NEHEMÍAS 5 - Qullan Arunaka DC

Markankirinak taypin jan walt'añanak utjatapa

1Uka qhipatsti, mä jach'a jan walt'añanakaw markan utjarakïna, markachir chachanakampi, warminakampix judío masinakap tuqi walpun arusipxäna,

2yaqhipanakax sapxänwa: “Nanakax walja wawanakanïpxtwa, manq'atjam jan jiwaskañatakix trigo munapxta” sasa.

3Mayninakasti sapxarakïnwa: “Nanakax trigo alasiñatakis qullqi mayt'asipxta, uraqinakaxa, uva yapunakaxa, utanakaxa taqi ukanakxaruw mansusipxta” sasa.

4Yaqhanakasti sapxarakïnwa: “Nanakax reyir impuesto churañatakix, uraqinakaxa, uva yapunakaxa ukanakxaruw qullqi mayt'asipxta” sasa.

5Ukhamarus sasipkakïnwa: “Marka masinakaxasa, nanakasa mä pachpa wilat jutirkamakïpxtwa; wawanakaxasti jupanakan wawanakapat janiw kunansa mayjäkiti. Ukampis wawanakaxaruxa t'aqhisiyat jaqïñapatak aljañaw wakt'apxitu. Nanakan phuchhanakaxat waljaniw niya aljantat uñjasxapxi, nanakasti jark'añatakix janiw kuns kamacht'irjamäpkti, nanakan uraqinakaxasa, uva yapunakaxasa yaqha jaqinakankxatapata” sasa.

6Kunapachatix nayax jupanakan arusitanakap ist'ayät ukkhaxa, wal chuymaxan mayjt'asta.

7Sum amuyt'asisinsti, nayax jilïrinakaru, marka apnaqirinakaruw juchañchta, ukham ch'ama lurañanaka marka masinakaparu uchapxatapata. Ukatsti ukanaka aruskipañatakixa, mä jach'a tantachasïwiruw jaqinakar jawsayta,

8jupanakarusti saraktwa: “Nanakax kawkhakamatix ch'amanakaxax utjki ukkhakamaw jiwasa marka masi judío jaqinakar kutsuyanipxta, khitinakatix jucharar markanakar aljatäpkäna ukanakaru; jichhasti jumanakax ¿wasitatampit jupanakar aljapxta, nanakan wasitat kutsuyaskañaxatakisti?” sasa.

Jupanakasti amukïpxänwa, janiw kuns kamsapkänti.

9Ukxarusti nayax saskaktwa: “Kuntix jumanakax lurapkta ukax janiw walïkiti. Uñisirinakasan jiwasat jan larusiskañapatakixa, jumanakax Tatitur axsarapxatam uñacht'ayapxañamänwa.

10Nayasa, wila masinakaxasa, yanapirinakaxasa, jupanakarux qullqi, trigo mayt'apxarakta; ukhamasti, ¡uka manunakxa janiw mayiskxapxäti!

11Jichhasti achikt'asipxsmawa, jichhpach uraqinakapa, uva yapunakapa, olivo yapunakapa, utanakapsa kutt'ayxapxam, ukatsti qullqi, grano, vino jan ukax, aceite manutxa, jan mayiskxapxamti” sasa.

12Jupanakasti sapxänwa: “Taqi ukanak kutt'ayxapxäwa, janiw kuns mayiskxapxäti. Kunjamtix jumax siskta ukham lurapxä” sasa.

Ukatsti, sacerdotenakaruw jawsta, jupanak nayraqatan juramento lurayta, kuntix arsupkäna uk phuqhapxañapataki.

13Ukhamarakiw isixsa thalarasta akham sasa: “Ukhamwa Tatitux uka juramento jan phuqhirinakarux utapatsa, uraqipatsa anqäxar thalanukuni, ukhamarak taqi kunapatix utjki ukanaksa aparani” sasa. Jaqinakasti taqiniw arsupxäna: “Ukhamäpan” sasa. Ukatsti Tatituruw yupaychapxäna.

Nehemiasan khuyapayasirïtapa

Jaqinakasti lurañatak arsupkäna ukxa taqiniw phuqhapxäna.

14Artajerjes reyisti pä tunka mara marka apnaqäwipana nayarux Judá uraqxar marka apnaqirit utt'ayitäna, kimsa tunka payan marakamaw uka markan apnaqiripat ukankäyäta. Kunatix marka apnaqiriru impuestonakat churañ wakt'käna uksti, tunka payan maranakax janiw nayasa, yanapirinakaxasa mayipkäyätti.

15Ukampis nayat nayra marka apnaqirinakasti, jan wal markar lurapxäna, jupanakax sapüruw pusi tunk qullqi mayisipxirïna manq'añataki, vinotaki. Ukxarusti yanapirinakapax markachirinakarux t'aqhisiyapxirïnwa. Ukampis nayax janiw ukham lurkti Tatitur axsaratax layku.

16Mä tuqitxa nayax markan pirqapa wasitat sayt'ayaña amtäwixampix phuqtwa, janiw kuna uraqsa alaskaraktti. Yanapirinakaxax pirqa sayt'ayañ luräwinakan taqiniw irnaqapxi.

17Ukhamarus nayaw pataka phisqa tunkani judío jaqinakar manq'añ churäyäta, marka apnaqir jilïrinakapamppacharu, jak'ankir markanakat jutirinakarusa.

18Ukatsti nayankirita sapüru manq'añanak uchäyäta: mä vaca, suxta sumïri ovejanaka, manq'añ jamach'inaka; ukatsti sapa tunka uruw vinox jilarkir utjirïna. Ukampis janipuniw mayiskäyätti, kunatix marka apnaqirïtaxat wakt'kitu ukxa, markachirinakan wali t'aqhisipxatap layku.

19Ukhamasti, Tatitur mayt'asisaw sarakta: ¡Tatitu Diosaxay, nayan askixatak amtasitaya, taqi kunanaktix aka marka layku lurkta ukanakata! sasa.