1“¡Ay kunakïkan Jerusalén markan samarat jakirinakatakixa!
¡Ay kunakïkan Samaria markar katuyasit jakirinakatakixa,
wali aytat markan jach'a jilïrinakaparu
khitinakarutix israelitanakax yanap mayipki ukanakataki!
2Calné markar sarasin uñjapxam;
uka chiqat Hamat jach'a markar sarapxam,
ukatsti filisteonakan Gat markapar saraqapxarakim.
¿Jumanakasti uka markanakat sipan juk'ampi sumäpxtati?
¿Jumanakan uraqinakamax, uraqinakapat sipan juk'ampi sumacha?
3Jumanakax uka jan wali urutxa janiw amuyt'añ munapktati,
jumanakpachaw jach'a t'aqhisiñanak mayisisipktaxa.
4Jumanakax marfilat k'achachat suma ikiñanakan winkurapxtaxa,
jach'a manq'äwinakansa suma qunuñanakxaru qunurata;
ovej qallunakampi, lik'i vaca qallunakampi kharsuyasin manq'asa;
5pinkill phust'asax kunayman jayllipxtaxa;
Davidjamaw yaqha phust'añanak lurasipxtaxa;
6jach'a tilinkinakat vino umapxtaxa,
suma q'apkir qullanakampiw jawsusipxtaxa,
¡ukampis markan t'unjäwipat janiw akch'sa llakt'asipktati!
7Jumanakaw katuntatanakat nayraqata, jayar apayata uñjasipxäta
jach'a manq'äwinakaman uxuñanakasti tukusxarakiniwa.”
8Taqi ch'amani Tatit Diosaw qhanpach arsu akham sasa:
“Jacobun markapan jach'a jach'a tukutap uñistwa,
reyi utanakapsa uñistwa;
marksti uñisirinakaparuw katxaruyä,
kunatix ukan utjki ukanakamppach katxaruyäxa.”
9Ukapachasti, tunka chachatix mä utan qhiparanixa, tunkanpachaw jiwarani.
10Axsarañasti wali jach'apunïniwa, maynitix wila masipan jiwat janchipa waytas utat anqar apsuni ukkhaxa, utankiriruw jiskt'ani: “¿Khitimpich utjaski?” sasa. Utankiristi: “Janiw utjkiti” saniwa. Maynïristi sarakiniwa: “¡Amukt'am, Tatitun sutipraki akatjamat arsuskasma!” sasa.
11Tatitun mutuyäwipax jach'a utanakxarusa, jisk'a utanakxarus purininiwa, ukanakasti q'ala tukjatarakïniwa.
12¿Caballonakax qarqanak patanjam jalapxaspati?
¿Quta taypin qhulliñax wakisispati?
¡Jumanakax chiqa kankañxa jiwayir qullaruw tukuyapxtaxa,
aski luräwin achupsti k'allk'uruw tukuyapxaraktaxa!
13Jumanakax jan kunatak kusisipxtaxa,
sapxaraktawa: “Munañanïñxa kipka ch'amasampiw jikxatastanxa” sasa.
14Israelitanaka, sum amuyt'asipxam;
Taqi ch'amani Tatitux siwa:
“Nayax jumanakar jan walt'ayir yaqha marka sartayä,
uka markaw jumanakarux t'aqhisiyapxätam,
amsta tuqit qalltasa, aynach tuqir tukuyasa.”
Who We AreWhat We EelieveWhat We Do
2025 by iamachristian.org,Inc All rights reserved.
