ÉXODO 39 - Qullan Arunaka DC

Sacerdotenakan isinakap lurapxi(Ex 28.1-43)

1Tatitumpi Jikisiñ Carpan waxt'anak luqtir sacerdotenakatakix p'itat isinakap morado telata, wila morado telata, wila telampit lurapxäna. Aaronatakisti ukhamarak suma isinakap lurapxäna, Tatitux Moisesar siskatayna ukhamarjama.

2Efod sat isix qurita, wila morado telata, wila telata, linot k'anthit telat luratänwa.

3Ukxarusti martillomp liq'sut quri placanak lurapxarakïna, ukanaksti hilonakjam juch'us khuchhunuqasin p'itakipañataki wila morado telaru, wila telaru, lino telaru.

4Efod sat isisti, purap thiyaru chinuñanïnwa mayar ch'ukthapita.

5Efod isxaru chint'asiñ wak'asti, qurita, wila morado telata, wila telata, lino k'anthita telat luratänwa; kunjämtix Tatitux Moisesar siskatayna ukhamarjama.

6Ukatsti, ónice sat qalanakxa quri patxaruw uchäna, ukarusti Israelan wawanakapan sutinakapxa mä chimpükaspas ukham uchäna.

7Ukatsti Besalel chachax efod isin chinuñapxaruw ukanak uchäna, ukhamat Israelan wawanakapar amtatäñapataki, kunjämtix Tatitux Moisesar siskatayna ukhamarjama.

8Ukxarusti pectoral sat isix suma p'itakipat luratarakïnwa efod isjama: qurita, wila morado telata, wila telata, linot k'anthit telampita.

9Uka pectoralax paya iqthapitänwa, pusi thiyapasti pä tunka payan centimetronïnwa.

10Uka patxarusti pusi siqi suma k'ajkir qalanakamp apakipatarakïnwa: Nayrïr siqinxa: crisólito, topacio, esmeralda uka qalanakaw utjäna;

11payïr siqinsti: granate, zafiro, jade;

12kimsïr siqinsti: jacinto, ágata, amatista;

13pusïr siqinsti: topacio, ónice, jaspe, uka qalanakaraki. Uka qalanakasti qurit lurat patxarkam uchxatatänwa,

14tunka payanirakïnwa, Israelan wawanakapan tunka payanïtapata; sapa qalarusti tunka payan ayllun sutinakapat mä sutimpi, ukasti mä chimpükaspas ukham uchatänwa.

15Pectoral isi patxarusti suma quri cadenanakampiw katxaruyapxäna t'ullkt'ata ch'ankhanakjama.

16Ukatsti qurit pä katxaruyañanakampi, pä argollamp lurapxäna; uka quri argollanaksti pectoral isin kallachi purap thiyaparuw katxaruyañatak uchapxäna,

17quri cadenanaksti pä argollanakxaruw uchapxäna.

18Ukatsti uka pä cadenan tukuyanakapxa kallachi patar qalanak katxaruyatäkis ukaruw uchapxäna, uksti efod isin nayräxankir katuyañaparuw chint'apxarakïna.

19Ukxarusti qurit pä argollanakampi lurapxarakïna, uksti pectoral isi aynach tuqi pä thiyaparuw uchapxäna, efod sat isxaru.

20Ukatsti yaqha pä argollamp qurit lurapxäna, uksti efod isin nayräx chinuñanakaparuw uchapxäna, manqhïx tuqita, ch'uku jak'aru, efod isin wak'apat amstäxaru.

21Ukatsti pectoral isin argollapampi efod isin argollapampxa, morado ch'ankhampiw chinthapipxäna, pectoral isix efod isin wak'apat patäxankañapataki jan jithiqtasa, kunjämtix Tatitux Moisesar siskatayna ukhamarjama.

22Efod isin capapxa sawut morado telat lurapxäna.

23Uka capa isin kunka thiyanakapasti jan ch'iyjtañapatakix suma k'illpt'as ch'ukuntatänwa, lip'ichit lurat chaleconakjama.

24Uka capa isin thiyanakaparusti, morado telat lurata, ch'iyar wila telata, wila telata, linot k'anthit telampit lurat granada achunakar uñtatanakampiw k'achachapxäna.

25-26Ukxarusti chilinkinak suma qurit lurapxarakïna, uksti granada achunakjam luratampi maykip uchapxäna capa isi taqpach thiyanakaparu, uka isini Tatitur luqtäwi phuqhañataki, kunjämtix Tatitux Moisesar siskatayna ukhamarjama.

27Aaronampitaki, wawanakapampitakisti linot lurat túnica sat isinakxa, suma sawuñ yatiriw luräna,

28uka kipkaraki turbante sat p'iqir uchasiña, calzoncillonaksa lino k'anthitat luräna;

29wak'sa, lino k'anthit telata, ch'iyar wila telata, wila telata, wali suma p'itakipat luratänwa, kunjämtix Tatitux Moisesar siskatayna ukhamarjama.

30Ukxarusti mä placa suma quritkamak lurapxarakïna, Aaronan Tatitutak yaqhachat sacerdotëtap qhanañchañataki, ukarusti suma chimpuntat qillqantapxäna, “Tatitur luqtata” sasa.

31Ukatsti morado ch'ankha uchapxi, alax tuqit turbante sat p'iqir uchasiñ patxar placa chint'añataki, kunjämtix Tatitux Moisesar siskatayna ukhamarjama.

Tatitump Jikisiñ Carpa lurañ tukuyxapxatapa(Ex 35.10-19)

32Tatitumpi Jikisiñ Carpa lurañax tukuyatäxänwa. Kunjämtix Tatitux Moisesar siskatayna ukhamarjamaw israelitanakax suma phuqhat taqi kunanaksa lurapxäna.

33Ukatsti jupanakax tukuyxasin Moisesaruw Tatitump Jikisiñ Carpa katuyxapxäna, taqi yänakapamppacha: t'iriñanakapa, tablanaka, kallañ muruq'u lawanaka, sayir lawanaka, takxäsirinakapa,

34wilar samichat urqu oveja lip'ichinakat lurat carpar janxatañanaka, wali suma lip'ichinakat lurat janxatañanaka, arcar imt'añ velo cortina;

35arust'äwi lurat arcampi, kallañ lawanakapampi, qhuphiñapa,

36mesa, taqi yänakapamppacha, Tatitur luqtañ t'ant'a,

37quritkam lurat candelero, lamparanakapamppacha, uka lamparanakasti yänakapamppachax yäpar ucht'atäñapänwa; ukatsti nakhayañatak aceite,

38qurit lurat altara, luqtañ aceite, suma q'apkir incienso, Tatitumpi Jikisiñ Carpar mantañ punkutak cortina,

39broncet lurat altara, broncet lurat rejillapampi, kallañ muruq'u lawanakapampi, taqi yänakapamppacha, ampar jariqasiñ lamana, qunt'añanakapamppacha,

40anqäxankir cortinanaka, sayir lawanakapampi, takxäsirinakapamppacha, anqäx punkutak cortinanaka, utänqan phalanakampi, ch'akurunakampi, qullan chiqawjana, Tatitumpi Jikisiñ Carpan luqtañanakatak wakiski taqi uka yänakamppacha,

41qullan chiqawjan luqtäwi phuqhañatak p'itat isinaka, Aarón sacerdoten suma isinakapampi, wawanakapan sacerdote isinakapampi.

42Israelitanakax kunjämtix Tatitux Moisesar siskatayna ukhamarjamaw taqi kun lurapxäna,

43Moisesasti taqi luratanakap uñakipäna, Tatitun arsutaparjam lurapxatap uñjasin, suma waxt'äwip jupanakar churäna.