SALMOS 12 - Qullan Arunaka DC

SALMO 12Diosan yanapt'ap mayisiña 1 Davidan q'uchupa.

1 1 (2) Tatay, qhispiyapxitaya,

aski jaqinakax tukusiskiwa,

chiqap sarnaqir jaqinakax janiw utkxiti.

2 2 (3) Maynit maynikamaw k'arintasipxi,

sallqa chuymampiw parlapxi,

ch'uxña chuymampiw arsupxi.

3 3 (4) Tatay,

jach'achasir jaqinakaru,

ch'uxña jaqinakarus jik'inukum,

4 4 (5) khitinakatix sapxi:

“Jiwasax arsuñatakix lakanïtanwa;

wali sum arsuñ yattanxa.

¿Khitis apnaqistaspasti?” sasa.

5 5 (6) Tatitux jupanakarux siwa:

“T'aqhin jakir jaqinakampi,

jan yäqat jaqinakampix

mutuyata, t'aqhisiyataw uñjasipxi.

Jupanakar yanapt'añatakiw sartasï,

yanapt'ayasiñ munataparjamaw yanapt'ä” sasa.

6 6 (7) Tatitun arsutanakapax chiqpachawa;

ninampi paqallq kuti q'umachat qullqir uñtatawa.

7 7 (8) Tatay,

jumaw nanakarux imasipxitäta;

¡uka jaqinakat jark'aqapxitäta.

8 8 (9) Ñanqha lurir jaqinakax taqi chiqan muyupayapxi,

taqi jaqiw ñanqharux jach'ar apti.