JEREMÍAS 33 - Qullan Arunaka DC

Mä suma suyt'äwit yatiyäwi

1Jeremías profetax carcel uta anqan katuntatäkän ukapachaw Tatitux jupar wasitat parlxayäna akham sasa:

2“Naya, khititix aka uraqi lurki, ukatsti kawkhankañapäkitix ukkhar utt'aykaraki, ukaw sistam:

3Nayar art'asita, nayasti ist'ämawa, ukatsti kuna muspharkañanaktix jumax jan yatkta, ukanak uñacht'ayäma.

4-5Naya, Israelan Diosapasti, Jerusalén markankir utanak tuqita, Judá uraqinkir reyinakan utanakap tuqita mä yatiyäwiw utjitu, taqi ukanakax q'ala tinkurayatäniwa. Jumanakar nuwantañatak wakicht'asisipki uka babilonionakar nuwantañtix munapxäta ukaxa, inamayakïniwa, jiwatanakampikiw phuqhantasipxäta. Nayasti jach'a phiñasiñaxanxa, aka markankirinakarux jiwarayäwa; walja juchanak lurapxatapatxa, nayax aka markat maysaruw uñtxta.

6Ukampis akat qhiparux sumankañsa, samarañsa kuttayxapxämawa, ukatsti jan khitin kun sataw sarnaqasxapxäta.

7Judá markana, Israel markan sarnaqäwipsa sumaruw tukuyxarakï, kawkïr markarutix apayatäpkäna uka markatxa kuttayanxäwa, ukatsti jupanakarux wasitat sayt'ayxä: kunjämäpkäntix qalltanxa ukhamäxapxañapataki.

8Kuna juchanaktix nayar ñanqhachañatak lurapkäna, ukhamarak nayatak sayt'asipkäna taqi ukanakat q'umachxarakïwa.

9Jerusalén markasti nayatakix kusiskañäniwa, yaqha markanakatakis suman uñjata, jach'achat markäniwa. Kunapachatix Jerusalén markar askinak nayan churatax ist'apkani ukkhasti, uka markanakax axsarañat khathatipxani.”

10Tatitux siwa: “Jumanakax sapxtawa: ‘Aka chiqax ch'usa wasarar tukutawa, janiw jaqinakasa, uywanakas utjkiti’ sasa; Jerusalén markan thakhinakapasa, Judá uraqin markanakapas ch'usakiwa, janirakiw ukan khiti jaqinakasa, uywanakasa jakapkiti, sasa. Jichhax walikiwa, akan wasitat

11suma kusiskañ phunchhäwi q'uchunakax ist'asini, munasirinakan q'uchunakapaw ist'asini, ukatsti sapxarakiniwa: ‘Taqi ch'amani Tatitur yuspagarapxam, Tatitusti sumawa, munasiñapas wiñayatakiwa’ sasa. Tatitun utaparusti yuspagarañ luqtanak apanipxani. Jïsa, nayaw aka markan sarnaqäwip askir tukuyä, kunjämäpkäntix qalltanxa ukhamäpxañapataki. Naya, Tatituw uk arsta.”

12Taqi ch'amani Tatitux siwa: “Aka markana, kawkhatix jichhax ch'usa wasarar tukuyatäki, jan jaqini, jan uywanakani ukhama, taqi uka markanakapanxa, wasitat chhuxllanakax utjxani, ukan awatirinakax uywanakapar manq'arayasipxani.

13Qullu tuqinkir markanakana, quta iran pampa uraqi tuqinakana, Néguev uraqina, Benjamín ayllun uraqipana, Jerusalén marka thiyanakana, Judá uraqinkir markanakansa, taqi uka chiqanakan awatirinakar oveja tamanakap jakhur uñjapxarakini. Naya, Tatituw uk arsta.”

14Tatitux siwa: “Kuna suma waxt'asïwinaktix Judá markaru, Israel markarus churañ arskäyäta uka urux purininiwa.

15Uka uru purinkani ukapachasti, Davidan mayni wawaparuw reyit utt'ayä, juparakiw aka markarux chiqa kankañampi, aski lurañampi apnaqani.

16Uka urun Judá uraqix suman jikxatasini, Jerusalén markasti jan khitin kun sataw jakasirakini. Ukat aka sutimpi sutichatarakïni: ‘Tatituw jiwasan atipjañasaxa’ sasa.

17Naya, Tatitusti, saraktwa: Davidan wawanakapatxa utjapuniniwa Israel markan mayni reyipaxa,

18ukhamaraki Leví ayllut jutir sacerdotenakas utjapuniniwa, jupanakaw nakt'ata luqtäwinak nayar sapür luqtapxitani, nayar jach'añchañatakisti grano waxt'äwinaka, ukatsti yaqha waxt'äwinak luqtapxitani.”

19Tatitusti wasitat Jeremías profetarux arxayäna, akham sasa:

20“Naya, Tatituw sista: Kuna arust'äwtix nayax urumpisa, arumampisa lurkta ukanakax phuqhasipuniniwa, ukat urus arumasa pachapar puriniskani.

21Uka kipkarakiwa, David luqtirixampi lurkta uka arust'äwix phuqhasipuniniwa, ukatsti mayni jupan wawapa reyit qunt'asirix utjapuniniwa, ukhamaraki sacerdotenakampi, khitinakatix Leví ayllun wawanakapäpki ukanakampi arust'äwir mantataxasa phuqhasipuniniwa.

22David luqtirixan wawanakaparu, nayar luqtiri Leví ayllunkirinakarusa waljaptayäwa, alaxpacha warawaranakjama, quta iramankir ch'allanakar uñtata jan khitinsa jakt'kayäpxaniwa” sasa.

23Tatitusti Jeremiasarux parlxayaskakïnwa, akham sasa:

24“¿Amuytati kunjämsa jaqinakax parlapxi nayan Judá uraqiru, Israelaru apanukutaxatxa? ¡Ukat markaxarux jisk'achañampi uñjapxi, janirakiw mä markarjamas uñjapkiti!

25Jichhasti naya, Tatituw sista: Nayasti urumpi arumampiw mä arust'äwir mantta, ukatsti kuna kamachinakatix alaxpachsa, akapachsa apnaqkaspa ukanak uskurakta,

26janipuniw Jacobun wawanakaparuxa, David luqtirixan wawanakaparus apanukkäti, jupanak taypitsti, Abraham, Isaac, Jacob chachanakan wawanakaparu apnaqañapatakiw utjayarakï. Nayaw jupanakat khuyapayasisax, kawki yaqha markar apanukutäpkäntix uka markat kuttayanxarakï.”