1 SAMUEL 28 - Qullan Arunaka DC

1Uka urunakansti, filisteonakax Israel markampi nuwasiñatakiw soldadonakap tantachapxäna, ukat Aquís reyix Davidar säna:

—Jumax sum yattaxa. Jumampi jaqinakamampix nayampi chikaw nuwasir mistupxañapa —sasa.

2Davidasti sänwa:

—Walikiwa. Jichhaw juma jach'a reyix yatïta, aka luqtirimax kun lurañatakis wali ch'ikhiwa —sasa.

Ukxarusti Aquís reyix Davidarux sänwa:

—Ukhamax nayar uñjiritak utt'ayäma —sasa.

Saúl reyimpi Endor chiqankir yatir warmimpi

3Ukapachasti Samuelux jiwxataynawa, israelitanakasti taqiniw jupan jiwatapat jachapxatayna. Ukatsti, yurkatayna uka Ramá chiqaruw amayap imt'xapxatayna. Saúl reyisti, Israel uraqit taqi yatirinakaru, jiwatanakar art'asir ch'amakani jaqinakaruw alisnukxatayna.

4Filisteonakax tantacht'asisin Sunem uka chiqar utjnuqtiriw sarapxäna. Saúl reyisti taqi israelitanakaruw tantacht'arakïna, Guilboa siski uka chiqaruw purintapxäna.

5Kunapachatix filisteonakan campamentop uñtkän ukkhasti, axsarañampi atipt'ataw wal khathatïna.

6Ukatsti Tatituruw jiskt'asïna, ukampis Tatitux janiw juparux samkanak tuqisa, Urim tuqisa, profetanaka tuqis jayskänti.

7Ukat yanapirinakaparux mayïna:

—Jiwatanakar art'asiri mä yatir ch'amakan warmi thaqtanipxam, ukat nayax juparu jiskt'asiriw sarä —sasa.

Jilïrinakapasti sapxänwa:

—Endor markan mä warmix utji jiwatanakaru art'asiri —sasa.

8Saúl reyisti yaqha isimpiw isthapisïna, ukatsti pani chachanakampiw arumpach uka warmir jikxatir saräna. Ukat säna:

—Suertey uñxatt'arapita, ukatsti khitirutix maykäma ukan ajayupay puriyanirapita —sasa.

9Warmisti sarakïnwa:

—Jumasti Saúl reyin luratap askiw yattaxa, jupasti aka Israel uraqit taqi yatirinakaru, jiwatanakar art'asirinakaruw alisnukxi. Juman mayitamtix lurä ukkhaxa, nayarux jiwayapxitaspawa —sasa.

10Ukampis Saúl reyix Tatitun sutipxar juramentompi arsusin juparux säna:

—Uk luratamat janiw kuna mutuyäwis jumxarux jutkaniti —sasa.

11Uka warmisti sarakïnwa:

—¿Khitir jutayañaxsa munta? —sasa.

Saúl reyisti sarakïnwa:

—Samuelur jawsarapita —sasa.

12Warmisti akatjamat Samuelur uñji, ukat warartataraki; ukatsti Saúl reyirux sarakiwa:

—¿Kunatsa ukham k'arintista? ¡Jumax Saúl reyïskarakitätasä! —sasa.

13Ukampis reyix sänwa:

—Jan axsaramti. ¿Kunsa uñjta? —sasa.

Warmisti sarakïnwa:

—Mä ajayuruw aka uraqit makhataskir uñjta —sasa.

14Ukat Saúl reyix jiskt'äna:

—¿Kunjämas uka ajayuxa? —sasa.

Warmix sarakïnwa:

—Mä chuyman jaqiwa, mä jach'a isimpi ist'ata —sasa.

Ukat Saúl reyix mäkiw Samuelütap amuyäna, ukatsti ajanup uraqir puriyañkamaw alt'äna.

15Ukat Samuelux säna:

—¿Kunatakis nayar jawsayista? —sasa.

Saúl reyisti sänwa:

—Nayax wali llakt'ataw jikxatasta, filisteonakaw nayatakix walipun sayt'xi, Diosasti jaytanukxituwa. Janirakiw mayisitaxarux profetanak tuqsa, samka tuqsa ist'kituti. Ukat jichhax kuntix lurañaxäki uk sañamataki jawsaysma —sasa.

16Samuelusti sarakïnwa:

—¿Kunatsa nayar jiskt'asista? Tatitux jumar apanukxtamwa, ukatsti juman uñisirimaw tukxaraki.

17Tatitux kuntix naya tuqi yatiykäyätam uk luraski. Jupax marka apnaqañ apaqxtam, ukatsti jumampi chikt'at sarnaqir Davidaruw churxaraki,

18jumax janiw Tatitun arunakapar jaysktati, janirakiw amalecitanakar tukjam satas tukjktati. Ukat jichhax Tatitux jumampi taqi akanak luraski.

19Ukhamarus jumampiru, israelitanakampirux filisteonakaruw katuyapxätam, qharürux jumampi, wawanakamampix nayampi chikäxapxätawa. Tatitux israelitanakan campamentopsa filisteonakaruw katuyarakini —sasa.

20Ukat Saúl reyix Samuelun arunakap ist'asax axsarañat jach'a tanspachaw uraqir liwnuqtäna. Ukat juk'ampisa, uka urusa, uka arumas janiw kunsa manq'kataynati.

21Warmisti Saúl reyir wali mulljat uñjasinxa, jupar jak'achasisaw säna:

—Naya, juman luqtirimaxa, mayitamarux ist'twa. Jakañaxsa niyapuniw apt'asta juman mayitamar jaysasaxa.

22Jichhasti mayitaxar ist'ita: Juman ch'amañcht'asiñamatakix mä juk'a manq'a waxt'äma, uka ch'amampiw kuttawayxäta —sasa.

23Saúl reyisti janiw manq'añ munkänti, ukampis yanapirinakapampi warmimpix iyawsayapxänwa. Saúl reyix ukspachaw sarthapisin mä ikiñxar qunt'asïna.

24Ukchañkamasti warmix, utapan utjkäna uka lik'i vaca qallu kharsüna, ukatsti jan levaduran t'ant'anak lurañatakiw jak'u chapt'arakïna.

25Ukat ukanak jank'akiw Saúl reyin ukaru, ukhamarak yanapirinakapan ukarus apäna, jupanakasti taqpachaniw manq'apxäna, ukatsti uka arumpachaw ukawjat sarxapxäna.