1 SAMUEL 6 - Qullan Arunaka DC

Filisteonakax Diosan arust'äwi arcap kutt'ayxapxi

1Tatitun arust'äwi arcapax paqallqu phaxsiw filisteonakan uraqipankäna.

2Filisteo jaqinakasti, sacerdotenakaparu, yatirinakaparuw jiskt'añatak jawsayapxäna:

—¿Kuns lurapxirista Tatitun arust'äwi arcapampixa? Sapxita, ¿kunjämatsa utjäwipar kuttayxapxiristxa? —sasa.

3Jupanakasti sapxänwa:

—Jumanakatix Israelan Diosapan arust'äwi arcap kutt'ayañ munapxstaxa, jan ukhamak kutt'ayapxamti, jan ukasti, Tatiturux waxt'äwinak luqtapxam, khuyapayasiñapataki. Ukatsti jumanakax k'umarakiw jikxatasxapxäta, ukhamat amuyapxäta kunatsa uka jan walt'äwinakax juti ukxa —sasa.

4Filisteonakasti jiskt'apxarakïnwa:

—¿Kuna waxt'äwirak khuyapayasiñapatak luqtapxiriststi? —sasa.

Sacerdotenakasti sapxänwa:

—Qurit lursupxam: janchi ch'uphunakar uñtata, ukasti phisqäñapawa, ukhamaraki phisqa achakunaka; ukanakasti qawqhanitix filisteo jaqinakan jilïrinakapax utjki ukhamarjama, niyakixay jumanakasa, jilïrinakamasa uka pachpa mutuyäwimpi t'aqhisipxstaxa.

5Uka layku, jichhax qurit uka ch'uphunak lurapxam, ukhamarak markas t'unjkis uka achakunakar uñtasitanaka, ukatsti Israelan Diosapar jach'añchapxarakim, inampis jumanakarusa, diosanakamarusa, uraqinakamarus jan mutuykxapxiristamti.

6Janiy jumanakax Egipton reyipjama, jaqinakapjamas tukupxamti. Jupanakax chuymanakap qalarayasipxäna, ukatsti kunapachatix Diosax ch'amampi mutuykän ukkhakiw faraonax israelitanakar Egiptot sarxapxañapatak antutäna.

7Ukhamasti mä machaq carreta lurayapxam; ukatsti qalluni pä vacanak ajllipxam, uka vacanakasti janiw kunapachas yukumpi yapt'atäñapäkiti, ukatsti uka carretar yapkatapxam; qallunakapasti janiw jupanak chik sarapxañapäkiti, jan ukasti vaca uyur jaytawayapxam.

8Ukatsti Tatitun arust'äwi arcap carretxar apxatapxam, kuna yänaktix khuyapayasiñapatak qurit lurapkta ukanakxa mä cajonar uchapxam. Ukatsti uka carretarux sapak sarañapatak antutnukupxam.

9Ukampisa wal uñch'ukipxam: uka carretatix Bet-semes tuqir saranixa, Israelan Diosapax jiwasar mutuyatap yatiñäni, janitix uka uraqip tuqir sarkani ukkhaxa, mutuyäwisax Israelan Diosapat jan jutatap yatirakiñäni, jan ukasti mä jan walt'añaki jiwasxar jutatapa.

10Ukatsti filisteonakax ukham lurapxäna. Uka carreta qatatiñatakix pä vacanak irptanipxäna, jisk'a vaca qallunakapsti, vaca uyuruw jist'antapxäna.

11Ukatsti Tatitun arust'äwi arcap carreta patxaruw apxatapxäna, qurit lurat yänaksti mä cajonar uskt'asaw apxatapxarakïna, ukatsti vacanakan uka carreta qatatiñapatakiw antutt'apxäna.

12Vacanakasti Bet-semes sata thakhinjam warart'asisa chiqak sarapxäna, thakhit jan kawksarus saraqasa. Filisteonakan jilïrinakapasti qhipapat arkapxäna Bet-semes uka qurpakama.

13Bet-semes chiqan utjasirinakasti trigo apthapisipkäna, kunapachatix Tatitun arust'äwi arcap uñjapkän ukkhaxa, wal kusisipxäna.

14Kunapachatix uka carretax Bet-semes chiqan Josué chachan uraqipar purkän ukkhasti, ukkharuw sayt'äna. Ukansti mä jach'a qalaw utjäna, ukatsti jaqinakax uka carretan lawanakapat phäña wakt'ayasax Tatituruw uka vacanak nakt'ayas luqtapxäna.

15Levitanakasti Tatitun arcap apaqxapxänwa, kawkïri cajantix qurit lurat yänakax utjkän ukanakamppacha, mä jach'a qalxarurakiw uchapxäna; uka urusti Bet-semes chiqan utjasirinakax wilañchanakampi, nakt'at waxt'äwinakamp Tatiturux luqtapxäna.

16Ukanak uñjasinsti, filisteonakan uka phisqa jilïrinakapax ukürpachaw Ecrón markar kutt'awayxapxäna.

17Kawkïr qurit lurat phisqa ch'uphunaktix filisteonakax pantjasitapat Tatitur luqtapkäna ukanakaxa, Asdod, Gaza, Ascalón, Gat, Ecrón uka markanakatänwa,

18qurit lurat achakunakasti filisteonakan phisqa jilïripan markanakapax qawqhäkäntix ukkharakïnwa, pirqanakamp muyuntat markanakasa, jan pirqamp muyuntat jisk'a markanakas jakthapitänwa. Kawkïr jach'a qala patxarutix Tatitun arust'äwi arcap uchapkäna ukax jichürkamaw Josué chachan uraqipankaski Bet-semes sat chiqana.

19Tatitusti Bet-semes chiqan utjasir paqallq tunka chachanakaruw jiwarayäna, Tatitun arcap uñantapxatap layku. Uka markankirinakasti ukham uñjasax walpun jachapxäna.

20Ukatsti Bet-semes chiqan utjasirinakax sapxarakïnwa: “¿Khitirak Qullan Dios Tatitu nayraqatar uñstaspasti? Jichhasti, ¿kawkirurak Tatitun arcap apayañänisti?” sasa.

21Uka jak'an mä jisk'a markaw utjäna Quiriat-jearim sutini. Ukatsti uka markankirinakar yatiyiriw khithapxäna: “Filisteo jaqinakax Tatitun arust'äwi arcap kutt'ayanxapxiwa, jichhax uka arca apasxañatak jutapxam” sasa.