JEREMÍAS 29 - Qullan Arunaka DC

Jeremiasan qillqatapa, jaya markar apanukutanakataki

1-2Jeconías reyisa, reyin taykapasa, reyin utapan uywatanakasa, Judá uraqinkiri, Jerusalén markankir jilïrinakapasa, taqi irnaqirinakas jaya markar apatäpkän uka qhipatsti, Jeremías profetax Jerusalenat mä qillqat apayäna kawkïr jilïr jaqinakatix jayar apayatäpkän ukanakaru, sacerdotenakaru, profetanakaru, taqi jaqinakaru, kawkïrinakarutix Nabucodonosor reyix Jerusalenat Babilonia uraqir katuntat apkatayna taqi jupanakaru.

3Aka qillqatsti Safán jaqin Elasá sat yuqap tuqi, ukhamarak Guemarías, Hilquiasan yuqap tuqiw apayasïna, uka paninirusti Judá markan Sedequías reyipax Nabucodonosor reyimpi parliriw Babiloniar khithatayna. Uka qillqatasti akham sänwa:

4“Akham siwa Israelan taqi ch'amani Tatitu Diosapaxa, taqi khitinakarutix Jerusalén markat Babilonia markar katuntat apaykta ukanakaruxa:

5‘Utanak utachasipxam, ukan sum chhijnuqtapxam; achunak churir quqanak ayruntapxam, uka quqanakan achupat manq'asipxam.

6Jaqichasipxam, ukatsti wawanakanïpxam, jupanakasti jaqichasipxpan ukatsti wawanakanïpxarakpan. Uka markansti waljaniptapxam, janirak juk'anir tukupxamti.

7Kawkïr markarutix nayax apayapksma uka markan askipatak irnaqapxam, uka markatak nayat mayipxarakita, Babilonia markatix juk'ampi jach'aptanixa, jumanakax uka kipkarakiw jach'aptapxäta.

8Naya, Israelana Diosapa, taqi ch'amani Tatituw iwxt'apxsma: Jumanak taypin jakir profetanakampi, yatirinakampis jan sallqjayasipxamti; kuna samkanakapat parlapki ukanaksa jan ist'apxamti.

9Kuntix jupanakax nayan sutixar sapktam ukanakax k'arikamakiwa. Janiw nayax jupanakar khithankti. Naya, Tatituw uk arsta.’

10“Tatitux siwa: ‘Kunapachatix Babiloniaru paqallqu tunka mara apnaqañap phuqhasxani ukkhasti, nayax jumanakat amtasxäwa, arsutaxarjamaw phuqharakï, jumanakarusti aka pachpa uraqiruw kuttayanxapxarakïma.

11Nayasti kuna amtäwinakatix jumanakatak utjkitu ukanak yatiraktwa, uka amtäwinakasti janiw jumanakan jan walt'apxañamatakïkiti, jan ukasti, jumanakan askimatakiwa, ukhamat qhipa urunakanxa suma suyt'äwinakan phuqhantat jakasipxañamataki. Naya, Tatituw uk arsta.

12Ukapachaw jumanakax nayar art'asipxitäta, ukatsti nayan ukaruw jutapxarakïta, nayaru mayisisa, nayasti mayisitanakamxa ist'apxarakïmawa.

13Taqi chuymampi nayar thaqhapxatamatxa, jikxatapxitätawa.

14Jïsa, jumanakax nayarux jikxatapxitätawa, ukatsti sarnaqäwinakam sumaruw tukuyarakï. Taqi markanakat jumanakarux tantacht'apxäma, kawkhanakarutix nayax jumanakar ananukupksma uka chiqanakat apsunxapxäma, ukatsti Jerusalén markaruw kuttayanxapxäma. Naya, Tatituw uk arsta.’

15“Jumanakasti sapxtawa: ‘Tatitux profetanak Babilonia markan churistu’ sasa.

16Tatitux akham siwa, khititix Davidan qunuñapan qunt'atäki uka rey tuqi, aka markankir jaqinak tuqi, khitinakatix jumanakan wila masinakamäki, janirak jupanakax katuntat apatäpki ukanak tuqi.

17‘Naya taqi ch'aman Tatitusti sistwa: Jumanakarux nuwasiñanakampi, mach'ampi, kunayman usunakampi apayanipxäma. Jumanakax ñusantat higor uñtatäpxätawa, ukham ñusantatätapatxa jan manq'kañjamaraki tukuyapxäma.

18Nayasti nuwasiñampi, mach'ampi, kunayman usunakampiw arknaqapxäma. Taqi aka uraqinkir markanakampisti axtasiyapxämawa, taqinin uñjkañ jumanakarux ñanqhachapxäma, mä p'inqa tukjapxarakïma, kawkïr markanakarutix apanukut uñjasipkäta ukansti jumanakax axsarkaña, mulljaskañäpxarakïtawa.

19Jumanakax janiw nayar luqtiri profetanakan iwxt'a arunakapar ist'apktati, nayasti mayamp mayampi jumanakarux uka profetanak khithanta, ukampis jumanakax janiw jupanakarux ist'apktati. Naya, Tatituw uk arsta.

20Jichhax arunakax ist'apxam, khitinakarutix Jerusalén markat Babilonia uraqir apanukupksma taqi ukanaka.’

21“Colaías jaqin Acab yuqapata, Maasías jaqin Sedequías yuqapampitxa, khitinakatix jumanakaru, Tatitun sutipxar k'ari arunak parlxayapxtam ukanakarux, Israelan Diosapa taqi ch'aman Tatitux akham siwa: ‘Nayaw jupanakarux Babilonia uraqinkir Nabucodonosor reyin amparapar katuyarakï; uka reyisti jumanakan uñjkañaw jumanak nayraqatan jupanakar jiwarayani.

22Ukatsti, kawkïrinakatix Judá uraqit Babilonia uraqir apanukutäpki ukanakax maynir ñanqhachañ munapkani ukkhax sapxaniwa: Tatitux jumampix lurpan kunjämtix Sedequías, Acab, uka paninir Babiloniankir reyix ninar phichhantkänxa, ukhamarak jumampix lurpan, sasa.

23Taqi ukanakaw jumanakampix lurasini, Israel markan sinti jach'a juchanak lurapxatam layku: jaqi masiman warmipampiw jumanakax wachuqa jucha lurapxtaxa, ukatsti kuntix nayax jan sapksma ukanakarak nayan sutixar parlapxtaxa. Nayax uk sum yatta, naya kipkaw uñjta. Naya, Tatituw uk arsta’ ” sasa.

Semaías k'ari profetataki yatiyäwi

24Tatitusti Jeremiasarux sarakïnwa, Nehelamankiri Semaías jaqir akham sañapataki:

25“Israelan Diosapa, taqi ch'aman Tatitusti siwa: ‘Jumasti sutimxaruw mä qillqat apayaraktaxa, taqi khitinakatix Jerusalén markan jakapki uka jaqinakaru, Maasías jaqin Sofonías yuqaparu, ukhamarak taqi sacerdotenakaru. Uka qillqatansti Sofoniasarux akham saraktawa:

26Tatituw jumarux Joiadá lanti sacerdotet usktam, ukhamat Tatitun utapan mä jilïrit uñt'atäñamataki. Ukat mä luqhi jaqitix profetäkaspas ukham parlani ukapachasti, jumax katusin cadenanakampi ñach'antasaw carcelar uchantäta.

27¿Kunatarak Anatot chiqankir Jeremiasarusti jan katunttasti? Jupax jumanakarux mä profetäkaspas ukhamaw parlxayapxtam.

28Babilonia uraqirusa mä qillqat apayanipxarakitu akham sasa: Jumanakan ukham jaya markankapxañamax jaya maranakäniwa, uka layku, utanak utachasipxam, sum chhijnuqtapxam, achunak churir quqanak ayruntapxam, ukatsti uka quqanakan achunakap manq'apxarakim’ ” sasa.

29Sofonías sacerdotex uka qillqat Jeremías profetatakix ullart'arapïna.

30Ukhamasti Tatitux Jeremías profetaruw parlarakïna, akham sasa:

31“Taqi khitinakatix uka jaya markar apanukutäpki ukanakarusti akham sasa iwxt'am. Naya, Tatituw arsta: Niyakixay Nehelam chiqankir Semaías jaqix nayan sutixar ukham sasa parlxayapxstamxa, nayasti janiw juparux uka k'ari arunak parlañapatak khithankti, jumanakarux uka k'ari arunakaruw iyawsayapxtam.

32Naya, Tatituw arsta, Semaiasarusa, wawanakaparus mutuyäwa. Markax taypinxa janiw saraqiripax utjkaniti, janirakiw kuna askinaktix markaxar apayankä ukanaksa katuqkaniti, parlatanakapampi jaqinakar nayatak sayt'asir tukuyatap layku. Naya, Tatituw uk arsta.”