SALMOS 146 - Qullan Arunaka DC

SALMO 146Diosan luratanakap jach'añchaña

1¡Tatitux jach'ar aptatäpan!

Taqpach chuymaxampiw Tatitur yupaychä.

2Jakañaxkamax Tatituruw yupaychä;

jupatakiw q'uchunak q'uchurakï.

3Jilïr jaqinakarux jan alkatapxamti,

jiwir jaqïpxatap laykux janiw qhispiyapkaspati,

4jiwxapxi ukapachaxa, laq'aruw tukxapxi,

ukürpachaw amtatanakapax tukusxi.

5Jacobun Diosapan yanapat jaqix kusisiñaniwa,

Tatitu Diosapar suyt'irix kusisiñaniwa.

6Jupaw alaxpacha, akapach luri,

lamar qutarusa, taqi ukan utjirinakarusa.

Jupax arsutap phuqhapuniwa.

7T'aqhisiyat jaqinakaruw chiqapar uñji,

manq'at awtjatanakaruw manq'añ churaraki.

Tatituw katuntat jaqinakarux antutnukuyi;

8Tatituw juykhunakarux uñjayi;

Tatituw tinkur jaqinakarux wayti;

Tatituw aski jaqinakarux munasi;

9Tatituw yaqha markankir jaqinakarux imi,

wajchanakampiru, ijma warminakampiruw uywi,

ñanqha lurir jaqinakatakisti thakhip chhaqtayi.

10Tatitux wiñayapuniw apnaqani;

Sión marka, Diosamax wiñayan wiñayapaw apnaqani.

¡Tatitux jach'ar aptatäpan!