1 SAMUEL 24 - Qullan Arunaka DC

1 1 (2) Saúl reyix filisteonakar arktäwit kutt'anxän ukkhasti, juparux Davidan En-gadi wasarankaskatap yatiyapxäna.

2 2 (3) Saúl reyisti Israel markat kimsa waranqa jaqinak ajllïna, ukatsti Davidampiru, jaqinakapampir thaqhiriw jach'a qarqanak tuqir saräna.

3 3 (4) Sarkasinsti mä oveja uyunakawjaruw purïna. Uka jak'ansti mä putuw utjäna, ukan Davidampi jaqinakapampix imantasitäsipkäna. Saúl reyisti uka puturux yaq'art'iriw mantäna,

4 4 (5) Davidan jaqinakapasti juparux sapxänwa:

—Chiqpachansa jichhüruw phuqhasi kuntix Tatitux sisktam: “Uñisirimarux amparamaruw katuyäma, jupampix kuntix munkta uk luräta” —sasa.

Ukhamasti Davidax sartasin wali amuyumpiw Saúl reyin isipat mä jisk'a khuchhuqäna;

5 5 (6) ukampis ukham luratapatxa walpun chuymap usuyasïna,

6 6 (7) ukat jaqinakaparux sarakïna:

—¡Tatitux nayan reyixatak amparax jan aytaykitpati! ¡Tatituw jupan reyïñapatak chhijllasi! —sasa.

7 7 (8) Ukhamat Davidax jaqinakaparux jarkt'äna, janirakiw Saúl reyirux llamkt'aykänti, Saúl reyisti putut mistusin sarawayxäna.

8 8 (9) Ukampis Davidax qhipapat uka putut mistunirakïna, ukat jach'at art'äna:

—¡Munañan rey, munañan rey! —sasa.

Saúl reyisti kutikipstasin uñtasini, ukatsti Davidax wali axsart'añ chuymampiw uraqkam alt'äna,

9 9 (10) sarakïnwa:

—¿Kunatakis jaqin arunakapar yäqta, khitinakatix Davidax jumar jan wal lurañ amtaski ukham parlirinakarusti?

10 10 (11) Jach'a munañan rey jumapachaw yattaxa; Tatitux khaya putun jumaru amparaxar katuykchitän ukasa, janiw nayax juma munañan reyirux jiwayañ munkäyätti, ukat sarakïyäta: “Jupax munañan reyiwa, Tatituw juparux chhijllasi” sasa.

11 11 (12) “¡Jach'a munañan rey, kunatix amparaxankki uk uñjam! Naya pachpaw isimat mä jisk'a khuchhuqta. Ukampix jumax munañan rey amuyxasmaw janiw nayax jiwayañ munksmati, janirakiw juma reyirux kuna jan walsa lurksmati. Ukampis jumax, jiwayañatakiw nayar arknaqista.

12 12 (13) ¡Jichhasti Tatituy jiwasa paninirux taripistpan, jiwasan jan wali luratanakas uñjarakpan! Ukampisa nayax janipuniw juma reyitakix amparax aytkäti.

13 13 (14) Nayra pacha mä säwix siwa: ‘Ñanqha lurañax ñanqha jaqinakat juti’ sasa. Uka layku nayax janipuniw juma reyitakix amparax aytkäti.

14 14 (15) Ukampisa, ¿khitin qhipapsa Israelan reyipax mistuni? ¿Khitirus arknaqaski? ¡Nayaruwa, nayax mä jiwat anur uñtatätwa, mä k'utir uñtatarakïtwa!

15 15 (16) Uka layku, Tatitukiy jiwas paninirux taripistpan; ¡juparaki nayarus uñjitpan, ukhamarak juma reyitsa arxatitpan!” —sasa.

16 16 (17) Kunapachatix Davidax parlañ tukuyxän ukkhasti, Saúl reyix jach'at art'asïna:

—¡David, wawaxa, juma pachparakis parlaskistaxä! —sasa.

Ukatsti jacht'asisaw

17 17 (18) Davidarux säna:

—Chiqpachansa wali sum lurtaxa. Jumaru jan wali lurataxatsti nayarux askimpiw kutt'ayista.

18 18 (19) Jichhürux nayan askïñax munatam uñacht'ayista. Tatitux juman amparamar nayar katuykasinsa, janiw jiwaykistati.

19 19 (20) Chiqpachansa, janiw khitis uñisiripar katjasax ukhamak khithanukkaspati. Ukhamasti, ¡Tatituy jumarux askimpi kuttaypan, kuntix jichhürux nayampi lurkta ukanakatxa!

20 20 (21) Nayax jichhakiw amuyasta, chiqpachansa jumaw Israel markan reyipäyätaxa, juman irpatasti Israel markax nayraqataruw sartani.

21 21 (22) Jichhasti Tatitun sutipxaru juramento lurarapita, nayat saraqir wawanakaxar jan jiwarayañamataki, janirak wila masixan sutipsa chhaqtayañamataki —sasa.

22 22 (23) Davidasti Saúl reyitakix juramento luräna, ukatsti reyix jach'a utaparuw kutt'anxäna. Davidasti imantasiñ chiqaruw jaqinakapampix sarxapxäna.