1Tatitusti Moisesaruw parläna, akham sarakïnwa:
2“Akanakaw mä lepra usuni jaqin q'umachasiñapxat yatichäwinakaxa: Usut jaqix sacerdoten nayraqatapar irpatäniwa,
3sacerdotesti uka jaqirux campamento anqäxan uñxatani. Uka usut jaqitix k'umar jikxatasxani ukapachasti,
4sacerdotex uka jaqin q'umachasiñapatakix jakaskir suma q'uma pä jamach'inak aptayanini, ukhamarak cedro lawampi, mä wila isimpi, hisopo alimpi.
5Mayïr jamach'xa ñiq'i phukhu patxaru jiwayañapatakiw mayini, uka phukhusti jalsur phuch'ut aptanita umanirakïniwa,
6Ukatsti, jakaski uka jamach'impi, cedro lawampi, wila isimpi, hisopo sat alimpi katurakini, ukatsti jiwat jamach'in wilapampiw taqi uka yänakaru, jakaski uka jamach'irus ch'allsuni uma jalsut aptanit uma patxaru.
7Ukatsti kawkïri jaqitix uka lepra usut q'umachatäkani ukarux paqallqu kutiw uka wilampi ch'allsuni, ukat q'umätap qhanañchxarakini. Jakaskiri jamach'irusti antutnukxarakiniwa.
8“Uka q'umachasiri jaqisti isinakap t'axsuqasxañapawa, jupas jariqasxañaparakiwa, ñik'utapsa, taqpach janchipan utjki uka t'arwanaksa q'al mururasiñapa, ukhamat q'uma uñjasxañapataki. Ukapachakiw wasitat campamentor mantxaspa, ukampisa paqallqu urunakampiw chhujllapat anqäxan jakañapa.
9Paqallqu urunaka phuqhasxipansti, wasitampiw ñik'utapsa, sunkhanakapsa mururasxani, nayra phichhunakapsa, janchipan utjki uka t'arwanaksa q'al khithurasxani, ukhamarak isinakapsa t'axsurasxani, jupas jariqasxarakini, ukapachaw taqpach q'umachat uñjasxani.
10“Kimsaqallqu ururusti jan kunas kamacht'at pä urqu ovejampi, marani mä qachu ovejampi, suxta kilo chikatan aceitempi chapt'at suma jak'umpi, ukxarusti niya chikat litro aceitempi, taqi ukanaksti waxt'a luqtañatak apaniñapawa.
11Kawkïri sacerdotetix q'umachkani ukasti, q'umachatäkani uka jaqiru, kuna waxt'anaktix luqtañatak apankani ukanakampirux, Tatitump Jikisiñ Carpar mantañäkis uka nayräxaruw uchani, Tatitun nayraqataparu;
12ukatsti maynïr urqu ovejampi, uka chikat litro aceitempi katusaw jucha luratat mä wilañchäkaspas ukham luqtani, kunjämtix Tatitur luqtañäki ukham lurasa.
13Uka urqu ovejsti kawkhantix wilañcha luqtañataki uywanakax kharinukusirïki ukkhan kharinukxañapa. Sumankthapiñataki, ukhamarak jucha luratat wilañchanak luqtäwisti sacerdotetakïniwa, ukanakan qullana yänakätap layku.
14“Ukatsti sacerdotex jucha luratat luqtatäkis uka uywan wilapampi luk'anapar juricht'asaw kawkïri jaqitix q'umachasiski ukan kupi jinchuparu, kupi amparapan tayka luk'anaparu, kupi kayupan tayka luk'anaparuw jawintani.
15Ukatsti mä juk'a aceite aptasaw ch'iqa ampar qutapar warxatani;
16kupi amparapan wikucht'ir luk'anapsti, uka aceiteruw juricht'ani, ukampirakiw paqallqu kuti Tatitun nayraqatapar ch'allt'ani.
17Amparapan jilt'kani uka aceitempisti, kawkïri jaqitix q'umachasiski ukaruw kupi jinchupata, kupi amparapan tayka luk'anapata, kupi kayupan tayka luk'anapat jawirt'ani, uksti juchata wilañcha luqtat uywan wilap patxan lurarakini.
18Ukat jilt'ki uka aceitxa, kawkïri jaqitix q'umachasiski ukan p'iqiparuw warxatani. Ukhamat sacerdotex uka jaqin juchapat pampachatäñ jikxatani.
19Ukatsti sacerdotex jank'akiw kuna wilañchatix juchat luqtatäki uk luqtxani, ukhamat uka jaqin q'umäxañapataki; ukxarusti kawkïri uywatix nakt'ayasin luqtañäki uk luqtxarakini,
20uksti altarxaruw luqtani, granonakat waxt'a churatäkis ukanakamp chika. Ukhamat sacerdotex uka jaqin juchapat pampachatäñ jikxatani, uka jaqisti q'umaw uñjasxarakini.
21“Q'umachaskani uka jaqitix wali t'aqhin jakani, janirak qullqipas taqpach jikxatañatak utjarapkani ukapachasti, mä urqu ovejak jucha luratat wilañcha luqtañatak apanini, uksti mä suma waxt'äkaspas ukham juchanakapat pampachatäñ jikxatañatakiw luqtani, ukxarusti aceitempi chapt'ata pä kilo suma jak'u apanini, ukax granonakat mä waxt'a luqtäwïkaspas ukhama, niya chikat litro aceitempi,
22pä qhurukutumpi jan ukax pä paloma chhiwchhimpi, qawqhatix qullqipax utjarapki ukhamarjama; mayax jucha luratat wilañcha luqtañataki, mayasti taqpacha nakt'ayas waxt'a luqtañataki.
23Kimsaqallqu ururusti, q'umäxañatakix taqi ukanak sacerdoten ukar apani; taqi ukanaksti Tatitun nayraqatapan Tatitump Jikisiñ Carpapäkis uka nayraqatan katuyani.
24Sacerdotesti, kawkïri ovejatix jucha luratat wilañcha luqtañatak wakichatäki ukampi, uka niya chikat litro aceitempi, ukanaksti Tatitun nayraqataparuw mä suma waxt'äkaspas ukham uñstañapatak katuyxani;
25kawkïri ovejatix juchat luqtatäkani uk kharinukuni, ukat uka ovejan wilapampiw kawkïri jaqitix q'umachasiski ukan kupi jinchupat jawt'ani, ukhamarak kupi amparapan tayka luk'anapatsa, uka kipkaraki kupi kayupan tayka luk'anapatsa;
26ukatsti mä juk'a aceite aptasaw ch'iqa ampar qutapar warxatani;
27kupi amparapan wikucht'ir luk'anapsti, uka aceiteruw juricht'ani, ukampiw paqallqu kuti Tatitun nayraqatapar ch'allt'ani.
28Amparapan jilt'kani uka aceitempisti, kawkïri jaqitix q'umachasiski ukaruw kupi jinchupata, kupi amparapan tayka luk'anapata, kupi kayupan tayka luk'anapat jawirt'ani, uksti juchata wilañcha luqtat uywan wilap patxan lurarakini.
29Ukat jilt'ki uka aceitxa, kawkïri jaqitix q'umachasiski ukan p'iqiparuw warxatani, ukhamat uka jaqin Tatitut juchanakapat pampachatäñ jikxatxañapataki.
30Ukxarusti sacerdotex mayïri qhurukutu, jan ukax mä paloma chhiwchhi luqtxani, kunjämarutix q'umachasiri jaqix apankani ukhamarjama.
31Mayïr qhurukutux jucha luratat wilañcha luqtäwitakïniwa, mayïristi nakhantayat luqtäwitakirakïniwa, granonakat waxt'a luqtaski ukanakamp kuna. Ukhamat sacerdotex q'umachasir jaqin juchapat pampachatäñ jikxatani.”
32Taqi ukanakaw yatichäwinakax kawkïri jaqinakatix lepra usuni uñstkani ukanakatakixa, khitinakatix q'umachasïwipan walja luqtanak jan churirjamäpki ukanakataki.
Lepra usun q'añuchat utanakan q'umachasiñapat yatichäwinaka33Tatitusti Moisesampiru, Aaronampiruw akham säna:
34“Kunapachatix jumanakax Canaán uraqir mantxapxäta, kawkïr uraqtix nayax jumanakar churapxsma ukaru, ukat nayax uka markan yaqhip utarus lepra usu apayankä ukkhaxa,
35uka utanix sacerdoter uñjiriw sarani, ukatsti sarakiniwa: ‘Amuyatax utaxan pirqanakapan lepra usjamakiw utji’ sasa.
36“Sacerdotesti janïra uka utar mantkasaxa, uka utat taqin mistxañap mayini, ukhamat kunanakatix uka utan utjki ukanakan jan q'añur tukuñapataki. Ukat sacerdotex uka lepra usu uñxatir mantani.
37“Sacerdotetix uka lepra usun ch'uxñätapa, jan ukax wilätapsa amuyani, ukatsti pirqar juk'amp manqhar mantatätap uñjani ukkhasti,
38utat mistunisax, uka utan paqallqu uru jist'antatäñap mayini.
39Paqallqu uru phuqhasipansti sacerdotex wasitampiw uka lepra usur uñakipani, uka usutix uta pirqan juk'ampi aqatatatäni ukkhasti,
40kawkïr qalanakatix uka lepra usun q'añuchat uñstkani uka qalanak apsupxañapatakiw mayini, ukatsti uka qalanakxa markat anqäxaru kawkhatix q'añu chiqäki ukkhar willtanipxañapatakiw mayirakini;
41uka kipkarakiw uka utan pirqanakap q'al khitsupxañap mayini, ukatsti uka pirqan laq'anakap markat anqäxaru, kawkhatix q'añu chiqäki ukkhar wartanipxañapataki.
42Kawkïri qalanakatix apsutäkäna uka lantisti yaqha qalanak uskxapxani, ukatsti uka pirqxa yaqha ñiq'impiw lluch'katxapxani.
43“Ukham taqi ukanak luratattix uka lepra usun q'añupax uñstaskakini ukkhasti,
44sacerdotex wasitat uka utar mantasax uñakipani. Uka usutix wasitat uka utan aqatatatächixa, ukax jan qullkay lepra usütapa sañ muni, ukhamïpansti uka utax q'añu utat uñt'atäxaniwa.
45Ukhamasti uka utax allinukutäñapawa, uka laq'anakas markat anqäxaru q'añu chiqar apanukutäxañapawa.
46Khititix uka urunakan Sacerdoten jist'antayat utar mantkani ukasti, uka jaqix jayp'ukam q'añut uñt'atäniwa.
47Khititix uka utan manq'kani, jan ukax ikkani ukasa, q'umachasxañatakix isinakap t'axsuqasxañapäniwa.
48“Sacerdotetix uka utan lepra usu chhaqtxatap amuyxani ukkhasti, uka utarux q'uma utäxiwa sasaw qhanañchxani.
49Uka uta q'umachañatakisti pä jamach'i katuni, cedro lawampi, mä wila isimpi, ukhamarak hisopo sat alimpi.
50Uka jamach'inakatsti mayïrwa mä ñiq'i phukhxaru jiwayani, uka phukhusti phuch'ut aptanita umanïñapawa.
51Ukatsti, cedro lawampi, hisopo sat alimpi, wila isimpi, jakaski uka jamach'imp katuni, ukatsti jiwat jamach'in wilapampi, uma jalsut apsunit umampiw taqi uka yänakaru, jakaski uka jamach'irus q'al ch'allsuni, utarusti umampix paqallqu kutirakiw ch'allsuni.
52Ukham uka uta q'umachani uka jamach'in wilapampi, jalsu umampi, jakaskiri jamach'impi, cedro lawampi, hisopo sat alimpi, wila isimpi kuna.
53Uka qhipatsti marka anqäxaruw uka jakaskir jamach'irux antutxani, ukhamat kunatix uka uta q'umachañatakix munaski ukanakampix phuqharakini.”
54Taqi ukanakaw lepra usunakata, jan ukax tiña sat usunakat q'umachasiñatak yatichäwinakaxa,
55isinakan uñstkani, jan ukax uta pirqanakansa uñstkani ukapacha,
56ukhamarak p'usunakasa, janchi phallaratanakasa, jan ukax llixtjamas janchin uñstkani ukanak q'umachasiñataki,
57ukhamat kunatix q'umäki, q'añükaraki ukan yatisiñapataki. Akkhakamaw lepra usunak tuqit yatichäwinakaxa.
Who We AreWhat We EelieveWhat We Do
2025 by iamachristian.org,Inc All rights reserved.
