ZACARÍAS 8 - Qullan Arunaka DC

Tatitun arsüwipa

1Taqi ch'amani Tatituw nayar yatiyitu, akham sasa:

2“Naya, taqi ch'aman Tatitux ak arsta: Jach'aw munasiñaxax Jerusalén marka laykuxa; ukham sinti jach'arakiw q'apisiñaxax jupar uñisirinakataki.

3Jerusalén markar jakiriw kutt'anï. Ukapachasti Jerusalenax Chiqa Marka satäniwa; taqi ch'amani Tatitun qullupasa Qullan Qullu satarakïniwa.

4Awkinakasa taykanakasa wasitat Jerusalén plazanakanxa qunurt'asipxani, sapaqat maynis thujrunakapar thujrt'asitkama walja maranïxatanakap layku.

5Yuqall wawanaka, imill wawanakaw markan plazanakap phuqt'apxani, uka plazanakan anatasipxarakini.

6Khä urun taqi ukanakax markaxankirinakat qhiparapki ukanakatakix jan amuykayäniwa; ukampis nayatakix janiw ukhamäkaniti. Naya, taqi ch'aman Tatituw arsta.

7Nayaw markaxarux inti jalsu tuqinkir ch'amani markata, inti jalanta tuqinkir markatsa qhispiyä,

8ukatsti Jerusalén markan jakasxapxañapatakiw apanxarakï. Jupanakasti ukkhax nayan markaxäniwa, nayasti aski chuymampi, chiqa kankañamp uñjir Diosapäyäwa.”

9Taqi ch'amani Tatitux siwa: “Jumanaka, aka urunakan profetanakan arunakap ist'irinaka, ch'amañcht'asipxam, taqi ch'amani Tatitun utap wasitat sayt'ayañatak qallta qala uchantapkäna uka urutpach ist'irinaka.

10Uta wasitat sayt'ayañ nayräxaxa, janiw irnaqirinakar qullqi churañax utjkänti, uywanakar manq'ayañatakis utjkänti; uñisirinak utjatap laykusti janiw jaqinakatakix sumankañax utjkarakïnti; nayaw jaqinakarux jaqi masipatak sartañap utjayta.

11Ukampis jichhaxa, aka markankirinakat qhipariritakixa, janiw nayax nayra urunakanjamäkxäti. Naya, taqi ch'aman Tatituw arsta.

12Sumankañaw jupanak taypin satatäxani. Uva yapunakax achu churani; uraqix suma achunak achuyani, alaxpachasti jallunakap apayanini. Nayasti taqi ukanak aka markankirinakat qhiparirinakarux churä.

13Judá markankirinaka, Israel markankirinaka, jumanakax yaqha markanak taypinxa taqinin ñanqhachat markäpxäyätawa, jichhax nayaw qhispiyapxäma, askiruw tukuyapxäma. ¡Jan axsarapxamti! ¡Ch'amañchasipxam!”

14Taqi ch'amani Tatitux siwa: “Nayax jumanakan nayra awkinakamarux mutuyañ amtäyäta, nayar q'apisiyapkitän ukkhaxa, uka amtäwixasti amtatapunïnwa.

15Jichhasti, Jerusalén markampiru, Judá markampirux aski lurañ amtta. Ukhamasti, jan axsarapxamti.

16Akaw nayan kamachi arunakaxaxa: Maynit maynikamax chiqa arunakpun parlapxam, chiqaparurak uñjapxam, taripäwinakansti sumankañ utjayapxam;

17janiy maynit maynikamax ñanqha lurasipxamti, janirak k'ari juramentsa lurapxamti. Nayax taqi ukanak uñistwa. Naya, Tatituw arsta.”

18Taqi ch'aman Tatitux nayaruw sarakitu:

19“Pusïri phaxsina, phisqïri, paqallqüri, tunkïri phaxsin ayuno lurañaxa, kusisiñaruw kipstani, Judá wila masit saraqirinakatakix kusisiñ phunchhäwinakaruw tukuni. ¡Jumanakax chiqa arsuñampiru sumankañampir munapxam!”

20Taqi ch'amani Tatitux siwa: “Yaqha markankir jaqinakasa, jach'a markanakan utjiri jaqinakas jutasipkakiniwa.

21Ukatsti mä markan jakir jaqinakax yaqha markan jakirinakaruw sapxani: ‘¡Taqi ch'amani Tatitur thaqhir sarapxañäni, suma waxt'äwip jiwasatak mayisiri!’ sasa. Mayninakasti ukxarux sapxarakiniwa: ‘¡Nanakax ukhamax sarapxarakïwa!’ sasa.

22Jerusalén markarusti walja jaqinaka, ch'amani markanakaw jutapxani, taqi ch'amani Tatitur thaqhiri, jupanakatak aski waxt'äwip mayiri.

23Khä urunxa, tunka yaqha markankir jan uñt'at jaqinakaw mä judío jaqirux isipat katuntasipxani, ukat sapxarakini: ‘¡Nanakax jumanakamp chikaw sarañ munapxta, Tatitun jumanakampïtap ist'apxta!’ ” sasa.