OSEAS 14 - Qullan Arunaka DC

IV. TATITUR KUTTXAÑATA, QHISPIYASIÑ ARSÜWINAKATA(14.1-8[2-9])Oseas profetax Israelaruw achikt'i Tatitur kuttanxañapataki

1 1 (2) ¡Israel, Tatit Diosaman ukar kuttanxam,

jucha luratamat aynacht'taxa!

2 2 (3) Tatitur kuttanxapxam,

akham mayt'asisa:

“Taqi ñanqha luratanakaxat pampacht'apxita,

nanakan jumar yupaychatanakaxsa,

suma chuymampirak katuqt'apxita.

3 3 (4) Asiria markax janiw qhispiyapkitaspati,

janiw caballonakapar lat'xatasas jaltapkiristti.

Amparaxampi lurasipkta ukanakarux,

janirakiw ‘Nanakan Diosaxa’ sapkäti.

Tatay, wajchax juma sapanak khuyapayasiñ jikxati.”

Tatitux Israel markarux machaq jakañ churañ arsu

4 4 (5) Tatitux israelitanakarux siwa:

“Phiñasiñaxax t'akurxiwa.

Jichhasti kunja jach'äkitix munasiñaxax uk uñacht'ayarakï,

janiw saykatasir markäkxapxaniti.

5 5 (6) Israel markatakix sullar uñtatäyäwa,

jupasti lirio panqarjamaw panqart'ani.

Saphinakapasti uraqirux suma saphintatäniwa;

6 6 (7) alinakapasti olivo quqan alinakapjamaw jach'ar saratatani,

q'aphipasti Libanonkir pinonakan q'aphipjamäniwa.

7 7 (8) Israelax wasitat nayan arxatat jakxani;

ukatsti trigor uñtataw jilani,

uva alir uñtataw panqart'ani,

Libanonkir vinjam wali aytatarakïniwa.

8 8 (9) Israelitanakasti sarakiniwa:

‘Kunäskpas jichhax yaqha diosanakaxa’ sasa.

¡Nayaw uñjasta, markaxarus imasirakta!

Nayax pino quqjam ch'uxñakipunïsktwa,

markaxax nayanwa achup jikxatarakini.”

V. TUKUY IWXT'A ARUNAKA(14.9[10])

9 9 (10) Yatiñani, ch'ikhi jaqinakas

aka arunak amuyt'apxpan:

Tatitun thakhipax chiqapawa,

chiqa jaqinakakiw ukanjam sarapxi;

ukampis ñanqha jaqinakax uka thakhin liwisipxiwa.