2 CRÓNICAS 2 - Qullan Arunaka DC

Salomonan Tiro markankir Hiram reyimpi sumar mantatapa(1 R 5.1-18; 7.13-14)

1 1 (18) Salomonax Tatitutak mä uta lurañ amtäna, jupatakisa jach'a utapa lurañ amtarakïna.

2 2 (1) Uk lurañatakisti: paqallq tunka waranqa q'ipnaqirinaka, kimsaqallq tunka waranqa qullun qala ch'iyirinaka, kimsa waranqa suxta patakan lurañanak sarayirinak utt'ayäna.

3 3 (2) Ukatsti Salomonax Tiro markankir Hiram reyirux akham yatiyäwi apayäna: “Jumax kunjämtix David awkixampix lurkäyäta ukham nayampi lurarakim, juparux reyi utap lurayañapatakix cedro lawanak apayanïyätaxa.

4 4 (3) Nayax Tatitu Diosaxatakiw mä uta lurayä, jupar luqtañataki, q'apkir qullanak jupar jach'añchas nakt'ayañataki, t'ant'anak siqik jupatak uchañataki, willjtasa jayp'usa nakt'at waxt'äwinak jupar luqtañataki, uka pachparak sábado urunakansa, machaq phaxsi uruyäwinsa, yaqha uruyäwinakansa Tatitu Diosasar Israelan jach'añchas amtasiñataki.

5 5 (4) Ukampis kawkïr uttix luraykä ukax jach'äñapawa, nanakan Diosaxan taqi diosanakat sipan juk'amp jach'ätap layku.

6 6 (5) Ukampisa, ¿khitirak ch'amanïspa Tatitutak mä uta lurañatakisti, alaxpachan alaxpachapatix jan katxäsirjamäkchi ukasti?, ¿khitirakït nayasti jupatak mä uta lurañataki, jupar jach'añchasin incienso nakhayañatakikis lurayirista ukasti?

7 7 (6) Ukhamasti khithanitaya qurita, qullqita, bronceta, hierrota, chupika isita, wila isita, ch'iyar wila isita suma lurañ yatiri jaqiru. Jupasti taqi kunanak k'achachañ yatiñaparaki, ukatsti Judá, Jerusalén markanakan utjkitu uka yatxatat jaqinakampi irnaqañapataki, jupanakarux David awkixaw mink'awayi.

8 8 (7) Líbano chiqatsti cedro, ciprés, sándalo lawanak apayanirakita, nayax yattwa luqtirinakamana Líbano qullunkir lawanaka sum khuchhuñ yatipxatapa. Nayan luqtirinakaxasti juman luqtirinakamar yanapasax

9 9 (8) walja lawanak wakt'ayarapitani, kawkïr uttix luraykä ukax wali jach'äñapawa, muspharkayäñaparakiwa.

10 10 (9) Lawanak khuchhupkani uka irnaqirinakamarusti, pataka kimsaqallq tunka waranqa quintal trigo, cebadas mä ukkharaki, pusi pataka pusi tunkan waranqa litro vino, aceitsti mä ukkharak churä” sasa.

11 11 (10) Ukatsti Tiro markankir Hiram reyix Salomonarux mä qillqat apayanïna, akham sasa: “Tatituw jumarux markapar munatap layku israelitanakan reyipat utt'aytam” sasa.

12 12 (11) Ukxarusti saskakïnwa: “¡Israelan Tatit Diosapax qullanäpan, jupaw alaxpachsa akapachsa luri, juparakiw David reyirux wali yatiñani, ch'ikhi kankañan wawa apayi, Tatitutakisti mä uta lurayani, jupatakisti uta lurayasirakini!

13 13 (12) Nayasti Hiram sat wali yatiñani, suma yatxatat jaqiruw khithansma.

14 14 (13) Jupax Dan ayllunkir warmin wawapawa, awkipas Tiro markankirirakiwa. Jupax qurita, qullqita, bronceta, hierrota, qalata, lawata, chupika isita, wila isita, lino isita, kunayman yänak k'achachañatakis wali suma yatxatatawa, mayitarjam taqi kun lurañ yatiraki, jupaw juman yatxatat jaqinakamampi, David awkiman yatxatat jaqinakapampix irnaqani.

15 15 (14) Ukhamasti, tata, luqtirimarux trigo, cebada, aceite, vino, kunanaktix churañ munapkista ukanak apayanim.

16 16 (15) Ukañkamasti nanakax Líbano chiqan kuna lawanaktix munkta ukanak khuchhusipkä, uksti qutanjamaw Jope markakam botenakat apanirapipxäma. Ukatsti jumaw uka chiqat Jerusalén markarux apayasxäta” sasa.

17 17 (16) Ukatsti Salomonax Israel markan jakapki uka jaya markat jutir jaqinakaruw jakthapïna, David awkipax jakthapiykäna uka qhipata, jayankir jaqinakax pataka phisqa tunka kimsan waranqa suxta patakaniw utjatayna.

18 18 (17) Jupanakatxa paqallq tunka waranqa q'ipirinakaru, kimsaqallq tunka waranqa qala ch'iyirinak chhijlläna, ukatsti kimsa waranqa suxta patakan uñjirinak ucharakïna, irnaqirinakar uñch'ukiñataki.