DANIEL 11 - Qullan Arunaka DC

1“Darío reyin Media sat uraqi mä mara marka apnaqkän ukapachax, nayarakiw jupar ch'amañcht'äyäta, yanapt'arakïyäta.

2Jichhasti kunatix chiqäki uk yatiyarakïma:

Amsta tuqinkiri, aynach tuqinkir reyinaka

“ ‘Kimsa reyiw Persia marka apnaqaskakini, ukanak qhipatsti pusïri yaqha reyiw sartani, jupasti mayni kimsa reyit sipansa sinti qamirïniwa. Kunapachatix ukhama qamiri kankañapampi wali munañanipuni tukxani ukapachasti, taqi qamir kankañapampiwa Grecia markatakix sayt'ani.

3Uka qhipatsti yaqha reyirakiw apnaqani, jupasti wali nuwasirïniwa, jupax mä jach'a marka apnaqani, ukatsti kuntix munkani uk lurarakini.

4Ukampis kunapachatix jach'a markapax suma utjnuqatäxani ukapachasti, uka jach'a markapax t'unjata, pusir t'aqxtataw uñjasini. Uka reyin munañanïñapasti janiw wawanakapar churatäkaniti, janirakiw jach'a markapas nayrjam wali ch'amanïkxaniti, niyakixay t'aqanuqata uñjaschinixa, yaqhanakarakiw jupa lanti apnaqxapxani.

5“ ‘Aynach tuqinkir reyisti wali ch'amanïniwa, ukampis ejercitopan utjir mä jilïripaw jupat sipansa juk'amp ch'amanïni, ukatsti munañanïñ kankañapampix walja jach'a markanakaru, ukhamaraki jisk'a markanakaruw apnaqani.

6Mä qawqha maranakatsti, amsta tuqinkir reyimpi, aynach tuqinkir reyimpix mä arust'äwiruw mantapxani; aynach tuqinkir reyix phuchhap churani amsta tuqinkir reyin warmipäñapataki, ukhamat uka pä markanakan sumankañax wiñay utjañapataki. Ukampis uka amtäwix aynacht'aniwa, uka warmisa, wawapasa, chachapasa, uywatanakapasa jiwarayataw uñjasipxani.

7Ukampis aynach tuqinkir reyin mayni wila masipaw, amsta tuqinkir reyin ejercitopar nuwantasin atipjarakini; ukatsti reyin jach'a utap katuntasini, ukatsti soldadonakapaw atipjasin taqi apnaqapxarakini.

8Ukhamarusa, metalat lurat diosanakaparux Egipto markaruw apasxani, qurita, qullqita, wali jila alani yaqha yänakamp chika. Uka pä markax mä qawqha maranakaw jan nuwasisa sarnaqani,

9amsta tuqinkir reyisti aynach tuqinkir markaruw mantantañ yant'ani, ukampis kuttawayxakiniwa.

10“ ‘Ukat amsta tuqinkir reyin yuqanakapax nuwasiñatak wakichasipxani, mä jach'a ch'amani ejército sartayapxarakini. Uka yuqanakapat maynïrix aynach tuqinkir markar katuntañatakiw sarantani, kunjämatix jawiran umax wal mantantki ukhamaw soldadonakapax mantantani, taqi kun t'unjasa; ukatsti wasitat nuwantani, aynach tuqinkir reyin uyuchrantat markapkam purisa.

11Amsta tuqinkir reyin ejercitopan nuwantatapasti, aynach tuqinkir reyirux walpun phiñasiyani, ukat jupax uka reyin jach'a ejercitopamp nuwasir mistuni, ukatsti q'alpun atipjarakini.

12Ukham atipjatapatsa, uñisirinakapan waljani jiwarapxatapatsa, uka reyix wal jach'achasini, ukampis jupan ch'amapax mä juk'a urutakikïniwa.

13Amsta tuqinkir reyix nayrïri ejercitot sipansa yaqha juk'amp ch'aman ejército wasitat sartayarakini, mä qawqha maranakatsti, walja nuwasirinakani, suma wakicht'at ejercitompiw wasitat aynach tuqinkir reyirux nuwantarakini.

14“ ‘Ukanakax utjkani ukapachasti, waljanirakiw aynach tuqinkir reyir saykatañatak mayachasipxani. Ukanak taypinsti Israelankir jaqinakat mä qawqha ñanqha jaqinakax utjarakiniwa, unañchäwin uñacht'ayatäkän ukarjama, ukampis aynacht'apxaniwa.

15Amsta tuqinkir reyisti, jutasin mä jach'a pirqa lurani; uyuchrantat ch'aman markarux ukanjam makhatasaw katuntani. Aynach tuqinkir reyin wali ch'amani soldadonakapasti, janiw uñisirin soldadonakaparux jark'irjamäpkaniti.

16Atipir reyisti, atipjayasirinakampix kuntix munkani uk lurani, janiw khitis jupar saykatirix utjkaniti, kunanaktix thakhin jikxatkani taqi ukanaksa t'unjaskakiniwa, ukatsti Suma Uraqi satäki ukan qhiparxani.

17Ukat juk'ampsti, aynach tuqinkir taqpach uraqinak katuntasiñatakiw wakichasirakini; ukatakisti aynach tuqinkir reyimpix mä arust'äwi lurani, uka reyirux phuchhap warmipäñapatak churani, ukampis amtäwinakapax aynacht'aniwa.

18Uka qhipatsti quta thiyankir markanakaruw nuwantani, uka markanakatsti waljaniw amparapar jalt'apxani; ukampis ejerciton mä jilïripaw taqi ukanakan jan utjañapatak sayt'ani, amsta tuqinkir reyirusti mä p'inqa tukjani.

19Uka qhipatsti, amsta tuqinkir reyix uraqipan utjir uyuchrantata markanakaparuw kuttawayxani; ukampis mä chijir purisaw jiwani, janiw kunas uka reyit juk'ampi yatiskxaniti.

20“ ‘Qunuñapansti yaqha reyiw qunt'asini, uka reyisti qullqinak apthapiyiriw mayni uywatapar khithani, marka apnaqäwipa qamiriptayañataki; ukampis mä qawqha urunakat jupar jiwayapxaniwa, ukasti janiw nuwasïwi laykükaniti.

21“ ‘Uka rey qhipatsti mä jan wali jaqiw marka apnaqani, uka jaqin reyïñapax janiw wakiskasapänti, jupax jan wali amtäwinakap imantasaw sallqjañanakamp reyit utt'asini.

22Khitinakatix jupatak sayt'apkani ukanakarusti q'al t'unjani, arust'äwiru mantatäkän ukan jilïriparus jiwayarakiniwa.

23Jupampi suma arust'äwi lurapkani uka masinakaparus sallqjarakiniwa, ejercitopax juk'a jaqinïkchini ukasa, atipjaniwa.

24Jan khitin amuykataw suyunakan utjir suma uraqinakap katuntasini, ukatsti kuntix nayra awkinakapax jan lurapkäna ukanak lurarakini: nuwasïwin jikxatat qamir yänak soldadonakaparuw lakintani. Suma uyuchrantat markanakar nuwantañatakiw amtarakini, ukampis ukax mä juk'a urunakatakikïniwa.

25“ ‘Ch'aman amuyasisasti, jach'achasisaw aynach tuqinkir reyir nuwantani, wali jach'a ejerciton yanapapampi. Aynach tuqinkir reyisti jan axsarasaw jach'a ch'aman ejercitompi nuwantarakini; ukampis jupax sallqjataw uñjasini, ukatsti janiw uñisiripan ejercitopar saykatirjamäkaniti.

26Jupax manq'añatak utapar jawsirïkän uka pachpa masinakapaw jupan aynacht'añapatak wakichapxani, ejercitopax atipjataw uñjasini, soldadonakapat waljaniw jiwarapxani.

27Ukatsti, uka pä reyinakax purapat ñanqha lurasiñ amtäwimpikiw mayawjan manq'añatak qunt'asipxani, ukatsti jupanakkamaw k'arinak sasipxani, ukampis janiw maynis amtatanakap phuqhapkaniti, pachax janïra purinitap layku.

28Amtäwinakap phuqhasaxa, amsta tuqinkir reyix nuwasïwin katuntat yänak apt'ataw markapar kutt'xani. Mä qawqha pachatsti, uka reyix sumankañatak arust'äwi luratarux janiw phuqkaniti.

29Jan ukasti, niya pacha phuqhasitarjamaw wasitat aynach tuqinkir reyirux nuwantani; ukampis janiw nayrïr kutinjam atipjkaniti.

30Ejercitopar nuwantañatakix inti jalanta tuqit soldadonakax barconakat purintanipxani, uk uñjasasti axsarañat jaltxakiniwa. Amsta tuqinkir reyix khitinakatix uka sumankañatak arust'äwiru jan phuqhapki ukanakaruw jaysani. Ukapachasti, amstankir reyix uka qullan arust'äwitakiw taqi phiñasiñap samarasini, ukatsti uka arust'äwi apanukurinakampiw arust'asini.

31“ ‘Soldadonakapasti Tatitun utap ñanqhachapxaniwa, suma uyuchrantat markanaksa janiw yäqapkaniti. Sapüru wilañchanak luqtasiñanaksti jark'xaniwa, uka lantix axtaskañanak luqtapxani Tatitun yänakap takisisa.

32Reyisti quña arunakapampiw sumankañatak arust'äwi jan phuqhirinakarux jupar jaqkattayasiñ munani, ukampis Diosapar munir markax, thurt'ataw uka jan walt'añanak jutipanxa sayt'asini.

33Markankir jach'a yatiñan jaqinakasti walja jaqinakaruw yatichapxani, ukampis jank'akiw jupanakarux jiwarayapxani, ninaruw nakhantayapxani, utjir yänakapsa lunthatjapxarakiniwa, jupanakat waljaniruw jaya markanakar uywat jaqir tukuyañatak apapxani. Ukasti mä qawqha urunakakïniwa.

34Kunapachatix arknaqat uñjasiñ urunakax purinkani ukapachasti, mä juk'a yanap katuqapxani, waljanirakiw jan uñisiyasiñ laykux jupanakar jaqkattapxani.

35Khitinakatix markankir jaqinakar yatichapkäna ukanakasti, chimpt'at tukuy urun puriniñapkamax arknaqatäpxaniwa, jupanakax uka yant'anak katuqasaxa, q'umachatäpxaniwa, chiqapar tukuyatäpxarakiniwa.

36“ ‘Amsta tuqinkir reyisti kuntix jupax munkani uk lurani. Jach'a jach'a tukutapatxa, jupax taqi diosanakatsa juk'amp ch'amanïtap amuyasini, chiqpach Diosatakisti kunayman ñanqha arunak arsuni; taqi kunas jupatakix wakiskiriw mistuni; Diosax jupatak mutuyäwipa apayankani ukapachkama, kuntix Diosax lurañapäki ukxa, luraniwa.

37Aka reyisti janiw nayra awkinakapan diosanakaparux yäqkaniti, janirakiw warminakan yupaychata diosanakarusa, kawkïr diosarus yäqkaniti, jupax taqi uka diosanakatsa jilt'atätap amuyasini.

38Ukampisa, uyuchrantat markanakan diosaparuw yupaychani; janiw nayra awkinakapas uka diosaru yupaychapkänti, uka diosarusti quri, qullqi, suma k'ajkir qalanaka, jila alan yänakamp luqtarakini.

39Atipjat markanakar arxatañatakisti, yaqha diosanakar yupaychir jaqinakampiw yanapt'ayasini; khitinakatix uka reyir jach'añchapkani ukanakarusti, marka apnaqäwin jach'a jilïrit utt'ayani, jach'a uraqinak churarakini.

40“ ‘Tukuy pacha purinkani ukkhasti, aynach tuqinkir reyix amsta tuqinkir reyiruw nuwantani; ukampis amsta tuqinkir reyix jupamp nuwantasiñatakiw mistuni, ukatsti mä jach'a thayäkaspa ukhamaw aynach tuqitak sartani, nuwasiñ carronakampi, caballeriampi, walja soldadonakampi, walja barconakampi mantantasa.

41Ukatsti Suma Uraqi satäki ukaruw mantarakini, ukansti walja jaqinakaruw jiwarayani; ukampis Edom markana, Moab markan utjasirinakasa, Amón uraqin utjasirinakasa qhispipxaniwa.

42Ejercitopasti yaqha jach'a markanakar kunaw atipjasin katuntasini, janiw Egipto markas ukat qhispkaniti.

43Egipton utjir qurita, qullqit lurat yänakap apasxani, taqi qamir yänakap apasxarakini; uka qhipatsti Libia, Etiopía markanak katuntasirakini.

44Ukampis inti jalsu tuqimpita, amsta tuqimpit yatiyäwinak katuqani, uka yatiyäwinakasti juparux wal thuqtasiyani; ukat jupax sinti phiñasitapuniw mistuwayani, walja jaqinak jiwarayañ chuymampi.

45Ukatsti utjäwipxa, jach'a qutampi, Suma uraqin qullan qullupäki uka taypiruw utt'ayasini. Ukampis ukawjan jiwañapax purinini, janiw khitis jupar yanapt'irix utjkaniti.