1 1 (69) Moisesasti israelitanakarux kawkïr arust'äwi arunaktix Diosax jupanakamp Horeb qulluna lurkatayna ukanak iwxañ tukuyäna. Ukat Diosax Moisesar sarakïna Moab uraqin mä machaq arust'äwi jupanakamp lurañapataki.
2 2 (1) Moisesasti israelitanakaruw tantachthapïna, ukatsti machaq arust'äwin yatichäwinakap jupanakar churasin säna:
“Jumanakax niy uñjapxtawa taqi kuntix Tatitux Egipto uraqin faraón reyimpiru, jilïrinakapampiru, taqpach markapampir lurkän ukanakxa.
3 3 (2) Ukatsti uñjapxaraktawa uka jach'a yant'anaka, uñacht'äwinaka, muspharkañ luräwinaka.
4 4 (3) Ukampis Tatitux jichhürkamaw jan churapktamti yatiñ kankañ chuyma, janirakiw taqi ukanakan kunat ukham lurasitapsa amuyt'ayapktamti.
5 5 (4) Nayax pusi tunka maraw wasaranjam irpanipxsma, taqi uka maranakansti janiw isimasa, wiskhumasa mirq'iskänti.
6 6 (5) Janirakiw t'ant'sa manq'apkäyätati, vinsa, kuna machjayir umañanaksa umapkäyätati, ukhamat Tatitun jumanakan Diosamätapa yatipxañamataki.
7 7 (6) “Kunapachatix aksa tuqinakar jutaskäyätan ukkhaxa, Sehón sat Hesbón markan reyipaw jiwasampi nuwasir mistunïna, Og sat Basán markan reyipas mistunirakïnwa, ukampis jiwasaw jupanakarux atipjäyätan.
8 8 (7) Ukatsti uraqinakap katuntastan, uka uraqinaksti Rubén, Gad, Manasesan chikat aylluparuw churaraktan.
9 9 (8) Ukhamasti, taqi aka arust'äwin arunakapar phuqhapxam, ukarjamarak sarnaqapxam, ukhamat taqi luräwinakaman sum sarañapataki.
10 10 (9) “Jichhürusti taqpach Israel markaw Tatit Diosaman nayraqatapan tantacht'atäpxta. Akankiw ayllunakaman jilïrinakapa, jilïr awkinaka, jach'a munañan jilïrinaka, chachanaka,
11 11 (10) wawanaka, warminaka. Jumanak taypinkarakiw yaqha markat jutir jaqinakaxa, khitinakatix jumanakatak lawa ch'iyapki, umsa apanipki ukanaka,
12 12 (11) Tatit Diosamax jichhürun jumanakamp arust'äwi lurkani uk phuqhañatakiw akankapxtaxa.
13 13 (12) Jichhüruw uñt'ayasi jumanakax jupan markapäpxatama, jupasti jumanakan Diosamätaparaki, kamisatix Abraham, Isaac, Jacob nayra awkinakamar arsuwaykatayna ukhamarjama.
14 14 (13) Ukampisa Diosax janiw jumanakampiki uka suma arust'äw lurkiti,
15 15 (14) jan ukasti, khitinakatix jiwasampi chika Dios nayraqatan jichhürun jan akankapki ukanakampis lurarakiwa.
16 16 (15) Jumanakasti sum yatipxtaxa, Egipto markan jakatasa, ukhamarak akakam puriniñatak kunjämsa uka markanak sarakipaniwaytan uksa.
17 17 (16) Uka jaqinakax k'ari diosanakaruw yupaychapxi, jiwasasti lawata, qalata, qurita, qullqit lurat diosanakap uñjapxtan.
18 18 (17) Jumanak taypinsti janiy utjpati, chachasa, warmisa, wila masinakasa, ayllusa, Tatit Diosasar apanukusin uka markanakan diosanakapar yupaychirixa. Janirak khitis jumanak taypit jiwayasir k'allk'u saphini alinakar uñtatäpati.
19 19 (18) “Ukhamasti aka juramento arunak ist'asintix jumanakat khitis jupa pachpa suma jaqïtap amuyasis akham sani: ‘Taqi kunaw nayatakix walt'askani, munañaxar lurkä ukkhasa’ sasa, uka jaqiw juchanïni Diosan taqi Israel markpachar mutuyañapatakixa.
20 20 (19) Tatitux janiw uka jaqirux pampachañ munkaniti, jan ukasti uka jaqirux q'apisiñampiw mutuyani, ukatsti aka qillqatan utjki uka ñanqhachäwinakaw jupxankani, Diosasti uka jaqin saraqirinakap q'al aka uraqit chhaqtayarakini.
21 21 (20) Diosaw uka jaqirux Israelan ayllunakap taypit apsxani, chijinakaruw puriyani, suma arust'äwin taqi ñanqhachäwinakax aka kamachi qillqatan utjki ukanakarjama.
22 22 (21) Akat qhipar yurir israelita wawanakampi, yaqha jaya markat jutir jaqinakampiw uñjapxani Diosax aka uraqir apayankani uka axsarkañ mutuñanakampi, usunakampi.
23 23 (22) Kunapachatix jiwasan uraqinakas uñjapxani ukkhasti, azufrempi, nakhantat jayumpi, laq'ampik uñjapxani. Janirakiw kunas uka uraqirux satañjamäkaniti, uka uraqix janiw kunsa achuykaniti; janiw mä jisk'a quras uka uraqin jilkarakiniti, kamisatix Sodoma, Gomorra, Admá, Seboím markanakax t'unjatäsin uñjaskän ukhama, Diosaw jach'a axsarkañ q'apisiñapamp uka markanak t'unjäna.
24 24 (23) “Ukapachasti taqi jaqinakaw jiskt'asipxani: ‘¿Kunatsa Tatitux aka markar ukham lurpacha? ¿Kunatsa q'apisiñapax ukataqïpacha?’ sasa.
25 25 (24) Ukxarusti sapxarakiniwa: ‘Aka markax nayra awkinakapan Diosapan suma arust'äwip p'akinti, Egipto markat irpsunkän ukapachaw uka arust'äwi Diosax jupanakamp luräna.
26 26 (25) Jupanakasti yaqha diosanakar yupaychiriw sarxapxi, jan uñt'at diosanakatakiw killt'asipxi, jupanakar jan kuns churir diosanakataki.
27 27 (26) Ukat Diosax aka uraqitak q'apisïna, ukatsti ñanqhachäwinak apayanirakïna, ukanakasti aka qillqatankiwa.
28 28 (27) Ukatsti jupanakarux taqi q'apisiñapampiw markapat jaqunuku, yaqha markanakar khithanukusa, jichhürun uñjasipki ukhama’ sasa.
29 29 (28) “Jan yatktan ukanakax Tatit Diosasankiwa, jupakirakiw uñt'i, ukampis jiwasarux taqi uka kamachi arunak qhanañchawayistu, ukhamat jiwasasa, wawanakasas uka kamachi arunakapar jaysañasatakipuni.
Who We AreWhat We EelieveWhat We Do
2025 by iamachristian.org,Inc All rights reserved.
