NEHEMÍAS 4 - Qullan Arunaka DC

Uñisirinakapan larusipxatapa

1 1 (33) Sambalat chachax pirqa askichapxataxat yatkäna ukkhax wal mayjt'asïna, ukatsti wali phiñasitaw

2 2 (34) masinakap nayraqatana, Samariankir ejército nayraqatan judionakat larusïna akham sasa: “Manq'at jiwat judionakax ¿kuns amuyasipxpacha? ¿Wasitat marka sayt'ayasaxa, wilañchanak luqtasipkakïwa, sapxpachati? ¿Mä urunak lurañ tukuyapxä, sasat amuyapxpacha? ¿Jan ukax, uka allthapit taypit machaq qalanak apsupxä sapxpachacha?” sasa.

3 3 (35) Jupa jak'ansti, Tobías amonita chachaw ukankaskäna, jupas akham sarakïnwa: “Uñtapxam pirqanak sayt'ayasipkiri: ¡Mä qamaqis uka pirqar jalsusax allinukuwayakispawa!” sasa.

Nehemiasan Diosar mayisitapa

4 4 (36) Ukat nayax Tatitut mayista: “Nanakan Diosaxay, nanakat larusipxatap ist'am. Nanakatak arusitapax jupanakxar kutxatpan, uñisirinakapan amparapar katuyam, yaqha markar katuntat jupanakax apapxpan.

5 5 (37) Ñanqha luratanakap jan pampachamti, janirak juchanakap armasimti, jupanakax wasitat pirqa sayt'ayapxataxat larusipxitu” sasa.

Uñisirinakan axsarayañ arunakapa

6 6 (38) Ukhamasti, pirqax niya chikakam luratäxänwa, jaqinakasti taqi chuymaw lurapxäna.

7 7 (1) Ukampis Sambalat, Tobías, árabe jaqinakasa, ukhamarak Amón, Asdod ukankirinakas kunapachatix Jerusalén markan pirqanakapan askichatäxatapa, k'ajllanakapas pirqantatäxatap yatipxäna ukkhaxa, walpun phiñasipxäna.

8 8 (2) Ukatsti taqiniw mayak amtapxäna Jerusalenar ñanqha luras t'unjaña.

9 9 (3) Ukatsti nanakax Tatituruw mayisipxta, jupanakat jark'aqasiñatakix uruy arum uñch'ukirinak uchapxta.

10 10 (4) Judänkir jaqinakasti sapxänwa: “Q'ipirinakan ch'amapax walja t'unanak nayraqatan laq'jtiwa, nanakas wasitat pirqa sayt'ayañatakix janiw ch'amanïkxapkti” sasa.

11 11 (5) Uñisirinakaxax amuyapxpachänwa nanakax janis amuyasipkirista, janis kuns uñjapkirista ukhama, ukatsti akatjamat nanakar nuwantir mantantanisin jiwayañataki, ukhamat lurañanak sayt'ayañataki.

12 12 (6) Ukampis jupanak jak'an jakapkäna uka judionakax sapa kutiw yatiyapxitu: “Uka jaqinakax taqi tuqit ñanqha lurañ amtapxtam” sasa.

13 13 (7) Ukat nayax jaqinakar mayïyäta nuwantasiñatak wakicht'asipxañapataki. Ukatsti ut uta jupanakax pirqa qhipäxan tantachasipxañapataki, ukhamarak kawkhanakantix pirqax janïr askichatäki ukkhanakana, k'ajlla chiqanakana, espadanakani, lanzanakani, mich'inak antutt'añanakani.

14 14 (8) Nayasti jupanakan axsarayasipxatap uñjasin jilïrinakaru, marka apnaqirinakaru, taqi jaqinakamppacharuw sayt'asisin akham sista: “Jan axsarapxamti. Amtasipxam, Tatitux jach'a ch'amaniwa, axsarkañarakiwa; jumanakax nuwasipxam masinakam layku, wawanakam layku, warminakam layku, utanakam laykuraki” sasa.

15 15 (9) Kunapachatix uñisirinakaxax nanakan wakichasitanakax yatipkäna, Tatitus jupanakan amtäwinakap mayjt'ayatap yatipkäna ukkhaxa, taqi mayniw nanakax pirqa lurañanakaxarkam kutt'xapxäyäta.

16 16 (10) Uka urutsti chikat jaqinakax pirqa lurañanakan irnaqapxäna, chikat jaqinakasti lanzanakani, jark'aqasiñanakani, mich'inak antutt'añanakani, qhawanakani kun wakicht'atäpxänwa. Jilïrinakasti Judänkir jaqinakaruxa,

17 17 (11) khitinakatix wasitat pirqa sayt'ayasipkäna ukanakarux wal yanapapxäna. Q'ipirinakax q'ipisipkakïnwa, ukampis mä amparampix irnaqapxänwa, maysa amparampisti espada ayt'atäpxänwa.

18 18 (12) Pirqa lurañan irnaqapkäna ukanakan espadapax wak'apan uchatkamänwa, corneta phust'iristi naya jak'ankänwa,

19 19 (13) nayasti jilïrinakaru, marka apnaqirinakaru, markachirinakarux säyätwa: “Lurañanakax walipuniwa; jiwasanakax pirqa muytpacharu jalanuqatätanwa, jayan jayan jalanuqata.

20 20 (14) Ukhamasti, corneta phust'ir ist'apxäta ukapachasti, jank'akiw nanakar yanapt'ir jalanipxäta; Tatitusaw jiwas chika nuwasiskani” sasa.

21 21 (15) Ukhamasti, nanakax willjtatpacha ch'amakthapkamaw luräwin irnaqasipkakïyäta, mä chikat jaqinakasti lanzas ayt'atkamänwa.

22 22 (16) Ukhamarus jaqinakarux saraktwa, taqini, yanapirinakamppacha Jerusalén marka manqhan qhantatipxañapa, ukhamat yanapirix aruman uñch'ukiñapataki, urusti luräwin lurañapataki.

23 23 (17) Janiw nayasa, wila masinakaxasa, yanapirinakasa, nayamp chikäpkän uka uñjirinakas ikintañatakix isinak apsusipkäyätti, sapa maynis lanzas apt'atkamakïpxäyätwa.