi jaqt'anïna, uka qalasti Abimélec chachan p'iqipar purisin p'iqi ch'iyantäna.

54Abimélec chachasti ukspachaw yanapiriparux jawsäna, ukatsti sänwa: “Espadam apsusim ukat jiwayita, janiw nayat ‘Mä warmikiw jiwayi’ sapxañap munkti” sasa. Uka yanapiripasti iyawsasaw espadapampi chhuqhuntäna, ukhamaw Abimélec chachax jiwxäna.

55Israelitanakax Abimélec chachan jiwatap yatisinxa, utanakaparuw kutt'xapxäna.

56Diosasti uka tuqiw Abimélec chacharux mutuyäna, awkipataki sayt'asisin, paqallq tunka jilanakapar jiwarayatap layku.

57Ukhamarakiw Diosax Siquem chiqankirinakarux jaqinak jiwayatanakapat mutuyäna. Ukhamaw Gedeón chachan Jotam yuqapan ñanqhachäwipax jupanakampi phuqhasïna.