1 SAMUEL 19 - Qullan Arunaka DC

Saúl reyix Davidar jiwayañ amti

1Saúl reyix Jonatán yuqapampiru, taqi jilïrinakapampirux Davidar jiwayapxañapatakiw arsüna. Ukampis Jonatanan Davidaru wali munatap laykux

2nayraqat juparuw yatiyäna. Sarakïnwa:

—Saúl awkixax jumar jiwayañ amtaski. Ukhamasti qharüru willjtax wal amuyasim, ukatsti mä jamasa chiqawjaru imantasxam.

3Nayax awkixamp chikaw mistü, kawkhankkätatix jumax ukkharu. Ukatsti jumxat jupamp parlarakï, kamsakchiniya, ukat kuntix siskani uk yatiyxarakïma —sasa.

4Jonatanasti Saúl reyimpix Davidat arxatasisaw parläna. Juparusti sänwa:

—Jumasti munañan rey, janiw David luqtirimarux kuna ñanqhsa lurañamäkiti, jupax janiw kuna ñanqhsa juma munañan reyirux lurktamti, jan ukasti askinak lurtamxa;

5filisteo jaqir jiwayañatakix jakañapsa apt'asirpachänwa, ukhamat Tatitux taqi israelitanakar qhispiyi. Juma munañan reyix ukham uñjasax kusisïyätawa. Ukhamasti, ¿kunatarak juma munañan reyisti jan juchani Davidar jiwayasin juchañchjasiñ muntasti? —sasa.

6Saúl reyisti Jonatán yuqapar amuyumpi parlatap ist'asaxa, jach'at arsurakïna:

—Tatitun sutipxaruw juramentompi arsta, janiw Davidax jiwkaniti —sasa.

7Ukhamasti Jonatanax Davidar jawsasinxa, kuntix Saúl reyimpi parlkatayna taqi ukanak yatiyäna. Ukatsti Saúl reyin ukaruw irpäna; Davidasti Saúl reyirux yanapaskakïnwa, kamisatix nayrax luqtirïkän ukhama.

8Ukatsti wasitat nuwasiñax qalltäna, Davidasti filisteonakampi nuwasiriw mistüna, ukat q'ala tukjasinsti chhuktayañkamaw atipjäna.

9Saúl reyirusti Tatitun khithanita ñanqha ajayux wasitat t'aqhisiyäna; utapana lanzap ayt'ata qunt'atäkasinsti, Davidan arpa toct'añapkamaw,

10jupax lanzampi jaqt'asin pirqar chhuqhuntañ munäna, ukampis Davidax maysaruw jitjtäna. Saúl reyin lanzapasti pirqarukiw chhuqhuranttäna. Uka arumpachaw Davidax jaltxäna.

11Ukatsti jank'akiw Saúl reyix luqtirinakapar Davidan utapar khithäna, jupar qhamiyasin qhipärmanthix jiwayapxañapataki. Ukampis Davidan Mical warmipax nayraqat yatiyxäna, akham sasa:

—Janitix jichha arumpacha imantaskät ukaxa, qharüru qhantatix jiwayataw uñjasïta —sasa.

12Ukspachaw Mical warmix Davidar mä ventana chiq warkuqxäna, ukhamat Davidax jaltxäna.

13Ukatsti Mical warmipax jank'akiw mä ídolo katusin ikiñapar ikintayäna, ch'ijmañarusti cabrito t'awrat p'itata usküna, ukarusti mä isimpiw janxatarakïna.

14Kunapachatix Saúl reyix jaqinakaparu Davidar katuntapxañapatak arskän ukkhasti, Mical warmipax uka jaqinakarux “usutawa” sarakïnwa.

15Ukampisa Saúl reyix Davidar thaqhir sarañatakix jaqinakaparuw khithanuküna. Ukatsti sarakïnwa:

—¡Ikiñankaskpasaya, katjanipxam, akar puriyanirapipxita, nayan jupar jiwayañaxataki! —sasa.

16Saúl reyin jaqinakapasti Davidan utapar mantasinxa, ikiñapan mä idolok jikxatapxäna, cabrito t'awrat p'itatampi ch'ijmt'ata.

17Ukat Saúl reyix Mical warmirux sarakïna:

—¿Kunatarak ukham k'arintistasti, uñisirixan jaltxañapatakisti? —sasa.

Mical warmisti sarakïnwa:

—Jupax juramentompiw arsüna nayar jiwayañataki, janitix jupar jaltaykiriskäyäta ukkhaxa —sasa.

18Davidax ukham jaltxäna. Ukatsti Ramá chiqaruw Samuelur uñjir saräna, kuntix Saúl reyix juparu lurkän ukanak yatiyarakïna. Ukatsti Davidampi, Samuelumpix Naiot chiqaruw jakir sarxapxäna.

19Saúl reyisti Ramá chiqankir Naiot tuqin Davidan jikxatasitap yatisinxa,

20jupar katuntañatakiw jaqinakapar khithäna. Purisinsti, Saúl reyin khithat jaqinakapax mä tama profetanakaruw profecía arunak arsuskir uñjapxäna, Samuel profetaw jupanakar sarayaskarakïna. Ukat jank'akiw Tatitun ajayupax Saúl reyin khithat jaqinakaparux katuntäna, jupanakasti uka profetanakjamarakiw parlapxäna.

21Saúl reyisti ukanak yatisinxa, yaqha jaqinakamp khithäna, jupanakasti mayni khithanakjamarakiw profetanakjam parlapxäna. Kimsïri kutimpi Saúl reyix jaqinakarux khithaskakïnwa, jupanakarusti kunatix mayninakampi luraskatayna, uka kipkarakiw lurasïna.

22Ukatsti Saúl reyix jupa kipkaw Ramá chiqaru saräna. Secú siski ukkhan mä jach'a uma qhuthañar purisinxa, Samuelumpita, Davidampit jiskt'asïna. Juparusti Ramá markankir Naiot chiqan jikxatasipxatap yatiyapxäna.

23Saúl reyisti uka chiqaruw saräna. Ukampis Tatitun ajayupaw juparus katuntarakïna, Saúl reyisti, Ramá markankir Naiot chiqar sarañ thakhin profetanakjam parlasisaw saräna;

24ukhamarusa isinakap apsusïna, ukatsti q'alalpachaw Samuel nayraqatan mä urumpi, mä arumampi profetjama parläna, ukat mä säwix utji: “¿Saúl reyix mä profetäxarakichä?” sasa.