NEHEMÍAS 3 - Qullan Arunaka DC

Pirqa luräwinak jaljasïwi

1Uka qhipatsti, wasitat pirq sayt'ayañ qalltapxäna. Sacerdotenakax Eliasib jilïr sacerdotepamp chikaw Ovejanakan punkupa satäkis uk askichapxäna, ukatsti, Pataka sat torret qalltasina, Hananelan torrepkama, jach'a punkunaksa uchantapxarakïnwa.

2Ukat ukxar utjir pirqxa Jericönkir chachanakaw askichapxäna, ukxar pirqsti, Imrí chachan Zacur yuqapaw askicharakïna.

3Senaá chachan wila masinakapasti Chawllanakan punkupa satäkis uk askichapxarakïna. Ukarux viganak uchapxäna, ukhamaraki punkunakapa, cerrojonakapampi, barranakapampi kuna.

4Ukxar pirqäki uksti Meremot chachaw askichäna, jupax Urías chachan yuqapänwa, Cos chachan allchhiparaki; ukxar pirqäki uksti Mesulam chachaw askicharakïna, jupax Berequías chachan yuqapänwa, Mesezabel chachan allchhiparaki; ukxar pirqäki uksti Baaná chachan Sadoc yuqapaw askichäna.

5Ukxarüki uksti Tecoankir jaqinakaw askichapxarakïna, ukampis uka markan jilïrinakapax janiw pirqa luririnakan sarayirinakaparux yanapañ munapkänti.

6Jesaná punksti Paséah chachan Joiadá yuqapampi, Besodías chachan Mesulam yuqapampiw askichapxarakïna. Jupanakasti viganak uchapxäna, punkunakarusti cerrojonakampi, barranakamppach uchantapxäna.

7Ukxar pirqäki uksti Gabaonankir Melatías, Meronotankir Jadón ukampiw askichapxäna, Gabaonankiri, Mispankir jaqinakamp chika. Jupanakax Éufrates jawirat inti jalant tuqinkir suyun jilïripan apnaqatäpxänwa.

8Ukxar pirqäki uksti Harhaías chachan Uziel yuqapaw askichäna, jupasti qullqi yänak sum lurirïna; ukxar pirqäki uksti Hananías chacharaki, jupax suma q'apkir qullanak wakichirïnwa; jupanak paniniw Jerusalén markan pirqap thuru pirqäki ukkhakam askichapxäna.

9Ukxar pirqäki uksti, Hur chachan Refaías yuqapaw askichäna, jupax Jerusalén markan mä chikat suyun apnaqiripänwa.

10Ukxar pirqäki uksti Harumaf chachan Jedaías yuqapaw askichäna, uka pirqasti utap uñkatasinkänwa, ukxarükis uka pirqxa Hasabnías chachan Hatús yuqapaw askicharakïna.

11Ukxar pirqäkis uka, ukhamaraki Hornonakan torrepa satäkis ukxa, Harim chachan Malquías yuqapampi, Pahat-moab chachan Hasub yuqapampiw askichapxäna.

12Ukxaru pirqäki ukxa Halohés chachan Salum yuqapaw askichäna, juparusti phuchhanakapaw yanaparakïna, Halohés chachax Jerusalén markan maynïr chikat suyun apnaqiripänwa.

13Qhirwa Punku satäkis ukxa, Hanún chachampi, Zanóah markankir jaqinakampiw askichapxäna; jupanakasti punkunakaparux cerrojonakampi, barranakamp uchapxäna, ukatsti pusi patak phisqa tunka metro pirqamp askichapxarakïna, T'unanak Warañ sat punkukama.

14T'unanak Warañ punksti, Recab chachan Malquías yuqapaw askichäna, jupax Bet-haquérem suyu apnaqirïnwa. Jach'a punkunakapsti, cerrojonakani, barranakani uchantäna.

15Uma Jalsu punku satäkis ukxa, Mispá suyun Colhozé apnaqiripan Salum yuqapaw askichäna, utachxatarakïna, ukatsti jach'a punkunakaparux cerrojonakampi, barranakapampiw uchantarakïna. Ukatsti Siloé uma estanquen pirqap askicharakïna, ukasti reyin panqar uyup jak'ankänwa, Davidan markapat saraqankis uka makhatañanakkama.

16Ukxar pirqäki ukxa, Nehemías chachaw askichäna, jupasti Azbuc chachan yuqapänwa, Bet-sur sat chikat suyun apnaqiripa. Jupasti Davidan amayapax imatäki uka uñkatasita, uma imañäkis ukakama, ukatsti soldadonakan cuartelapkamaw askichäna.

17Ukxar pirqäki ukxa Leví wila masit saraqirinakaw askichapxäna: Baní chachan Rehúm yuqapa; ukxarusti mä chikat Queilá suyu apnaqir Hasabías chacha, uksti suyupan sutipxaruw luräna.

18Ukxar pirqäki ukxa masinakapaw askichapxarakïna: maynïr chikat Queilá suyu apnaqiri Henadad chachan Bavai yuqapa;

19ukxar yaqha pirqsti, Mispá markan apnaqiripa, Josué chachan Éser yuqapaw nuwasiñ yänaka imañ utar makhatañäkis uka uñkataskam askicharakïna.

20Ukxarüki uka pirqsti, Zabai chachan Baruc yuqapaw askicharakïna, pirqax muyt'ki ukkhat qalltasina, Eliasib sacerdoten utapa punkupkama;

21ukxar pirqäki uksti Urías chachan Meremot yuqapaw askichäna, jupax Cos chachan allchhipänwa, Eliasib sacerdoten utap punkupat qalltasina uka pachpa utan tukuyapkama.

22Ukxar pirqäki uksti, Jordán jawir qhirwan jakapkäna uka sacerdotenakaw askichapxäna.

23Benjamín sacerdotempi, Hasub sacerdotempix utap uñkatasinkki uka pirqa askichapxäna. Ukatsti Maaseías chachan Azarías yuqapaxa, Ananías chachan allchhipäkaraki ukax utapa jak'ankkis uka pirq askichäna.

24Ukxar pirqäki uksti Henadad chachan Binuy yuqapaw askichäna, Azarías chachan utapat qalltasina pirqa muyt'akama.

25Pirqax muyt'ki uka uñkatasimpi, reyin utapat jach'a jilsut torrëki ukampsti Uzai chachan Palal yuqapaw askichäna, ukasti uñjirinakan uta anqäxapan jikxatasi. Ukxar pirqäki uksti Parós chachan Pedaías yuqapaw askichäna,

26Uma Punku satäkis uka nayräxkama, inti jalsu tuqina, Ófel chiqankiri templon jakir yanapasirinakaw askichapxäna, jach'a jilsuta torrëki ukkhakama.

27Ukxar pirqäki ukxa, Tecoankir jaqinakaw askichapxäna, jach'a jilsuta torre nayräxata, Ófel pirqäkis ukkhakama.

28Sacerdotenakasti sapa maynis utap uñkatas pirqa askichapxäna, Caballonakan punkupa satäkis ukkhat qalltasina.

29Ukat ukxaru, Imer chachan Sadoc yuqapaw utap uñkatas pirqa askichäna; ukat ukxar pirqxa, Inti Jalsu tuqi mantañ punku uñjir Secanías chachan Semaías yuqapaw askicharakïna.

30Ukat ukxar pirqsti, Selemías chachan Hananías yuqapaw askichäna; jupasti Salaf chachan suxtïr yuqapänwa. Berequías chachan Mesulam chachasti utap uñkatas pirqa askicharakïna.

31Ukxar pirqäki uksti, qullqi yänak lurir Malquías chachaw askichäna: Tatitun utapan luqtirinakana, alakipanakan utanakapkama, Uñaraña uta punkükis uka uñkatasita, uñch'ukiñataki utäkis uka pirqa muyt'akama.

32Ukxar pirqäkis ukxa, qullqi yänak luririnaka, alakip luririnakaw askichapxäna, uñch'ukiñ utäkis uka pirqa muyt'at qalltasina, Ovejanakan punkupa satäkis ukakama.