1 REYES 15 - Qullan Arunaka DC

Abiam reyin Judá uraqi apnaqatapa(2 Cr 13.1-22)

1Abiam reyix Nabat chachan Jeroboam yuqapax tunka kimsaqallqun mara Israel marka apnaqxäna ukkhaw Judá uraqi apnaqañ qalltäna.

2Abiam reyix Jerusalén markan kimsa maraw marka apnaqäna. Taykapasti Maacá sutinïnwa, Absalonan phuchhapänwa.

3Abiam reyix awkipjamarakiw pachpa juchanak luratayna, janiw Tatit Diosapatakix chiqa chuymanïkänti, kamisatix David achachilapax chiqa chuymanïkatayna ukhama.

4Ukampis Davidaru khuyapayasitap laykuw, qhanapa jan jiwt'añap munasin jupan qhipapat yuqapar utt'ayäna, Jerusalén markar ch'aman tukuyañataki;

5Davidax Tatitun nayraqatapan suma askin sarnaqatayna, janipuniw jakañapan Tatitun arsüwinakapat saraqkataynati. Davidan jan wali luratapax mayaw utjäna, ukasti Urías hitita chachar jiwayapxañapatak khitkatayna ukänwa.

6-7Roboam reyin jakañapkamasti, Jeroboam reyimpi, Roboam reyimpix, sapa kutiw nuwasiñankapxäna. Ukhamarakiw Jeroboam reyimpi, Abiam reyimpix nuwasiñankapxäna. Abiam reyin ukat ukxar sarnaqäwinakapa, taqi kuntix jupax lurkäna ukanakasa, Judá uraqinkir reyinakan luräwinakapan qillqatankiwa.

8Abiam reyix jiwxäna ukkhasti, Davidan markaparuw imt'xapxäna. Uka qhipatsti Asá yuqapaw jupa lantix reyïxäna.

Asá reyin Judá marka apnaqatapa(2 Cr 14.1-5; 15.16-19)

9Asá chachasti Jeroboamax Israelan pä tunka mara apnaqkäna, ukkhaw Judá uraqi apnaqañ qalltäna,

10ukatsti Jerusalenanxa pusi tunka mayan maraw marka apnaqäna. Awichapax Maacá sutinïnwa, Absalonan phuchhapänwa.

11Asá reyin luratanakapasti Tatitun nayraqatapan askïnwa, David, nayra awkipanjama.

12Asá reyix uka uraqit khitinakatix idolonakar yupaychañ chiqanakan q'añu lurañakan sarnaqapkän uka jaqinakaruw jaqunuküna, ukatsti nayra reyinakan lurat idolonak taqpach apanukurakïna.

13Maacá awichaparusti, tayka reina kankañap apaqarakïna, Astarté diosar uñtasit lurayatap layku. Asá reyix uk t'unjasin Cedrón sat uma jalsu chiqan nakhantayäna.

14Ukampisa, Asá reyix janiw qullu patanakan utjir yupaychañ utanak apanukuykänti. Ukhamäkipansa, jupax taqi jakañapan Tatitur katuyasïna,

15jupax Tatitun utaparuw apxäna, kawkïr yänaktix jupasa, awkipasa Tatitur luqtapkatayna taqi uka quri, qullqi yänaka.

Asá reyin Ben-hadad reyimp arust'atapa(2 Cr 16.1-10)

16Asá reyimpi, Israelan Baasá reyipampix, sapa kutiw nuwasiñankapxäna.

17Kunapachatix Baasá reyix Judá uraqir nuwantir jutkän ukkhaxa, Ramá sat marka katuntasïna, ukatsti Asá reyin Judá uraqit jan mistuñapatakisa, mantañapatakis walja uñjirinakampiw marka uñch'ukiyäna.

18Ukhamäsinsti, Asá reyix Tatitun utapampina, reyin jach'a utapampin imatäkatayna uka taqpach quri, qullqi yänak apxarusinxa, yanapirinakaparuw Siria markankir Ben-adad reyipatak apayäna. Uka reyix Damasco markan utjasïna, jupasti Tabrimón chachan yuqapänwa, Hezión sat chachan allchhiparakïnwa. Asá reyisti jupar akham iwxäna:

19“Jumampi, nayampi mä arust'äwi lurañäni, kamisatix awkinakasax lurapkäna ukhama. Aka quri, qullqi jumatak apayansma. Jichhax jumax Israelan Baasá reyipamp arust'äwi luratam p'akintxam, ukhamat nayamp jan nuwasxañapataki” sasa.

20Ben-adad reyisti Asá reyin arunakapar iyawsänwa, ukatsti ejercitopan jilïrinakaparuw Israelan markanakapa nuwantayir khithäna. Ukhamat Iión, Dan, Abel-bet-maacá markanaka, Neftalí taqpach uraqi, Galilea quta thiyankir uraqimp katuntasïna.

21Ukanak yatisinsti, Baasá reyix, janiw Ramá markxa uñch'ukiykxänti, Tirsá markaruw kutt'anxäna.

22Ukatsti Asá reyix taqpach Judá markachir jaqinakaruw jan maynin jawsayäna, ukatsti jupanakax Ramá chiqat qalanakampi, lawanakamp apasxapxäna, Baasá reyix nuwasiñatak lurantaskatayna ukanaka, uka pachpa qalanakampi, lawanakampirakiw Benjaminan Mispá, Gueba markanakarux thuruñchäna.

Asá reyin jiwxatapa(2 Cr 16.11-14)

23Asá reyin ukat ukxar luräwinakapasa, atipjäwinakapasa, markanak sayt'ayatapasa, Judá uraqinkir reyinakan luräwinakapan qillqatankiwa.

Ch'ama qarit awkïxäna ukkhasti, Asá reyix kayunakat usuntäna;

24jiwxipansti, Davidan markapan nayra awkinakapan thiyaparuw imt'xapxäna. Uka qhipatsti Josafat yuqapaw jupa lanti reyit utt'asxäna.

Nadab reyin Israel marka apnaqatapa

25Jeroboam reyin Nadab yuqapax Israel markan reyipat utt'ayatänwa, kunapachatix Asá reyix pä mara Judá uraqi apnaqxäna ukapacha. Jupasti pä marakiw marka apnaqawayäna.

26Nadab reyix janiw Tatitur jayskänti, jupasti kuna juchanaktix awkipax lurkatayna pachpa juchanak lurarakïna, ukanakampiw Israel markar jucha lurayäna.

27Mä urux, kunapachatix Nadab reyix ejercitopampi Guibetón filistea markar muyuntasipkän ukapachaw, Isacar ayllunkir Ahías chachan Baasá yuqapax, Nadab reyitak sayt'asïna, ukat jupar jiwayäna.

28Ukasti Asá reyix kimsa mara Judá uraqi apnaqkäna ukapachaw lurasïna. Ukatsti Baasá chachaw Nadab lanti reyi utt'asxäna.

29Kunapachatix markar apnaqañ qalltkän ukspachaw, Jeroboaman taqpach wila masinakaparux tukjañkam jiwarayäna, janiw khiti wila masiparus jakaykänti. Ukhamat phuqhasïna kuntix Tatitux Siló chiqankir Ahías profeta tuqi yatiykatayna ukaxa.

30Uka mutuyäwix Jeroboaman juchanak luratapat utjäna, ukham luratapampiw Israel markarus juchañchjasiyäna, ukhamat Israelan Tatit Diosapar q'apisiyasa.

31Nadab reyin sarnaqäwinakapampi, taqi kuntix jupax lurkäna ukanakampix Israelan reyinakapan luräwinaka qillqatankiwa.

32Asá reyimpi, Israelan Baasá reyipampix sapa kutiw nuwasiñankapxäna.

Baasá reyin Israel marka apnaqatapa

33Asá reyix Judá uraqi kimsa mara apnaqkän ukapachawa, Ahías chachan Baasá yuqapax Israel markar apnaqañ qalltäna, jupasti pä tunka pusin maraw marka apnaqäna.

34Baasá reyin luratanakapasti janiw Tatitun nayraqatapan walïkänti, jupasti kuna juchanakampitix Jeroboamax israelitanakar jucha luraykatayna, uka pachpa juchanak lurarakïna.