JEREMÍAS 32 - Qullan Arunaka DC

Jeremiasax mä uraqi ali

1Sedequías reyix tunka mara Judá uraqi apnaqkäna, Nabucodonosor reyis Babilonia marka tunka kimsaqallqun mara apnaqkarakïna uka maraw Tatitux Jeremiasarux parlxayäna.

2Uka urunakansti Jerusalén markax Babiloniankir reyin ejercitopampi muyuntatänwa, Jeremías profetasti reyin utapan carcelax utjkäna uka anqäxan katuntataw uñjasïna.

3Sedequías reyiw Jeremiasarux ukham katuntayatayna, Jeremiasan akham sasa parlatap layku: “Tatitux siwa: ‘Babiloniankir reyiruw aka marka katuyä,

4Sedequías reyisti janirakiw Babilonia jaqinakan amparapat jaltkaniti, jan ukasti Babiloniankir reyin nayraqatapar uñstañapäniwa.

5Nabucodonosor reyisti Sedequías reyirux Babilonia uraqiruw apasxani, ukan qhipararakini nayan jupat amtasiñaxkama. Jumanakax qawqhas babilonionakatak sayt'asisipkam, ukampis janiw atipapkätati. Naya, Tatituw uk arsta’ ” sasa.

6Jeremiasasti sarakïnwa: “Tatituw nayar parlxayitu, ukatsti sarakituwa:

7‘Salum tioman yuqapa, Hanamel primo jilamaw jutani, ukatsti kuna uraqipatix Anatot chiqan utjki uka uraqi ‘Alasxita’ sarakïtamwa, jak'a wila masipätam laykusti, jumax uka uraqi alasiñamawa’ sasa.

8Ukatsti kunjämtix Tatitux siskitu, ukhamarjamapuniw Hanamel primo jilaxax, reyin utapan carcelax utjkäna uka anqäxapar jutasina, kuna uraqipatix Anatot chiqan utjki uka uraqi alasiñaxatakiw parlxayitu, uka uraqisti Benjamín ayllun uraqipankiwa, uka uraqi alasiñasti nayaruw wakt'itäna jupan jak'a wila masipätax layku. Uka amtäwin Tatitun munañapätap amuyasinsti,

9-10primo jilaxat uka uraqi alasxapuntwa. Kunjämatix alapax arust'atäkän ukhamarjamaw tunka paqallqun qullqi churxta, ukatsti uka uraqi alasitaxätxa, mä papelaruw qillqsuyta, qhanañchirinakan sutinakapas suma qillqantat kuna.

11Uka uraqin alasit papelapsti paypacha waraqat papelanak katurakta, mayïrix suma jist'antata kunjämarutix alasitäkän ukhamarjama qillqataraki, payïri waraqatäki ukasti, janiw jist'antatäkänti,

12ukatsti uka paypach waraqatxa, Nerías jaqin Baruc yuqaparuw churxta, Maaseías jaqin allchhiparu. Uksti Hanamel primo jilax nayraqatana, sutinakap qillqantapkäna uka qhanañchirinak nayraqatana, carcel uta anqan qunt'atäpkän uka judionak nayraqatan katuyxarakta.

13Jupanak nayraqatansti Baruc chacharux saraktwa:

14‘Israelan Diosapa, taqi ch'aman Tatitux siwa: Paypach qillqata katusin, jist'antatäki, jan jist'antatäki uka waraqatanak mä ñiq'i phukhur imxam, ukan walja maranak imatäñapataki’ sasa.

15Israelan Diosapa, taqi ch'aman Tatitusti siwa: ‘Aka markan wasitat utanaksa, uraqinaksa, yapunaksa alasipxani’ sasa.

Jeremías profetan Diosar mayisitapa

16“Uka uraqi alat papelanak Baruc chachar churasinsti, Tatituruw akham mayisirakta:

17‘Tatay, jumaw jach'a ch'amamampi alaxpachsa, akapachsa lurtaxa. Janiw jumatakix kunas jan lurasirjamax utjkiti.

18Jumasti jaqinakarux khuyapayasiñam wawanakapan wawanakaparuw uñacht'aytaxa, awkinakapan juchanakapatxa, uka jaqinakarux mutuyaraktawa. ¡Jach'a ch'amani Tatitu, sutimax Taqi Ch'amani Tatitu satawa!

19Jumax amtäwinakaman jach'ätawa, luräwinakamansa ch'amanirakïtawa. Jumaw taqi jaqin luratanakap uñjtaxa, ukatsti luratanakaparjamaw kunsa churtaxa.

20Jumaw Egipto markan muspharkañanak lurtaxa, jichhas Israel markana, yaqha markanak taypinsa uka pachpa luräwinak luraskaraktaxa, ukhamat sutiman jach'añchatäñapataki.

21Israel markamarusti jumarakiw jach'a ch'amamampi Egipto markat irpsuntaxa, muspharkañanak lurasa, taqinirus axsarañampi phuqhantasaraki.

22Israelarusti aka uraqi churaraktaxa, kawkhantix lechesa misk'isa umjam jalaski uka uraqi, nayra awkinakapar arsutamarjama.

23Ukampis kunapachatix jupanakax aka uraqir utjantañatak mantanipkäna ukapachasti, janiw jumarux ist'apkäyätamti, kuna arunaktix siskäyäta ukanaksa janirakiw phuqhapkäyätamti. Ukat jichhax taqi aka t'aqhisiñanak apayantaxa.

24“ ‘Jichhasti Babiloniankir soldadonakax Jerusalén markar nuwantañatakiw wal wakicht'asipxi; nuwasiñampi, mach'ampi, kunayman usunak laykuw markax uñisirinakan amparapar purini. Tatay, kunjämtix jumax yatiykta ukanakaw phuqhasiski.

25Tatay, ukampis jumax qhanañchirinak nayraqatansa, uka uraqi “alam” saskakistawa, markax babilonionakan amparapar purirjamäkchi ukasa.’ ”

26Ukatsti Tatitux Jeremiasarux sarakïnwa:

27“Nayätwa taqi jakirinakan ch'amani Diosapaxa. Janiw nayatakix kunas jan lurasirjamax utjkiti.

28Jichhasti nayax sismawa: Babiloniankir Nabucodonosor reyimpi, soldadonakapampiw Jerusalén marka katuntasipxani.

29Babilonio soldadonakax Jerusalén markaruw nuwantapxani, ukatsti kawkïr utanakantix Baal diosar incienso luqtasipxirïkäna, vinonaksa yaqha jan uñt'at diosanakar luqtapxirïkän taqi uka utanak phichhantapxani; ukham yaqha diosanakar yupaychapxatapampisti nayaruw q'apisiyapxitäna.

30Qalltatpach Israelankirinakampi Judá markankirinakampix kunatix nayatak jan walïki ukanak lurapxirïna; israelitanakasti jupanakan lurat diosanakampiw ñanqhachapxitäna. Naya, Tatituw uk arsta.

31Aka markax qalltaski ukat jichhürkamaw, taqi jaqinakapax walpun q'apisiyitu. Ukat jichhax chhaqtayä,

32kuntix Israel uraqin markanakapaxa, Judá uraqin markanakapasa, reyinakapasa, jilïrinakapasa, sacerdotenakapasa, profetanakapasa, ukhamarak Judá uraqina, Jerusalén markana jakirinakas lurapkitu ukanakat jupanakarux q'al chhaqtayä.

33Nayatakix maysa uñtapxäna, janiw uñkatañsa munapkitänti. Nayasti jupanakarux yatichaskapunirakïyätwa, ukampis janiw nayan yatichäwinakaxsa ist'añ munapkänti.

34Nayar katuyat utaxsa, uka axtaskañ yaqha idolonakap uchasisaw takisipxi.

35Ben-hinom sata qhirwansti Baal diosatakix altaranak lurasipxi, ukat juk'ampi jan wali luratanakapax axtasiyitu, uka altaranakan imill wawanakaparu, yuqall wawanakapar Moloc diosar wilañcha luqtapxi, ukhamat Judá markarux juchar puriyapxi, uka axtaskañ lurañanaksti janiw nayax jupanakarux ‘Lurapxam’ siskti, janirakiw akch'as amuyuxarux ukanakax jutkarakïnti.

Qhipa urunakatak arsüwinaka

36“Naya Tatitu, Israelan Diosapaw arsta, kawkïr markattix jumax siskta Babilonia reyin amparaparuw puripxani, nuwasiñampi, mach'ampi, kunayman usunakampi utjatap layku:

37Nayaw jaqinakaparux taqi markanakat anthapinxä, kawkïr markanakarutix nayax jupanakatak sinti phiñasitäkäyät ukapacha ananukkäyät ukanakata. Nayasti jupanakarux aka pachpa uraqiruw kuttayanxä ukan k'uchik jakasxapxañapataki.

38Jupanakax nayan markaxäniwa, nayasti jupanakan Diosaparakïyäwa.

39Jupanakarusti taqi urunakapanxa, nayar jach'añchkir tukuyarakï, ukhamat jupanakatakisa, wawanakapatakis askïñapataki.

40Jupanakampisti mä wiñay arust'äwi lurä: uka arust'äwinxa arsurakïwa jupanakampipunïñataki, yanapt'arakïwa, ukatsti nayar jach'añchañ chuyma churä, ukhamat nayat janipun saraqañapataki.

41Taqi chuymaxampiw aka uraqin jupanakarux utjasiyxä, markaxan suman jakasxatapaw nayarux kusisiyitani” sasa.

42Tatitux saskakiwa: “Kunjämatix nayax aka markatak taqi aka t'aqhisiñanak apayantxa, ukhamarakiw jichhax taqi askinak arskta ukanak apayanirakï.

43Aka markana, kawkïri markattix siskta ‘Wasararuw tukuni’, jan jaqini, jan uywanakani, ukhamarak caldeonakan amparaparuw jalt'ani siskta uka uraqinsti, wasitat uraqinak alasxapxani.

44Suma q'umachat papelanakani, qhanañchirinakan sutinakapampi qillqantat uraqinak alasxapxani. Taqi akanakasti Benjamín ayllun uraqipan lurasini, Jerusalén marka thiyanakana, Judá uraqinkir markanakana, qullu tuqin utjir markanakana, jach'a quta thiya iraman utjir markanakana, ukhamaraki Néguev siski uka markanakansa uraqinak alasxapxani. Nayaw Babilonia markat kuttayanxarakï. Naya, Tatituw uk arsta.”