OSEAS 6 - Qullan Arunaka DC

Israel markax Tatitur kuttxañat parli

1Taqin jutapxam, Tatitun ukar kutkatxañäni.

Jupaw usuchjistu, juparakiw k'umarachxistani;

chhuxriñchjistuwa, juparakiw qullt'xistani.

2Jank'akiw k'umar sarnaqasiñ churxistani,

jupa nayraqatan jakañasatakiw sayt'ayxarakistani.

3¡Tatitur uñt'añatak ch'amacht'asipxañäni!

Jupaw jiwasanakan ukar jutani,

kunjämtix intix jalsunki ukhama,

kunjämtix nayraqat jallunakax uraqir purxatki ukhama.

Tatitun jaysatapa

4Tatitux siwa:

“Israelita jaqinaka, ¿kunsa jumanakampix luräxa?

Judá uranqir jaqinaka, ¿kunsa jumanakampix luräxa?

Jumanakan munasiñamax nayatakix qhantati urpur uñtatakiwa,

qhantati sullar uñtatakiwa,

mäkirakiw chhaqtawayxi.

5Ukat nayax profetanak tuqi t'unjapxsmaxa,

arunakax tuqiraki jiwayapxsmaxa.

Nayan chiqa kankañaxasti mä qhanjamaw qhant'ani.

6Jumanakax nayar munapxitasma uk munta,

janiw jumanakan wilañchanakam munkti;

nayarux Diosarjam uñjapxitasma uk munta,

janiw jumanakan nakt'at luqtäwinakam munkti.

7“Ukampis markaxaxa, Adanjamarakiw arust'äwixarux jan phuqkiti,

janirakiw nayatak chiqa chuymanïpkiti.

8Galaad markax ñanqha lurir jaqinakan markapawa,

jaqinakapax jaqi jiwayirinakäpxiwa.

9Sacerdotenakax lunthatkamakïpxiwa,

jaqit lunthatañak uñch'ukisipki;

Siquem thakhin jaqinak jiwarayapxi,

kunayman jan walinak lurapxaraki.

10Israel markan jakirinak taypinsti,

sinti jan walinakpun nayax uñjta:

Israelitanakasti wachuq juchanakan sarnaqapxi,

q'añuchjasipxarakiwa.

11Jumatakisti Judá,

kunürükanitï mutuyäwimax uksa chimpt'xaraktwa.

“Uka qhipatxa, Israel markaxarux uraqiparuw kuttayanxä.