NÚMEROS 5 - Qullan Arunaka DC

Q'añu jaqinakar jaqunukuñxata

1Tatitux Moisesarux sänwa:

2“Israelitanakar parlam, jupanak taypit lepra usun jaqinakar jaqunukupxpan, wila apa usuninakaru, jan ukax, amayar llamkt'apxatap layku q'añuchat uñjaski ukanakaru.

3Chachäpasa, warmïpasa campamento anqar jaqunukupxpan. Ukham lurasax janiw campamentor q'añu tukuyapkaniti, nayan jupanak taypin jakatax layku.”

4Israelitanakasti Tatitux Moisesar siskatayna ukhamarjamaw jaysapxäna, ukatsti taqi uka jaqinakaruw campamentot jaqunukupxäna.

Ñanqha luräwinak tuqit kamachinaka

5Tatitux Moisesarux sänwa:

6“Israelitanakar akham sarakim: Kunapachatix khiti jaqisa, mä warmisa, Tatitur jan suma arkkani, ukhamarak kuna jan walinaksa jaqi masipar lurani mä jach'a jucha lurasa,

7uka jaqisti juchanakap arsusiñapawa, ukhamarus jan walt'ayatapat jaqi masiparux taqpach kuttayxañapa, chikatan chikatapampi yapxatasa.

8Ñanqhachat jaqitix jiwaspa, ukat janirak khiti wila masipar ukanak kuttayañas utjkaspa ukapachasti, ukax Tatitutakïniwa, sacerdoten katuqañapataki. Ukhamarus, ñanqhachir jaqix mä urqu oveja sacerdoten ukar apañapa, wilañcha luqtañapataki, ukhamat juchapat pampachäwi jikxatañapataki.

9“Taqi churäwinakampi, waxt'anakampi, kawkïrinaktix israelitanakax Tatitur luqtapkani, ukatsti sacerdoten ukar apapkani taqi ukanakax, sacerdotetakïniwa.

10Taqi kunanakatix Tatitutak yaqhachatäki, ukatsti sacerdoten ukar apatäki ukanakax, sacerdotetakïniwa.”

Chacha warmi ch'uxña lurasiñ tuqit kamachinaka

11Tatitux Moisesar yaqha kamachi churäna, sarakïnwa:

12“Israelitanakar parlam, akham sarakim: Mä warmitix chachanïkasin jan wal sarnaqas chachapar sallqjaspa,

13ukatsti chachapan jan yatkasin yaqha chachampi wachuq jucha luraspa, ukham luratapamp q'añuchjasispa, ukat janirak khitis yatkaspa ukham luratapxa.

14Inas chachapax warmin jan wal luratap amuyasin mayjt'aschispa, jan ukax, warmin jan kuna jucha luratapat mayjt'asispa ukaxa.

15Ukhamäni ukapachasti, chachax sacerdoten nayraqataparuw warmipar irpani, ukatsti Tatiturux pä kilo cebada jak'u waxt'a warmipat churani. Ukampis janiw jak'u patxar aceitempi warxatkaniti, janirakiw incienso uchkaniti, uka waxt'an chuyma mayjt'at chachan waxt'apätap layku, warmipan juchap qhanstayañ munatap laykuraki.

16“Sacerdotex warmiru jak'apar irpkatasinxa, Tatitun nayraqataparuw uñstayani.

17Ukxarusti Tatitur luqtat uma ñiq'i chatur aptanini, ukarusti qullan utjäwit mä juk'a laq'a aptasin jach'intani.

18Ukatsti, sacerdotex Tatitun nayraqatapar warmir irpkatasax, ñik'utap jararani, ukatsti warmin amparaparux ch'uxña lurasiñ tuqit jucha qhanar uñstayañatak waxt'äwïki uk uchani; ukchañkamasti jupax amparapan katuni, jucha luririnakar jan walt'ayir uka k'allk'u uma.

19Ukapachaw sacerdotex warmir mä juramento lurayani, juparusti sarakiniwa: ‘Janitix yaqha chachamp sarnaqksta, chachamarus ch'uxña lurksta, janirak q'añu lurañamp atipayasksta ukapachax, aka ñanqha apanir k'allk'u uma umantkäta ukkhaxa, janiw kunas kamachkätamti.

20Ukampis jumatix chachamar yaqha chachamp ikintas sallqjsta, ukham lurasin q'añu tukuraksta

21ukapachasti, Tatitux marka nayraqatan jumar ñanqhachpan, purakamas ch'itkatpan, janirak wawanïkamsa.

22Ñanqhachäwi apanir uma umt'kät ukapachaw uka mutuyäwi katuqäta’ sasa. Warmisti saniwa: ‘Ukhamäpan’ sasa.

23“Ukat sacerdotex uka ñanqhachäwi arunakxa mä papelaruw qillqantani, ukatsti uka k'allk'u umampiw phiskhurarakini.

24Uka qhipatsti uka k'allk'u uma warmir umantayani,

25warmisti amparapankki uka waxt'a sacerdoter churarakini, altarxar uchañapataki, Tatitun nayraqatapar uñstayasa,

26ukxarusti waña juyranak waxt'at mä jach'i aptasinxa, altarxaruw nakt'ayani, ukhamat khitin waxt'apäki uk Tatitun amtasiñapataki.

“Ukat warmix uka k'allk'u uma umantani,

27uka warmitix chachapar sallqjchïn ukapachaxa, uka k'allk'u umax wali k'allk'uw tukurapini, ukatsti purakap ch'itkatayani, janirakiw wawanïkanisa, markap taypinsti ñanqhachataw uñjasini.

28Ukampis uka warmitix jan juchanïkchi ukkhaxa, janiw kunas jupar kamachkaniti, ukatsti wawanïskarakiniwa.

29“Aka kamachinakax kunapachatix mä warmix chachanïkasin yaqha chachanakamp sarnaqas sallqjkani ukatakiwa, warmin chachapas ch'uxña luratat chuyma mayjt'ayaskani ukataki,

30jan ukax, warmipan yaqha chachampi sarnaqatap amuyaskani uka chachatakiwa. Chachax Tatitun nayraqataparuw warmipar uñstayani, ukatsti sacerdotex aka kamachinakarjamaw lurani.

31Chachax janiw juchañchat uñjaskaniti, ukampis warmitix juchanïchi ukasti, mutuyataw uñjasini.”