NÚMEROS 17 - Qullan Arunaka DC

Aarón sacerdoten thujrupa

1 1 (16) Tatitux Moisesaruw parläna, akham sasa:

2 2 (17) “Taqpach israelitanakar parlam, sapa maya ayllun jilïripax mä thujru ayanpan, taqpachasti tunka payan thujrüniwa. Ukatsti jumaw sapa maynin thujrupar sutip qillqantäta,

3 3 (18) Leví ayllun thujruparusti Aaronan sutip qillqantäta, sapa maya ayllun jilïripat mä thujruw utjañapa.

4 4 (19) Uka thujrunaksti Tatitump Jikisiñ Carparuw uchanïta, arust'äwi arca nayräxaru, nayax jumanakamp jikiskta ukkharu.

5 5 (20) Nayaw ajllitaxan thujrup panqarayä, ukhamat israelitanakax jumanakatak jan juk'amp naya nayraqatan jan walinak parlaskañapataki” sasa.

6 6 (21) Moisesasti israelitanakarux pachpa arunak säna, ukatsti sapa ayllun jilïripaw Moisesar thujrup churäna; taqpachasti tunka payan thujrunakänwa, Aaronan thujrupasti ukanak taypinkarakïnwa.

7 7 (22) Ukatsti Moisesax Tatitun nayraqataparuw thujrunak uchäna, arust'äwi arca nayräxaru.

8 8 (23) Qhipärmanthisti, Tatitump Jikisiñ Carpar Moisesax mantkän ukapachaw Aaronan thujrup ch'uxñatatat uñjäna, panqaranakani, puqurat almendra achunakan kuna.

9 9 (24) Ukatsti Moisesax Tatitump Jikisiñ Carpat taqpach thujrunak apsunïna, ukatsti israelitanakaruw uñachayarakïna; uñjasinsti sapa mayniw thujrup aytasxäna.

10 10 (25) Tatitusti Moisesar sänwa: “Aaronan thujrup arust'äwi arca nayräxar kutintayam, ukawjan ukax imatäpan, aka saykatasir markan uk amtasiñapataki. Naya nayraqataxan jan arusisipkañapataki. Jaysapxitani ukasti, janiw jiwapkaniti” sasa.

11 11 (26) Moisesasti Tatitun arsutaparjamaw taqpach luräna,

12 12 (27) ukampis israelitanakax Moisesar sapxänwa:

—¡Aynacht'atätanwa! ¡Taqpachaniw jichhax jiwarañäni!

13 13 (28) Tatitump Jikisiñ Carpar jak'achasirix taqiniw jiwarapxi. ¿Taqinit jiwarapxañänisti? —sasa.